ສ້າງຂະບວນການແຂ່ງຂັນກິລາ ສະເຫຼີມສະຫຼອງ ວັນລັດຖະທຳມະນູນ ທີ່ ແຂວງ ຫຼວງນຳ້ທາ

ໃນຕອນເຊົ້າວັນ 13 ສິງຫາ 2020 ຢູ່ທີ່ເດີ່ນເຕະບານ AJ ແຂວງ ຫຼວງນໍ້າທາ ພະແນກຍຸຕິທໍາແຂວງ, ສານປະຊາຊົນ, ໄອຍະການປະຊາຊົນ ແລະ ສະພາປະຊາຊົນແຂວງ ໄດ້ຈັດການແຂ່ງຂັນກິລາບານເຕະຊາຍຂຶ້ນ ເພື່ອສະເຫຼີມສະຫຼອງ ວັນລັດຖະທໍາມະນູນແຫ່ງ ສປປ ລາວ ຄົບຮອບ 29 ປີ, ໂດຍເປັນປະທານຂອງທ່ານ ທອງແດງ ສິດທິສົນ ປະທານສານປະຊາຊົນແຂວງ ຫຼວງນ້ຳທາ, ມີຫົວໜ້າ, ຮອງຫົວໜ້າ ແລະ ພະນັກງານ-ລັດຖະກອນພາຍໃນ 4 ພາກສ່ວນ ເຂົ້າຮ່ວມ.
ຈຸດປະສົງ ເພື່ອຮັດແໜ້ນຄວາມສາມັກຄີ ລະຫວ່າງອ້າຍ,ເອື້ອຍ,ນ້ອງພະນັກງານ ພາຍໃນ ໃຫ້ມີຄວາມໜັກແໜ້ນ ແລະ ມີບັນຍາກາດຟົດຟື້ນ, ມ່ວນຊື່ນ ການແຂ່ງຂັນໄດ້ແບ່ງອອກເປັນ 4 ທີມ ຄື: ພະແນກຍຸຕິທໍາແຂວງ, ສານປະຊາຊົນ, ໄອຍະການປະຊາຊົນ ແລະ ສະພາປະຊາຊົນແຂວງ ໂດຍໃຊ້ເວລາການແຂ່ງຂັນ 1 ວັນ.


ຜົນການແຂ່ງຂັນ ອັນດັບ 1 ແມ່ນ ພະແນກຍຸຕິທໍາແຂວງ, ອັນດັບ 2 ສານປະຊາຊົນ, ອັນດັບ 3 ໄອຍະການປະຊາຊົນ ແລະ ອັນດັບ 4 ສະພາປະຊາຊົນແຂວງ.
ຊຶ່ງຕະຫຼອດໄລຍະການແຂ່ງຂັນກິລາ ແມ່ນເຕັມໄປດ້ວຍຄວາມສາມັກຄີ ໄມຕີຈິດມິດຕະພາບ ແລະ ຄວາມເບີກບານມ່ວນຊື່ນ.

ຖ່າຍພາບ-ຂຽນຂ່າວ: ຄໍາຮຸ່ງ ກຸໂພຄໍາ.