ແຂວງ ຫຼວງພະບາງ ຍົກລະດັບຄວາມຮູ້ທາງດ້ານກົດໝາຍໃຫ້ພະນັກງານຫຼັກແຫຼ່ງ

ໃນວັນທີ 13 ພະຈິກ 2020ນີ້ ພະແນກຍຸຕິທໍາແຂວງ ຫຼວງພະບາງ ໄດ້ຈັດຊຸດອົບຮົມກົດໝາຍໄລຍະສັ້ນ 45 ວັນ ໃຫ້ພະນັກງານຫຼັກແຫຼ່ງແຂວງ ຫຼວງພະບາງ ຊຶ່ງເປັນຊຸດທີ VII ໂດຍການເປັນປະທານຂອງ ທ່ານ ສຸກັນ ບຸນຍົງ ຮອງເຈົ້າແຂວງ ຫຼວງພະບາງ, ທ່ານ ບຸນສະຫວາດ ບຸບຜາ ຮອງລັດຖະມົນຕີກະຊວງຍຸຕິທໍາ ພ້ອມດ້ວຍຄະນະຮັບຜິດຊອບ, ວິທະຍາກອນ ແລະ ສໍາມະນາກອນເຂົ້າຮ່ວມ.

ທ່ານ ສຸກັນ ບຸນຍົງ ກ່າວເປີດຊຸດອົບຮົມຄັ້ງນີ້ວ່າ: ຊຸດອົບຮົມຄັ້ງນີ້ເປັນການຍົກລະດັບຄວາມຮູ້ທາງດ້ານກົດໝາຍໃຫ້ພະນັກງານຫຼັກແຫຼ່ງຂອງແຂວງ ຫຼວງພະບາງ ເພື່ອນໍາໄປໝູນໃຊ້ເຂົ້າໃນການປະຕິບັດວຽກງານທີ່ຕົນຮັບຜິດຊອບໃຫ້ສອດຄ່ອງກັບກົດໝາຍ ແລະລະບຽບການ ແນໃສ່ສ້າງລັດໃຫ້ເປັນລັດທີ່ຄຸ້ມຄອງດ້ວຍລະບຽບກົດໝາຍໃຫ້ສູງຂຶ້ນ ໂອກາດນີ້ທ່ານໄດ້ຮຽກຮ້ອງໃຫ້ວິທະຍາກອນຈົ່ງພ້ອມກັນຖ່າຍທອດຄວາມຮູ້ໃຫ້ສໍາມະນາກອນດ້ວຍຮູບແບບການບັນຍາຍເອກະສານ ທັງແລກປ່ຽນສົນທະນາດ້ວຍການຍົກພຶດຕິກໍາຕົວຈິງໃຫ້ຫຼາຍເພື່ອໃຫ້ສໍາມະນາກອນໄດ້ນໍາໃຊ້ບົດຮຽນເຂົ້າໃນການປະຕິບັດວຽກງານໃຫ້ດີຂຶ້ນ.

ຊຸດອົບຮົມຄັ້ງນີ້ມີສໍາມະນາກອນມາຈາກພະແນກການ-ກົມກອງອ້ອມຂ້າງແຂວງເຂົ້າຮ່ວມທັງໝົດ 48 ທ່ານ, ຍິງ 16 ທ່ານ, ໂດຍຈະຮຽນຮູ້ກົດໝາຍທັງໝົດ 32 ສະບັບ ລວມ 336 ໜ່ວຍກິດ, ນອກຈາກການຮຽນພາກທິດສະດີ ຈະມີການລົງທັດສະນະສຶກສາ ແລະຂຽນບົດເກັບກ່ຽວການຝຶກອົບຮົມຕື່ມອີກ.

ຂ່າວ: ອາພຸດເດດ ບຸບຜາ

ພາບ: ຈໍາປາ

ປະເພດຂ່າວ: