ກຳມະບານພະແນກຍຸຕິທຳແຂວງຫຼວງພະບາງໄດ້ນາມມະຍົດຂະບວນການແຂ່ງຂັນ 5 ເປັນເຈົ້າ ປະຈຳປີ 2019

ໃນຕອນບ່າຍຂອງວັນທີ 24 / 12/ 2020 ທີ່ຫ້ອງປະຊຸມຂອງພະແນກຍຸຕິທໍາແຂວງ ໄດ້ຈັດມີພິທີປະກາດນາມມະຍົດຂະບວນແຂ່ງຂັນ 5 ເປັນເຈົ້າ ຄັ້ງທີ່ I ປະຈໍາ 2019 ຂຶ້ນຢ່າງເປັນທາງການ, ເປັນປະທານໂດຍ ທ່ານ ມີໄຊ ໄຊເກີຢ່າຈົງຕົວ ກໍາມະການພັກແຂວງ ຫົວໜ້າພະແນກຍຸຕິທໍາແຂວງ ໃຫ້ກຽດເຂົ້າຮ່ວມໂດຍ ທ່ານ ສົມເພັດ ວັນນະກອນ ຮອງປະທານກໍາມະບານແຂວງ ແລະ ທ່ານ ບຸນທັນ ສົມຈິດວົງສາ ຫົວໜ້າຂະແໜງໂຄສະນາເຜີຍແຜ່ກົດໝາຍ ທັງເປັນຄະນະກໍາມະບານຮາກຖານພະແນກຍຸຕິທໍາ, ມີສະມາຊິກກໍາມະບານ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.

ທ່ານ ບຸນທັນ ສົມຈິດວົງສາ ກໍໄດ້ຂຶ້ນຜ່ານບົດປະເມີນ 5 ເປັນເຈົ້າຄັ້ງທີ່ I ປະຈໍາ 2019 ກໍາມະບານຮາກຖານພະແນກຍຸຕິທຳ ເປັນຮາກຖານເອກະລາດ ທີ່ຂຶ້ນກັບສະຫະພັນກໍາມະບານແຂວງໂດຍກົງ ແລະ ພາຍໃຕ້ການຊີ້ນໍາ-ນໍາພາຂອງຄະນະພັກພະແນກຍຸຕິທຳແຂວງ, ຊຶ່ງປະກອບມີ ສະມາຊິກກໍາມະບານທັງໝົດ 57 ສະຫາຍ ,ຍິງ 26 ສະຫາຍ, ໃນນັ້ນ ມີທະນາຍຄວາມ 5 ສະຫາຍ, ຍິງ 1 ສະຫາຍ; ຜ່ານມາກໍາມະບານຮາກຖານພະແນກຍຸຕິທຳແຂວງໄດ້ຕັ້ງໜ້າຊີ້ນໍາ-ນໍາພາເຄື່ອນໄຫວວຽກງານກໍາມະບານຕາມພາລະບົດບາດ, ສິດ ແລະ ໜ້າທີ່ຂອງຕົນຕາມການຊີ້ນໍາຂອງຄະນະພັກ ຕົ້ນຕໍແມ່ນສຸມໃສ່ການສ້າງຂະບວນການແຂ່ງຂັນ 5 ເປັນເຈົ້າ 2019 ເຫັນວ່າຄົບຕາມມາດຖານເງື່ອນໄຂ.

ໃນນັ້ນ ທ່ານ ສົມເພັດ ວັນນະກອນ ຮອງປະທານກໍາມະບານແຂວງ ກໍໄດ້ຂຶ້ນມອບໃບຢັ້ງຢືນຂໍ້ແຂ່ງຂັນ 5 ເປັນເຈົ້າຄັ້ງທີ່ I ປະຈໍາ 2019 ແລະ ໃບຍ້ອງຍໍຈາກສູນການສະຫະພັນກໍາມະບານລາວຈໍານວນ 17 ໃບ

