ເຜີຍແຜ່ເຊື່ອມຊຶມເອກະສານສໍາຄັນຂອງພັກໃຫ້ພະນັກງານນໍາພາຫຼັກແຫຼ່ງຂອງພະແນກຍຸຕິທຳແຂວງ ອຸດົມໄຊ

ພະແນກຍຸຕິທໍາແຂວງອຸດົມໄຊ ໄດ້ຈັດພິທີເຜີຍແຜ່, ເຊື່ອມຊຶມເອກະສານມູນເຊື້ອວັນສ້າງຕັ້ງພັກປະຊາຊົນປະຕິວັດລາວຄົບຮອບ 65 ປີ ຂຶ້ນ ໃນວັນທີ 20 ມີນາ 2020 ຢູ່ທີ່ຫ້ອງປະຊຸມໃຫຍ່ຂອງຕົນ ໂດຍການເປັນປະທານຂອງ ສະຫາຍ ສອນສຸວັນ ປັນຍາວົງ ເລຂາໜ່ວຍພັກ, ຫົວໜ້າພະແນກຍຸຕິທໍາແຂວງ ອຸດົມໄຊ ມີສະຫາຍຮອງເລຂາໜ່ວຍພັກ, ຄະນະໜ່ວຍພັກ, ສະມາຊິພັກສົມບູນ-ສໍາຮອງ ແລະ ພະນັກງານ-ລັດຖະກອນ ພາຍໃນພະແນກເຂົ້າຮ່ວມ 25 ສະຫາຍ, ຍິງ 3 ສະຫາຍ.

ສະຫາຍ ສອນສຸວັນ ປັນຍາວົງ ໄດ້ໃຫ້ກຽດເຜີຍແຜ່, ເຊື່ອມຊຶມເອກະສານ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65 ປີ (22 ມີນາ 1955-22 ມີນາ 2020) ເພື່ອເປັນການຕີລາຄາຄືນຕໍ່ກັບຄວາມຮັບຜິດຊອບທາງດ້ານການເມືອງ, ການຈັດຕັ້ງປະຕິບັດວຽກງານໃນໄລຍະຜ່ານມາຂອງຄະນະໜ່ວຍພັກ ພະແນກຍຸຕິທໍາແຂວງອຸດົມໄຊ ແນໃສ່ປັບປຸງຍົກສູງຄຸນທາດການເມືອງ, ຄຸນສົມບັດສິນທໍາປະຕິວັດ, ສ້າງການຫັນປ່ຽນໃໝ່ຂອງແບບແຜນ ແລະ ວິທີການນຳພາຂອງຄະນະໜ່ວຍພັກ, ສະມາຊິກພັກ ໃຫ້ມີປະສິດທິພາບສູງຂຶ້ນກວ່າເກົ່າ ໃຫ້ສະມາຊິກພັກໄດ້ຮັບຮູ້ ແລະ ເຂົ້າໃຈກ່ຽວກັບປະຫວັດຄວາມເປັນມາຂອງວັນສໍາຄັນຕ່າງໆທາງປະຫວັດສາດ ກໍຄືວັນສ້າງຕັ້ງພັກປະຊາຊົນປະຕິວັດລາວ.
ຈາກນັ້ນ, ສະຫາຍ ສີຖານ ມະນີໄຊ ຮອງເລຂາໜ່ວຍພັກ ຍັງໄດ້ຜ່ານບົດສະຫຼູບກ່ຽວກັບການຊີ້ນໍາ-ນຳພາຂອງຄະນະໜ່ວຍພັກ ປະຈໍາໄຕມາດ I (1, 2, 3) ແລະ ທິດທາງແຜນການ ປະຈໍາໄຕມາດ II (4, 5, 6) ປີ 2020 ຕື່ມອີກ.

ຂ່າວ: ນາງ ພູຄຳ ຫັດສະດີ
ພາບ: ບຸນມີ ອິນທະວົງ