ພິທີປິດຊຸດຝຶກອົບຮົມກົດໝາຍ 45 ວັນ ຊຸດທີ 1 ປະຈຳປີ 2020

ວັນທີ 22 ກໍລະກົດ 2020 ຫ້ອງການຍຸຕິທຳເມືອງ ຊຳເໜືອໄດ້ຈັດພິທີປີດຊຸດຝຶກອົບຮົມກົດໝາຍໄລຍະສັ້ນ 45 ວັນ ໃຫ້ເລຂາພັກບ້ານ ແລະ ອໍານາດການປົກຄອງບ້ານພາຍໃນເຂດຫົວຊຽງ ຊຸດທີ 1 ປະຈຳປີ 2020 ຂຶ້ນ ຢູ່ທີ່ຫ້ອງປະຊຸມ ຫ້ອງການຕຳຫຼວດກຸ່ມບ້ານຫົວຊຽງ ໂດຍການເປັນປະທານຂອງ ທ່ານ ທອນສຸກ ເພັດວິຍານ ຄະນະປະຈຳພັກເມືອງ ຫົວໜ້າຄະນະຈັດຕັ້ງເມືອງ ຊຳເໜືອ, ເປັນກຽດເຂົ້າຮ່ວມຂອງ ທ່ານ ນາງ ພູເຮືອງ ພົມມະວັນ ຮອງຫົວໜ້າພະແນກຍຸຕິທຳແຂວງ ຫົວພັນ. ມີຄະນະຮັບຜິດຊອບຊຸດຝຶກອົບຮົມ, ຄູອາຈານ, ຫົວໜ້າຫ້ອງການ, ຮອງຫົວໜ້າຫ້ອງການອ້ອມຂ້າງເມືອງ, ເລຂາພັກບ້ານ, ນາຍບ້ານ, ຮອງນາຍບ້ານ ແລະ ນັກຝຶກອົບຮົມເຂົ້າຮ່ວມຢ່າງພ້ອມພຽງ.

ທ່ານ ບຸນທັນ ແສນບຸນຊູ ຫົວໜ້າຫ້ອງການຍຸຕິທຳເມືອງ ຊຳເໜືອ ກໍໄດ້ຂຶ້ນຜ່ານສະຫຼຸບລາຍງານສະພາບຂອງການຮຽນ-ການສອນໃນໄລຍະສັ້ນ 45 ວັນ, ຊຶ່ງໄດ້ຍົກໃຫ້ເຫັນດ້ານດີ, ຜົນງານ, ດ້ານອ່ອນຂໍ້ຄົງຄ້າງທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ. ຊຸດຝຶກອົບຮົມໃນຊຸດນີ້ປະກອບມີຄູອາຈານສອນ 18 ທ່ານ, ຍິງ 2 ທ່ານ, ມີນັກຝຶກອົບຮົມເຂົ້້າຮ່ວມທັງໝົດ 27 ທ່ານ, ຍິງ 1 ທ່ານ, ສຳລັບຫຼັກສູດການຮຽນ-ການສອນ ມີ 34 ວິຊາ, 22 ໜ່ວຍກິດ, 360 ຊົ່ວໂມງ. ຜ່ານການຄົ້ນຄວ້າຮໍ່າຮຽນ ເຮັດໃຫ້ນັກຝຶກອົບຮົມໄດ້ຮັບຮູ້ ແລະ ເຂົ້າໃຈຕໍ່ກັບບັນດາເນື້ອໃນກົດໝາຍເປັນຢ່າງດີ ແລະ ສາມາດຄັດເລືອກໄດ້ຜູ້ທີ່ຮຽນດີຮຽນເກັ່ງປະເພດດີເດັ່ນ ມີ: 4 ທ່ານ, ປະເພດດີ 23 ທ່ານ, ຍິງ 1 ທ່ານ. ຈາກນັ້ນ, ທ່ານ ນາງ ພູເຮືອງ ພົມມະວັນ ຮອງຫົວໜ້າພະແນກຍຸຕິທຳແຂວງ ກໍໃຫ້ກຽດມອບໃບຢັ້ງຢືນໃຫ້ແກ່ນັກຝຶກອົບຮົມ ທີ່ໄດ້ສຳເລັດການຝຶກອົບຮົມໃນຄັ້ງນີ້.

ຕອນທ້າຍ ທ່ານ ທອນສຸກ ເພັດວິຍານ ຄະນະປະຈຳພັກເມືອງ, ຫົວໜ້າຄະນະຈັດຕັ້ງເມືອງ ກໍໃຫ້ກຽດໂອລົມ ກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບຄະນະຮັບຜິດຊອບ, ຄູອາຈານທີ່ໄດ້ເອົາໃຈໃສ່ໃນການຊີ້ນຳ - ນຳພາ ຄົ້ນຄວ້າ, ສິດສອນ ທັງພາກທິດສະດີ ແລະ ພາກປະຕິບັດຕົວຈິງ, ສຳລັບນັກຝຶກອົບຮົມກໍໄດ້ເອົາໃຈໃສ່ໃນການສຶກສາຄົ້ນຄວ້າຮ່ຳຮຽນ ໂດຍການນຳເອົາເຫດການທີ່ເກີດຂຶ້ນມາສົມທຽບກັບຕົວຈິງ ຕະຫຼອດໄລຍະ 45 ວັນ ຈົນໄດ້ຮັບຜົນສຳເລັດຢ່າງຈົບງາມ. ພາຍຫຼັງທີ່ສຳເລັດການຝຶກອົບຮົມໃນຄັ້ງນີ້ແລ້ວ ກໍກັບຄືນສູ່ບ້ານຂອງຕົນ ແລະ ຈົ່ງນໍາເອົາບົດຮຽນ, ຄວາມຮູ້, ຄວາມສາມາດ ດ້ານກົດໝາຍຕ່າງໆໄປຈັດຕັ້ງປະຕິບັດ ພ້ອມທັງຜັນຂະຫຍາຍເຂົ້າໃນໜ້າທີ່ວຽກງານຢູ່ພາຍໃນບ້ານຂອງຕົນໃຫ້ນັບມື້ດີຂຶ້ນເທ່ື່ອລະກ້າວ.

ຂຽນຂ່າວ ແລະ ຖ່າຍພາບ: ພວງເພັດ ເພັດຍາວົງ