ພະແນກຍຸຕິທຳແຂວງ ອັດຕະປື ຈັດກອງປະຊຸມປະກອບຄຳເຫັນໃສ່ຮ່າງນິຕິກຳ

ໃນຕອນເຊົ້າ ຂອງວັນທີ 17 ພະຈິກ 2020 ທີ່ຫ້ອງປະຊຸມພະແນກຍຸຕິທຳແຂວງ ໄດ້ຈັດກອງປະຊຸມຄົ້ນຄວ້າ ແລະ ປະກອບຄຳເຫັນໃສ່ຮ່າງນິຕິກຳໃຕ້ກົດໝາຍ. ໃຫ້ກຽດເປັນປະທານໂດຍ ທ່ານ ຄຳຫຼ້າ ແກ້ວວັນສອນ ເລຂາໜ່ວຍພັກ ຫົວໜ້າພະແນກຍຸຕິທຳແຂວງ, ເຂົ້າຮ່ວມມີຄະນະພະແນກ, ຫົວໜ້າຂະແໜງ, ຮອງຂະແໜງ ແລະ ພະນັກງານວິຊາການ ທັງໝົດ 9 ທ່ານ ຍິງ 2 ທ່ານ.

ໃນກອງປະຊຸມ ທ່ານນາງ ພຸດປະໄທ ບຸດສຳພັນ ວ່າການຫົວໜ້າຂະແໜງກົດໝາຍ ໄດ້ກ່າວຈຸດປະສົງ ແລະ ສະເໜີ ກ່ຽວກັບນິຕິກຳທີ່ຈະນຳມາຄົ້ນຄວ້າ ແລະ ປະກອບຄຳເຫັນໃນຄັ້ງນີ້ ຊຶ່ງມີ 2 ສະບັບ ຄື: ຮ່າງຂໍ້ຕົກລົງຂອງເຈົ້າແຂວງ ວ່າດ້ວຍ ສັນຍາແຮງງານ ແລະ ຮ່າງຂໍ້ຕົກລົງຂອງເຈົ້າແຂວງ ວ່າດ້ວຍກອງທຶນຊ່ວຍເຫຼືອຊຶ່ງກັນ ແລະ ກັນ.

ຈາກນັ້ນ, ທ່ານຫົວໜ້າພະແນກຍຸຕິທຳແຂວງ ໄດ້ມີຄຳເຫັນຊີ້ນຳຕໍ່ພະນັກງານທີ່ເຂົ້າຮ່ວມໃນກອງປະຊຸມ ໃຫ້ເອົາໃຈໃສ່ຄົ້ນຄ້ວາ ປະກອບຄຳຄິດຄຳເຫັນໃສ່ຮ່າງນິຕິກຳ ດ້ວຍຄວາມຮັບຜິດຊອບສູງ ເພື່ອເຮັດໃຫ້ນິຕິກຳດັ່ງກ່າວມີເນື້ອໃນທີ່ຖືກຕ້ອງ, ຄົບຖ້ວນ ແລະ ບໍ່ຂັດກັບລະບຽບກົດໝາຍ. ກອງປະຊຸມ ໄດ້ດຳເນີນເປັນເວລາ 1 ວັນ ຈຶ່ງສຳເລັດ.

ຂ່າວໂດຍ: ທົງໄຊ ຈຳສິນ

ຖ່າຍພາບ: ທິດເທວາ ຄົມມາລາ

ປະເພດຂ່າວ: