ພະແນກຍຸຕິທຳແຂວງ ສະຫວັນນະເຂດ ເປີດຮຽນຫຼັກສູດກົດໝາຍຂັ້ນພື້ນຖານ ລະບົບບຳລຸງ 45 ວັນ ຊຸດທີ VIII ປີ 2020

     ໃນວັນທີ 18 ກັນຍາ 2020 ທີ່ຜ່ານມາຢູ່ທີ່ ຫ້ອງປະຊຸມ ພະແນກຍຸຕິທຳແຂວງ ສະຫວັນນະເຂດ ໄດ້ເປີດຊຸດຝຶກອົບຮົມກົດໝາຍຂັ້ນພື້ນຖານ ລະບົບບໍາລຸງ 45 ວັນ ໃຫ້ພະນັກງານຫຼັກແຫຼ່ງ, ສືບທອດຂັ້ນເມືອງ, ນະຄອນ ແລະ ແຂວງ  ຊຸດທີ VIII ປະຈໍາປີ 2020 ຂຶ້ນ ໂດຍການເປັນປະທານ ຂອງ ທ່ານ ວຽງທະວີສອນ ເກດທະຈັນ ສະມາຊິກສະພາແຫ່ງຊາດເຂດເລືອກຕັ້ງທີ 13, ຄະນະປະຈຳພັກແຂວງ ສະຫວັນນະເຂດ, ເຂົ້າຮ່ວມພິທີ ມີຄະນະພັກ, ຄະນະພະແນກຍຸຕິທຳ, ບັນດາແຂກຈາກພະແນກການອ້ອມຂ້າງ, ຄູ-ອາຈານ ແລະ ນັກສຳມະນາກອນເຂົ້າຮ່ວມທັງໝົດ 59 ທ່ານ, ຍິງ 13 ທ່ານ.

     ທ່ານ ສີສະຫວາດ ເພັງທະລັງສີ ເລຂາໜ່ວຍພັກ, ຫົວໜ້າພະແນກຍຸຕິທຳແຂວງ ກໍໄດ້ຂຶ້ນຜ່ານບົດລາຍງານ ກ່ຽວກັບວຽກງານເປີດຊຸດຝຶກອົບຮົມ. ການເປີດຊຸດຝຶກອົບຮົມຄັ້ງນີ້ ແມ່ນເພື່ອເຮັດໃຫ້ພະນັກງານຫຼັກແຫຼ່ງຂັ້ນເມືອງ, ນະຄອນ ແລະ ຂັ້ນແຂວງ ໄດ້ຍົກລະດັບຄວາມຮູ້ທາງດ້ານກົດໝາຍໃຫ້ເປັນລະບົບພື້ນຖານ, ສ້າງເງື່ອນໄຂໃຫ້ແກ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍໃຫ້ມີປະສິດທິພາບ ແລະ ປະສິດທິຜົນສູງ, ມີຄວາມສອດຄ່ອງ ກົມກຽວເປັນໄປຕາມລັດຖະທໍາມະນູນ ແລະ ກົດໝາຍ ພ້ອມກັນນັ້ນ ຍັງເປັນການຍົກສູງ, ເຊີດຊູບົດບາດຄວາມສາມາດ ໃນການນໍາພາຂອງຄະນະພັກທຸກຂັ້ນ ໃຫ້ສູງຂຶ້ນເທື່ອລະກ້າວ, ຊຶ່ງມີຜູ້ເຂົ້າຮ່ວມຊຸດຝຶກອົບຮົມມີ ພະນັກງານຈາກຫ້ອງການອ້ອມຂ້າງເມືອງ, ນະຄອນ ແລະ ພະແນກການອ້ອມຂ້າງແຂວງ ຊຶ່ງລວມທັງໝົດ 40 ທ່ານ, ຍິງ 10 ທ່ານ.

     ໃນຕອນທ້າຍ ທ່ານ ວຽງທະວີສອນ ເກດພະຈັນ ຄະນະປະຈຳພັກແຂວງ ກໍໄດ້ມີຄໍາເຫັນໂອ້ລົມ ຕໍ່ຄະນະຮັບຜິດຊອບ, ຄູ-ອາຈານຜູ້ສິດສອນ ຕະຫຼອດຮອດນັກຝຶກອົບຮົມ ຈົ່ງເອົາໃຈໃສ່ ຍົກສູງຄວາມຮັບຜິດຊອບຂອງຕົນ ໃຫ້ຕັ້ງໜ້າຈັດຕັ້ງຝຶກຝົນຫຼໍ່ຫຼອມການຮຽນ-ການສອນ ໃນບັ້ນຝຶກອົບຮົມຄັ້ງນີ້ໃຫ້ບັນລຸຈຸດປະສົງ ແລະ ຮັບປະກັນຄຸນນະພາບຕາມລະດັບຄາດໝາຍ.

 

                                                                                                                                                                                                                                                                                       ຂ່າວ: ພູເພັດ ໄຊຍະວົງ, ພາບ: ວຽງສະກວັນ

 

ປະເພດຂ່າວ: