ເມືອງ ສິງ ເປີດຊຸດອົບຮົມກົດໝາຍ 45 ວັນ ໃຫ້ພະນັກງານຮາກຖານກຸ່ມບ້ານ

   ວັນທີ 7 ສິງຫາ 2020 ທີ່ຜ່ານມາຢູ່ທີ່ ສະໂມສອນກຸ່ມບ້ານ ຂວາງ ເມືອງ ສີງ ແຂວງ ຫຼວງນໍ້າທາ ໄດ້ເປີດຊຸດຝຶກອົບຮົມກົດໝາຍຂັ້ນພື້ນຖານລະບົບບໍາລຸງ 45 ວັນ ໃຫ້ພະນັກງານຮາກຖານກຸ່ມບ້ານ ພາຍໃນເມືອງ ສິງ ແຂວງ ຫຼວງນໍ້າທາ ຊຸດທີ II ປະຈໍາປີ 2020 ຂຶ້ນ ໂດຍການເປັນປະທານ ຂອງ ທ່ານ ສົມລິດ ພອນປະເສີດ ຮອງເລຂາພັກເມືອງ ຮອງເຈົ້າເມືອງ ເມືອງ ສິງ, ເຂົ້າຮ່ວມ ມີ ທ່ານ ເພັດສະຫວັນ ສີພົມມະຈັນ ຮອງຫົວໜ້າພະແນກຍຸຕິທໍາແຂວງ ຫຼວງນໍ້າທາ, ທ່ານ ສາມນວນ ໄຍກະເສີມ ຫົວໜ້າຫ້ອງການຍຸຕິທໍາເມືອງ ສິງ, ພະນັກງານຫ້ອງການຍຸຕິທໍາເມືອງ, ແຂກຖືກເຊີນ, ຄູຝືກ ແລະ ນັກຝຶກອົບຮົມເຂົ້າຮ່ວມທັງໝົດ 45 ທ່ານ, ຍິງ 9 ທ່ານ.
   ທ່ານ ສາມນວນ ໄຍກະເສີມ ຫົວໜ້າຫ້ອງການຍຸຕິທໍາເມືອງ ສິງ ກໍໄດ້ຂຶ້ນຜ່ານບົດລາຍງານ ກ່ຽວກັບວຽກງານເປີດຊຸດຝຶກອົບຮົມ. ການເປີດຊຸດຝຶກອົບຮົມຄັ້ງນີ້ ແມ່ນເພື່ອເຮັດໃຫ້ພະນັກງານກຸ່ມບ້ານ ແລະ ອົງການຈັດຕັ້ງບ້ານຂັ້ນເມືອງ ໄດ້ຍົກລະດັບຄວາມຮູ້ທາງດ້ານກົດໝາຍໃຫ້ເປັນລະບົບພື້ນຖານ, ສ້າງເງື່ອນໄຂໃຫ້ແກ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍໃຫ້ມີປະສິດທິພາບ ແລະ ປະສິດທິຜົນສູງ, ມີຄວາມສອດຄ່ອງ ກົມກຽວເປັນໄປຕາມລັດຖະທໍາມະນູນ ແລະ ກົດໝາຍ ພ້ອມກັນນັ້ນ ຍັງເປັນການຍົກສູງ, ເຊີດຊູບົດບາດຄວາມສາມາດ ໃນການນໍາພາຂອງຄະນະພັກທຸກຂັ້ນ ໃຫ້ສູງຂຶ້ນເທື່ອລະກ້າວ, ເປົ້າໝາຍຜູ້ເຂົ້າຮ່ວມຊຸດຝຶກອົບຮົມມີບັນດາຫົວໜ້າກຸ່ມບ້ານ, ພະນັກງານກຸ່ມບ້ານອ້ອມຂ້າງເມືອງ, ອົງການຈັດຕັ້ງມະຫາຊົນ ຊຶ່ງລວມທັງໝົດ 53 ທ່ານ, ຍິງ 8 ທ່ານ ປະກອບມີ 32 ວິຊາຮຽນ, ມີ 32 ກົດໝາຍ, 22,5 ໜ່ວຍກິດ ແລະ 360 ຊົ່ວໂມງ ໃຊ້ເວລາຮຽນທັງໝົດ 45 ວັນ ຈຶ່ງສໍາເລັດ.

      ໃນຕອນທ້າຍ ທ່ານ ຮອງເຈົ້າເມືອງ ເມືອງສິງ ກໍໄດ້ມີຄໍາເຫັນໂອ້ລົມ ຕໍ່ຄະນະຮັບຜິດຊອບ, ຄູອາຈານຜູ້ສິດສອນ ຕະຫຼອດຮອດນັກຝຶກອົບຮົມ ຈົ່ງເອົາໃຈໃສ່ ຍົກສູງຄວາມຮັບຜິດຊອບຂອງຕົນ ໃຫ້ຕັ້ງໜ້າຈັດຕັ້ງຝຶກຝົນຫຼໍ່ຫຼອມການຮຽນ-ການສອນ ໃນບັ້ນຝຶກອົບຮົມຄັ້ງນີ້ໃຫ້ບັນລຸຈຸດປະສົງ ແລະ ຮັບປະກັນຄຸນນະພາບຕາມລະດັບຄາດໝາຍ.

ພາບ-ຂ່າວ: ຈາກພະແນກຍຸຕິທໍາແຂວງ ຫຼວງນໍ້າທາ