ຫົວໜ້າພະແນກຍຸຕິທໍາແຂວງ ອຸດົມໄຊ ລົງຊຸກຍູ້ວຽກງານຍຸຕິທໍາຮາກຖານ ພ້ອມທັງມອບຄອມພີວເຕີ ແລະ ປື້ມກົດໝາຍ ໃຫ້ຫ້ອງການຍຸຕິທໍາເມືອງ ນາໜໍ້ ແລະ ກຸ່ມບ້ານຂວາງ

ໃນຕອນເຊົ້າຂອງວັນທີ 13 ພະຈິກ 2020 ທີ່ຜ່ານມານີ້ ທ່ານ ສອນສຸວັນ ປັນຍາວົງ ກໍາມະການພັກແຂວງ ຫົວໜ້າພະແນກຍຸຕິທໍາແຂວງ ໄດ້ລົງຊຸກຍູ້ວຽກງານຍຸຕິທໍາ ຢູ່ທີ່ເມືອງ ນາໜໍ້ ແຂວງ ອຸດົມໄຊ ໂດຍໄດ້ຮັບການຕ້ອນຮັບຈາກ ທ່ານ ຄໍາມວນ ມົວຈົ່ງຮື່ ຮອງຫົວໜ້າຫ້ອງວ່າການ ເມືອງ ນາໜໍ້ ແລະ ພະນັກງານຫ້ອງການຍຸຕິທໍາເມືອງ ນາໝໍ້ ຈຸດປະສົງເພື່ອຕິດຕາມຊຸກຍູ້ວຽກງານຍຸຕິທຳຮາກຖານຂອງເມືອງ.

ທ່ານ ຈັນຫຼ້າ ວົງພະຈິດ ຫົວໜ້າຫ້ອງການຍຸຕິທໍາເມືອງ ນາໜໍ້, ໄດ້ຂື້ນຜ່ານບົດລາຍງານການຈັດຕັ້ງປະຕິບັດໜ້າທີ່ວຽກງານໃນໄລຍະຜ່ານມາ ຊຶ່ງມີທັງຜົນງານທີ່ດີເດັ່ນ, ຈຸດດີ, ຈຸດອ່ອນ, ຂໍ້ຄົງຄ້າງ ແລະ ວິທີແກ້ໄຂລວມທັງທິດທາງແຜນການໃນຕໍ່ໜ້າ. ຈາກນັ້ນ, ທ່ານ ສອນສຸວັນ ປັນຍາວົງ ກໍໄດ້ມີຄໍາເຫັນໂອ້ລົມ ກ່ອນອື່ນບັນດາທ່ານໄດ້ສະແດງຄວາມຍ້ອງຍໍ ຊົມເຊີຍຕໍ່ຜົນງານທີ່ຫ້ອງການຍຸຕິທໍາເມືອງ ນາໜໍ້ ຍາດມາໄດ້ຫຼາຍດ້ານທີ່ພົ້ນເດັ່ນໃນໄລຍະຜ່ານມາ ພ້ອມທັງເນັ້ນໜັກບາງບັນຫາທີ່ຄວນເອົາໃຈໃສ່ເປັນຕົ້ນ ແມ່ນເອົາໃຈໃສ່ສຶກສາອົບຮົມການເມືອງ-ແນວຄິດ, ເຕົ້າໂຮມຄວາມສາມັກຄີພາຍໃນໃຫ້ມີຄວາມໜັກແໜ້ນ ແລະ ແໜ້ນແຟ້ນ, ສືບຕໍ່ຈັດຕັ້ງປະຕິບັດວຽກງານຍຸຕິທໍາຮາກຖານໃຫ້ບັນລຸຕາມຄາດໝາຍທີ່ວາງໄວ້. ນອກຈາກນີ້ ທ່ານຍັງໄດ້ມອບເຄື່ອງອຸປະກອນຮັບໃຊ້ວຽກງານຍຸຕິທໍາຄື: ຄອມພີວເຕີ, ປື້ມປະມວນກົດໝາຍອາຍາ, ປື້ມປະມວນກົດໝາຍແພ່ງ ແລະ ວາລະສານກົດໝາຍ ແລະ ຍຸຕິທໍາ ໃຫ້ຫ້ອງການຍຸຕິທໍາເມືອງ ແລະ ກຸ່ມບ້ານຂວາງ ເມືອງ ນາໜໍ້ ແຂວງ ອຸດົມໄຊ ເພື່ອນໍາໃຊ້ເຂົ້າໃນວຽກງານຍຸຕິທໍາ, ພ້ອມທັງສືບຕໍ່ນໍາເອົາລັດຖະທໍາມະນູນ, ກົດໝາຍ, ນິຕິກໍາໃຕ້ກົດໝາຍໄປໂຄສະນາເຜີຍແຜ່ໃຫ້ແກ່ພະນັກງານ-ລັດຖະກອນ, ທະຫານ, ຕໍາຫຼວດ ແລະ ພໍ່ແມ່ປະຊາຊົນບັນດາເຜົ່າໃຫ້ທົ່ວເຖິ່ງ.

ຂຽນໂດຍ: ນາງ ພູຄໍາ ຫັດສະດີ

ຖ່າຍພາບ: ພັນນະກອນ ອິນທະຍາ

ປະເພດຂ່າວ: