ເມືອງ ປາກແຊງ ເປີດຊຸດຝຶກອົບຮົມກົດໝາຍໄລຍະສັ້ນ 45 ວັນ ຊຸດທີ II ທີ່ບ້ານ ປາກເກງ

ໃນວັນທີ 18 ພະຈິກ 2020 ນີ້ ຢູ່ທີ່ຫ້ອງປະຊຸມຫ້ອງການບ້ານ ປາກເກງ ເມືອງ ປາກແຊງ ແຂວງ ຫຼວງພະບາງ ໄດ້ເປີດຊຸດຝຶກອົບຮົມກົດໝາຍໄລຍະສັ້ນ 45 ວັນ ຊຸດທີ II ຂຶ້ນ ໃຫ້ກຽດເປັນປະທານຂອງທ່ານ ທອງສິງ ໄຊຍະສຸກ ຮອງເລຂາພັກເມືອງ ຜູ້ຊີ້ນໍາຂົງເຂດພັກ-ພະນັກງານ, ມີຫົວໜ້າຫ້ອງການ, ຮອງຫົວໜ້າຫ້ອງການ, ແຂກຖືກເຊີນ ແລະ ສໍາມະນາກອນເຂົ້າຮ່ວມ.

ທ່ານ ສອນໄຊ ເພັດບັນດິດ ຮັກສາການຫົວໜ້າຫ້ອງການຍຸຕິທໍາເມືອງ ປາກແຊງ ໄດ້ລາຍງານໃນການກະກຽມການເປີດການຮຽນ-ການສອນກົດໝາຍໄລຍະສັ້ນ 45 ວັນ ຊຸດທີ II ປີ 2020 ປະກອບມີສໍາມະນາກອນເຂົ້າຝຶກອົບຮົມທັງໝົດ 51 ທ່ານ ຍິງ 9 ທ່ານ ທີ່ມາຈາກຫ້ອງການອ້ອມຂ້າງເມືອງ 10 ທ່ານ, ຍິງ 1 ທ່ານ ມາຈາກອົງການຈັດຕັ້ງບ້ານ 41 ທ່ານ ຍິງ 08 ທ່ານ ມີວິຊາຮຽນທັງໝົດ 34 ວິຊາ, 136 ຊົ່ວໂມງ, ແບ່ງອອກເປັນ 2 ກຸ່ມວິຊາຮຽນຄື: ພາກທິດສະດີການເມືອງ-ການປົກຄອງ ແລະ ພາກວິຊາກົດໝາຍ, ສ່ວນງົບປະມານແມ່ນໄດ້ມາຈາກກະຊວງຍຸຕິທໍາ ແລະ ທຶນສົມທົບຂອງສໍາມະນາກອນຈໍານວນໜຶ່ງ.

ທ່ານ ທອງສິງ ໄຊຍະສຸກ ໄດ້ຍົກໃຫ້ເຫັນຄວາມສໍາຄັນຕໍ່ການຝຶກອົບຮົມກົດໝາຍໄລຍະສັ້ນ 45 ວັນ ໃຫ້ບັນດາພະນັກງານຫຼັກແຫຼ່ງຂອງເມືອງ ແລະ ບັນດາອໍານາດການປົກຄອງບ້ານພາຍໃນກຸ່ມ ຫາດຮວາຍ ກໍເພື່ອເປັນການຍົກສູງສະຕິເຄົາລົບກົດໝາຍ ຕາມທິດການສ້າງລັດທີ່ປົກຄອງດ້ວຍກົດໝາຍ ນອກນັ້ນທ່ານກໍຍັງໄດ້ເນັ້ນໜັກໃຫ້ຄູ-ອາຈານໃຫ້ເອົາໃຈໃສ່ຂຶ້ນຫ້ອງສອນຕາມຕາຕະລາງທີ່ອະນຸກໍາມະການໄດ້ກໍານົດໄວ້, ຕັ້ງໜ້າຖ່າຍທອດຄວາມຮູ້ປະສົບການຂອງຕົນດ້ວຍການບັນຍາຍ, ອະທິບາຍແຕ່ລະບັນຫາ, ຖອດຖອນແລກປ່ຽນບົດຮຽນ, ສົນທະນາຈາກພຶດຕິກໍາຕົວຈິງກັບສໍາມະນາກອນ ແລະ ໃຫ້ໄດ້ຕາມຄາດໝາຍທີ່ວາງໄວ້, ນອກຈາກໄດ້ຮຽນພາກທິດສະດີແລ້ວສໍາມະນາກອນຍັງຈະໄດ້ມີການກວດກາແຕ່ລະວິຊາ ແລະ ຂຽນບົດເກັບກ່ຽວຂອງຕົນຕື່ມອີກ.

ຂ່າວ, ພາບ: ສອນໄຊ ເພັດບັນດິດ

ປະເພດຂ່າວ: