ໜ່ວຍສະຫະພັນແມ່ຍິງພະແນກຍຸຕິທຳ ແຂວງອັດຕະປື ສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ

ວັນທີ 4 ສິງຫາ 2020 ນີ້ ຢູ່ທີ່ຫ້ອງປະຊຸມພະແນກຍຸຕິທຳແຂວງ ອັດຕະປື ໄດ້ເປີດກອງປະຊຸມສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງໜ່ວຍສະຫະພັນແມ່ຍິງພະແນກຍຸຕິທຳຂຶ້ນ ໂດຍການເປັນປະທານຮ່ວມຂອງ ທ່ານ ຄຳຫຼ້າ ແກ້ວວັນສອນ ເລຂາໜ່ວຍພັກ ຫົວໜ້າພະແນກຍຸຕິທຳແຂວງ ອັດຕະປື, ທ່ານ ນາງ ກົງຕາ ໂພສາລາດ ຮອງປະທານຄະນະບໍລິຫານງານສະຫະພັນແມ່ຍິງແຂວງ, ທ່ານນາງ ພຸດປະໄທ ບຸດສຳພັນ ຫົວໜ້າໜ່ວຍສະຫະພັນແມ່ຍິງພະແນກຍຸຕິທຳ, ພ້ອມດ້ວຍສະມາຊິກສະຫະພັນແມ່ຍິງ ແລະ ແຂກຖືກເຊີນເຂົ້າຮ່ວມທັງໝົດ 20 ທ່ານ ຍິງ 16 ທ່ານ.

ກອງປະຊຸມໄດ້ຮັບຟັງການສະຫຼຸບລາຍງານການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ ປະຈໍາປີ 2019 ແລະ ທິດທາງແຜນການ 2020 ໂດຍທ່ານ ນາງ ພຸດປະໄທ ບຸດສຳພັນ ຫົວໜ້າໜ່ວຍແມ່ຍິງພະແນກຍຸຕິທຳ, ຊຶ່ງໄດ້ຍົກໃຫ້ເຫັນຜົນງານ, ດ້ານດີ, ດ້ານອ່ອນ ແລະ ຂໍ້ຄົງຄ້າງທີ່ຈະຕ້ອງສືບຕໍ່ປັບປຸງແກ້ໄຂໃນຕໍ່ໜ້າ. ປີ 2019 ຜ່ານມາ ໜ່ວຍສະຫະພັນແມ່ຍິງ ພະແນກຍຸຕິທໍາແຂວງ ອັດຕະປື ສາມາດປະເມີນໄດ້ບຸກຄົນ 3 ດີ ປະເພດ I ຈຳນວນ 12 ສະຫາຍ ເທົ່າກັບ 95%. ຈາກນັ້ນ, ກໍໄດ້ມອບໃບຢັ້ງຢືນໃຫ້ໜ່ວຍສະຫະພັນແມ່ຍິງພະແນກຍຸຕິທຳແຂວງ ອັດຕະປື ເປັນໜ່ວຍສະຫະພັນແມ່ຍິງ 3 ດີ ໃຫ້ກຽດມອບໂດຍ ທ່ານ ນາງ ກົງຕາ ໂພສາລາດ.

ຕອນທ້າຍ ທ່ານ ຮອງປະທານຄະນະບໍລິຫານງານສະຫະພັນແມ່ຍິງແຂວງ ກໍໄດ້ໂອ້ລົມ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ໜ່ວຍສະຫະພັນແມ່ຍິງ ພະແນກຍຸຕິທໍາຍາດມາໄດ້ໃນໄລຍະຜ່ານມາ ແລະ ທ່ານ ຍັງໄດ້ເນັ້ນໜັກ ແລະ ຮຽກຮ້ອງໃຫຄະນະໜ່ວຍຫະພັນແມ່ຍິງພະແນກຍຸຕິທໍາ ຈົ່ງສືບຕໍ່ຊີ້ນໍາ-ນໍາພາ ສະມາຊິກແມ່ຍິງໃຫ້ຍາດໄດ້ຜົນງານ ແລະ ຜົນສໍາເລັດທີ່ຍິ່ງໃຫຍ່ກວ່າເກົ່າ ແລະ ພ້ອມກັນຈັດຕັ້ງປະຕິບັດ ຂໍ້ແຂ່ງຂັນ 3 ດີ ດ້ວຍຄວາມຮັບຜິດຊອບສູງ ແລະ ມີຜົນສຳເລັດຕາມຄາດໝາຍທີ່ວາງໄວ້.

ຂ່າວ: ທົງໄຊ ຈຳສີນ

ພາບ: ທິດເທວາ ຄົມມາລາ