ພິທີປິດການຮຽນ-ການສອນກົດໝາຍໄລຍະສັ້ນ 45 ວັນ ໃຫ້ແກ່ພະນັກງານຫຼັກແຫຼ່ງຫ້ອງການອ້ອມຂ້າງ ແລະ 22 ບ້ານເທດສະບານ ຂອງເມືອງ ໄຊ

Primary tabs

          ໃນຕອນເຊົ້າວັນທີ 31 ສິງຫາ 2021 ຢູ່ທີ່ສະໂມສອນເມືອງ ໄຊ ໄດ້ຈັດພິທີປິດການຮຽນ-ການສອນກົດໝາຍໄລຍະສັ້ນ 45 ວັນ ໃຫ້ແກ່ພະນັກງານຫຼັກແຫຼ່ງຫ້ອງການອ້ອມຂ້າງເມືອງ ແລະ 22 ບ້ານເທດສະບານຂອງ ເມືອງ ໄຊ ແຂວງ ອຸດົມໄຊ.
ພາຍໃຕ້ການເປັນປະທານຮ່ວມຂອງທ່ານ ວາລີ ຈືນໍເຢັງ ກຳມະການພັກແຂວງ ເລຂາພັກເມືອງ ເຈົ້າເມືອງ ໄຊ, ທ່ານ ສອນສຸວັນ ປັນຍາວົງ ກຳມະການພັກແຂວງ ຫົວໜ້າພະແນກຍຸຕິທຳແຂວງ ອຸດົມໄຊ, ມີບັນດາຮອງເລຂາພັກເມືອງ, ຮອງເຈົ້າເມືອງ, ຄະນະປະຈຳພັກເມືອງ, ກຳມະການພັກເມືອງ ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ, ແຂກຖືກເຊີນຈາກພະແນກການ, ຈາກຂັ້ນເມືອງ, ມີບັນດາຄູຝຶກ, ນັກຝຶກອົບຮົມ ແລະ ນາຍບ້ານໆອອ້ມຂ້າງເທດສະບານເຂົ້າຮ່ວມຢ່າງພ້ອມພຽງ.
          ໃນພິທີ, ທ່ານວຽງເງິນ ວົງລັດສະໝີ ຫົວໜ້າຫ້ອງການຍຸຕິທຳເມືອງ ໄຊ ຂຶ້ນຜ່ານບົດສະຫຼຸບກ່ຽວກັບການຈັດຕັ້ງ ກໍ່ຄືການຮຽນ-ການສອນ ກົດໝາຍໄລຍະສັ້ນ 45 ວັນຜ່ານມາ ແລະ ພ້ອມທັງວາງທິດທາງແຜນການໃນປີໜ້າ. ການຮຽນ-ການສອນກົດໝາຍໄລຍະສັ້ນ 45 ວັນ ໃຫ້ແກ່ພະນັກງານຫຼັກແຫຼ່ງຫ້ອງການອ້ອມຂ້າງ ແລະ 22 ບ້ານເທດສະບານຂອງເມືອງ ໄຊ ປະຈຳປີ 2021 ແມ່ນໄດ້ດຳເນີນມາເປັນຊຸດທີ 2, ມີນັກຝຶກອົບຮົມ ເຂົ້າຮຽນທັງໝົດ 43 ທ່ານ, ຍິງ 20 ທ່ານ.
          ຫຼັກສູດທີ່ນຳມາຂຶ້ນຫ້ອງສິດສອນຄັ້ງນີ້ປະກອບ ມີ 35 ວິຊາຮຽນ, ມີ 22,5 ໜ່ວຍກິດ ແລະ 384 ຊົ່ວໂມງຮຽນ ໄດ້ກຳນົດເວລາຮຽນ 45 ວັນ (ບໍ່ນັບວັນເສົາ-ວັນອາທິດ) ເຊິ່ງໄດ້ເລີ່ມຮຽນແຕ່ວັນທີ 22 ມີຖຸນາ 2021 ເປັນຕົ້ນມາ, ມາຮອດວັນທີ 24 ສິງຫາ 2021 ໄດ້ສຳເລັດ.
ຈາກນັ້ນໃນພິທີ, ທ່ານ ວິໄລສອນ ສີວຽງຄຳ ຮອງຫົວໜ້າຫ້ອງການຍຸຕິທຳເມືອງ ໄຊ ຂຶ້ນຜ່ານຂໍ້ຕົກລົງ ຂອງຫົວໜ້າສະຖາບັນຍຸຕິທຳແຫ່ງຊາດ ສະບັບເລກທີ 1603/ສຍຊ, ລົງວັນທີ 17 ກໍລະກົດ 2021 ວ່າດ້ວຍການມອບໃບຢັ້ງຢືນ ຜົນສຳເລັດການຮຽນກົດໝາຍໄລຍະສັ້ນ 45 ວັນ ເປັນກຽດຂຶ້ນມອບໃບຢັ້ງຢືນໂດຍທ່ານ ວາລີ ຈືນໍເຢັງ ກຳມະການພັກແຂວງ ເລຂາພັກເມືອງ ເຈົ້າເມືອງ ໄຊ.
          ຕອນທ້າຍພິທີ, ທ່ານ ສອນສຸວັນ ປັນຍາວົງ ກຳມະການພັກແຂວງ ຫົວໜ້າພະແນກຍຸຕິທຳແຂວງ ອຸດົມໄຊ ແລະ ທ່ານ ວາລີ ຈືນໍເຢັງ ກຳມະການພັກແຂວງ ເລຂາພັກເມືອງ ເຈົ້າເມືອງ ໄຊ ພັດປ່ຽນກັນ ມີຄຳຄິດຄຳເຫັນໂອ້ລົມ, ກ່ອນອື່ນພວກທ່ານໄດ້ຍ້ອງຍໍຊົມເຊີຍຕໍ່ນັກຝຶກອົບຮົມ ທີ່ມີຄວາມກະຕື້ລືລົ້ນໃນການຮຽນ ແລະ ການສອນຈົນສາມາດສຳເລັດຢ່າງຈົບງາມ ແລະ ໄດ້ເນັ້ນໜັກໃຫ້ບັນດາຜູ້ທີ່ໄດ້ຮຽນຈົບໃນຄັ້ງນີ້ ຈົ່ງນຳເອົາຄວາມຮູ້ທີ່ໄດ້ຮ່ຳຮຽນມາເອົາໄປໝູນໃຊ້ ໃນຂະແໜງການ ແລະ ທ້ອງຖິ່ນ ຂອງຕົນໃຫ້ເກີດດອກອອກຜົນ.
ຂ່າວ ແລະ ພາບ: ທ່ານ ບຸນມີ ອິນທະວົງ.
ປະເພດຂ່າວ: