ພະແນກຍຸຕິທໍາສົມທົບກັບອົງການປົກຄອງເມືອງ ຊຳເໜືອ ແລະ ເມືອງ ວຽງໄຊ ລົງໂຄສະນາເຜີຍແຜ່ກົດໝາຍຢູ່ 2 ເມືອງ

ວັນທີ 15 ຫາ 16 ກໍລະກົດ 2020 ທີ່ຜ່ານມາ ພະແນກຍຸຕິທໍາແຂວງ ຫົວພັນໄດ້ສົມທົບກັບອົງການປົກຄອງເມືອງ ຊຳເໜືອ ແລະ ເມືອງ ວຽງໄຊ ແຂວງ ຫົວພັນ ຈັດພິທີໂຄສະນາເຜີຍແຜ່ກົດໝາຍຂຶ້ນ ຢູ່ທີ່ຫ້ອງວ່າການປົກຄອງເມືອງ ຊໍາເໜືອ ແລະ ເມືອງ ວຽງໄຊ ໂດຍພາຍໃຕ້ການເປັນປະທານຮ່ວມຂອງ ທ່ານ ສົມພອນ ອິນຄະວິໄລ ຫົວໜ້າພະແນກຍຸຕິທໍາແຂວງ, ທ່ານ ພຸດພັນ ແກ້ວວົງໄຊ ກໍາມະການພັກແຂວງ ເລຂາພັກເມືອງ ເຈົ້າເມືອງ ຊໍາເໜືອ ແລະ ທ່ານ ພອນສຸກ ອິນທະວົງ ກໍາມະການພັກແຂວງ ເລຂາພັກເມືອງ ເຈົ້າເມືອງ ວຽງໄຊ ມີຄະນະປະຈໍາພັກເມືອງ, ຫົວໜ້າ, ຮອງຫົວໜ້າຫ້ອງການ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ, ພະນັກງານ-ລັດຖະກອນອ້ອມຂ້າງເມືອງ, ອໍານວຍການໂຮງຮຽນມໍຕົ້ນ, ມໍປາຍ ແລະ ຄະນະພັກ ອົງການປົກຄອງບ້ານທຸກບ້ານຂອງເທດສະບານເມືອງເຂົ້າຮ່ວມ.

ເພື່ອແນໃສ່ເຮັດໃຫ້ພະນັກງານ-ລັດຖະກອນ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈຕໍ່ ແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ ທີ່ວາງອອກແຕ່ລະໄລຍະ, ເຮັດໃຫ້ເຂົາເຈົ້າຮູ້ນໍາໃຊ້ກົດໝາຍເຂົ້າໃນຊີວິດປະຈໍາວັນຢ່າງຖືກຕ້ອງ, ດໍາລົງຊີວິດດ້ວຍຄວາມປອດໃສຂາວສະອາດ ທັງເປັນການຕ້ານ ແລະ ສະກັດກັ້ນປາກົດການຍໍ້ທໍ້ຕ່າງໆ ຢູ່ໃນສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ. ກົດໝາຍທີ່ນໍາມາເຜີຍແຜ່ໃນຄັ້ງນີ້ ມີ ບາງມາດຕາຂອງປະມວນກົດໝາຍອາຍາ, ປະມວນກົດໝາຍແພ່ງ. ຊຶ່ງໄດ້ຄັດຈ້ອນເອົາມາດຕາທີ່ຕິດພັນກັບການດຳລົງຊີວິດປະຈຳວັນຂອງປະຊາຊົນ ແລະ ຕິດພັນກັບການປະຕິບັດໜ້າທີ່ວຽກງານຂອງພະນັກງານ-ລັດ ຖະກອນ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ.

ໃນຕອນທ້າຍ ທ່ານ ສົມພອນ ອິນຄະວິໄລ ຫົວໜ້າພະແນກຍຸຕິທໍາແຂວງ ກໍໄດ້ມີຄໍາເຫັນໂອ້ລົມຕໍ່ຜູ້ເຂົ້າຮ່ວມຊຶ່ງທ່ານໄດ້ຮຽກຮ້ອງ ແລະ ເນັ້ນໜັກໃຫ້ພະນັກງານ-ລັດຖະກອນ ຈົ່ງເພີ່ມທະວີຄວາມເອົາໃຈໃສ່ໃນການນໍາເອົາບັນດາແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ ໄປໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຂອງຕົນ, ເອົາໃຈໃສ່ປະຕິບັດວຽກງານທີ່ຢູ່ໃນຄວາມຮັບຜິດຊອບຂອງຕົນ, ເປັນເຈົ້າການໃນການຄົ້ນຄວ້າ, ສ້າງ, ປັບປຸງ, ກົດໝາຍໃຫ້ຖືກຕ້ອງສອດຄ່ອງ ພ້ອມທັງເປັນເຈົ້າການເຄົາລົບ ແລະ ປະຕິບັດກົດໝາຍຢ່າງເຂັ້ມງວດ, ຮຽກຮ້ອງໃຫ້ບັນດາຂະແໜງການທີ່ມີກົດໝາຍຢູ່ໃນຄວາມຮັບຜິດຊອບຂອງຕົນ ຕ້ອງນໍາເອົາກົດໝາຍລົງສູ່ຮາກຖານບ້ານໃຫ້ທົ່ວເຖິງ ເພື່ອຫັນໄປສູ່ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍເທື່ອລະກ້າວ.

ຂຽນຂ່າວ-ຖ່າຍພາບ ໂດຍ: ພວງເພັດ ເພັດຍາວົງ