ຈາກນັ້ນ ທ່ານ ສົມເພັດ ວັນນະກອນ ກໍໃຫ້ກຽດໂອ້ລົມ ກ່ອນອື່ນທ່ານກໍໄດ້ມີຄວາມຍ້ອງຍໍຊົນເຊີຍຜົນງານທີ່ຍາດມາໄດ້ ເຫັນວ່າສະມາຊິກກໍາມະບານມີແນວຄິດອຸ່ນອ່ຽງທຸ່ນທຽງເຊື່ອໝັ້ນຕໍ່ແນວທາງຂອງພັກມີຄວາມອົດທົນຜ່ານຜ່າຄວາມຫຍຸ້ງຍາກໃນການຈັດຕັ້ງປະຕິບັດວຽກງານຕາມການມອບໝາຍມີຜົນສໍາເລັດຫຼາຍດ້ານ ແລະ ທ່ານກໍ່ຍັງໄດ້ເນັ້ນໜັກໃນຫຼາຍບັນຫາຄື: 1. ຕ້ອງໄດ້ເພີ່ມທະວີ ແລະ ເອົາໃຈໃສ່ວຽກງານສຶກສາອົບການເມືອງແນວຄິດໃຫ້ສະມາຊິກກໍາມະບານເປັນປົກກະຕິ ແລະ ຢ່າງຕໍ່ເນື່ອງ, ເພື່ອເສີມຂະຫຍາຍນໍ້າໃຈຮັກຊາດຮັກລະບອບໃໝ່ ມີຄວາມສາມັກຄີເປັນຜຶນແຜ່ນ, ມີນໍ້າໃຈ, ມີສະຕິຕໍ່ການຈັດຕັ້ງ, ເຄົາລົບລະບຽບກົດໝາຍຢ່າງເຂັ້ມງວດ ແລະ ຈໍາແນກມິດສັດຕູຢ່າງຈະແຈ້ງ, 2. ຕ້ອງໄດ້ເພີ່ມທະວີ ໃນການຊີ້ນໍາ-ນໍາພາສະມາຊິກກໍາມະບານພາຍໃນຮາກຖານຂອງພວກເຮົາ, ໃຫ້ມີຄວາມໜັກເໜັ້ນ ແລະ ເຂັ້ມແຂງ ປັບປຸງແບບແຜນວີທີເຮັດວຽກ ແລະ ການປະຕິບັດວຽກງານຂອງອົງການຈັດຕັ້ງວຽກງານໃຫ້ສອດຄ່ອງ, ຖືກຕ້ອງຕາມລະບຽບກົດໝາຍຂອງສະຫະພັນກໍາມະບານວາງອອກ, 3. ຕ້ອງໄດ້ຕັດສິນໃຈຫັນເອົາວຽກງານກົດໝາຍ ແລະ ຍຸຕິທໍາລົງສູ່ຮາກຖານບ້ານ ແລະ ກຸ່ມບ້ານຢ່າງຖືກຕ້ອງຕາມທິດຊີ້ນໍາຂອງພັກ. 4. ຕ້ອງໄດ້ສຶບຕໍ່ຊຸກຍູ້ຂະບວນຍຸຕິທໍາໃຫ້ແຂງແຮງເລິກເຊິງ, ຊູ້ຊົນຈັດຕັ້ງປະຕິບັດໃຫ້ບັນລຸຄາດໝາຍທີ່ໄດ້ວາງໄວ້ຕາມແຜນການໃນຕໍ່ໜ້າ, ປັບປຸງຂະແໜງການຍຸຕິທໍາໃຫ້ມີກົງຈັກການຈັດຕັ້ງທີ່ເໝາະສົມກັບໜ້າທີ່ການເມືອງ, ມີແນວຄິດຄຸນສົມບັດສິນທໍາປະຕິວັດ, ມີຈັນຍະບັນ ແລະ ມີແບບແຜນວິທີເຮັດວຽກຈັດຕັ້ງປະຕິບັດໜ້າທີ່ການເມືອງຂອງຕົນ.

ຂຽນຂ່າວໂດຍ: ນາງມະໄລກອນ ສິນທ່າວ

ຖ່າຍພາບໂດຍ: ທ້າວ ຄຳເຜີຍ ແກ້ວປັນຍາຈິດ

ປະເພດຂ່າວ: