ກອງປະຊຸຸມໃຫຍ່ຄັ້ງທີ VII ຂອງ ໜ່ວຍພັກຮາກຖານພະແນກຍຸຕິທຳແຂວງ ສະຫວັນນະເຂດ

     ວັນທີ 31 ກໍລະກົດ 2020 ທີ່ີຜ່ານມາ ໜ່ວຍພັກຮາກຖານພະແນກຍຸຕິທຳແຂວງ ໄດ້ເປີດກອງປະຊຸມໃຫຍ່ຄັ້ງທີ VII ຂອງໜ່ວຍຂຶ້ນທີ່ຫ້ອງປະຊຸມພະແນກຍຸຕິທຳ ໂດຍການເຂົ້າຮ່ວມເປັນປະທານ ຂອງສະຫາຍ ທອງທ່ຽງ ສີດາວົງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ມີຜູ້ແທນເຂົ້າຮ່ວມທັງໝົດ 41 ສະຫາຍ, ຍິງ 12 ສະຫາຍ, ໃນນີ້ມີແຂກຈາກພະແນກການອ້ອມຂ້າງ 09 ສະຫາຍ, ສະມາຊິກພັກສົມບູນ 29 ສະຫາຍ, ຍິງ 08 ສະຫາຍ, ສຳຮອງ 04 ສະຫາຍ, ຍິງ 02 ສະຫາຍ, ໃນນັ້ນມີສະມາຊິກພັກອາວຸໂສບຳນານ 04 ສະຫາຍ, ຍິງ 01 ສະຫາຍ.

     ໃນກອງປະຊຸມ ສະຫາຍ ສີສະຫວາດ ເພັງທະລັງສີ ເລຂາໜ່ວຍພັກ ຫົວໜ້າພະແນກຍຸຕິທຳແຂວງ ໄດ້ຂຶ້ນຜ່ານບົດລາຍງານການເມືອງທັງສອງພາກ ຊິ່ງໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງໃນການຊີ້ນຳ-ນຳພາໃນໄລຍະ 5 ປີຜ່ານມາ ພ້ອມທັງວາງທິດທາງແຜນການໃນ 5 ປີຕໍ່ໜ້າ (2020-2025) ເພື່ອເຮັດໃຫ້ວຽກງານຍຸຕິທຳມີບາດກ້າວຂະຫຍາຍຕົວຂຶ້ນຢ່າງຕໍ່ເນື່ອງ. ໃນກອງປະຊຸມສະມາຊິກພັກສົມບູນ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະພັກຊຸດໃໝ່ ຊິ່ງມີຜູ້ສະໝັກ 05 ສະຫາຍ, ຍິງ 01 ສະຫາຍ, ເລືອກເອົາ 03 ສະຫາຍ, ກອງປະຊຸມຄັ້ງປະຖົມມະລຶກເຫັນດີເລືອກເອົາ ສະຫາຍ ສີສະຫວາດ ເພັງທະລັງສີ ເປັນເລຂາໜ່ວນພັກ, ສະຫາຍ ມະນີວັນ ແກ້ວພິກຸນ ເປັນຮອງເລຂາໜ່ວຍພັກ, ສະຫາຍ ຄຳສິງ ເພັດໄຊຍະພອນ ເປັນກຳມະການ ທັງເປັນປະທານກວດກາ, ເລືອກເອົາຜູ້ແທນສົມບູນ-ສຳຮອງໄປຮ່ວມກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ ມີ 03 ສະຫາຍ ສົມບູນ 02 ສະຫາຍ ແລະ ສຳຮອງ 01 ສະຫາຍ.

    ຕອນທ້າຍກອງປະຊຸມ ສະຫາຍ ທອງທ່ຽງ ສີດາວົງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ກໍໄດ້ໂອ້ລົມຕໍ່ກອງປະຊຸມ ຊິ່ງກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກຊຸດເກົ່າທີ່ໄດ້ຊີ້ນຳ-ນຳພາ ພະນັກງານສະມາຊິກພັກ ປະຕິບັດໜ້າທີ່ການເມືອງຂອງຕົນທີ່ໄດ້ຮັບມອບໝາຍ ແລະ ຍາດໄດ້ຜົນສຳເລັດຫຼາຍດ້ານ ພ້ອມນີ້, ສະຫາຍຍັງໄດ້ໃຫ້ທິດຊີ້ນຳໃນການແກ້ໄຂຈຸດອ່ອນ-ຂໍ້ຄົງຄ້າງ, ເຊິ່ງໄດ້ຮຽກຮ້ອງໃຫ້ຄະນະພັກຊຸດໃໝ່ຈະຕ້ອງໄດ້ສືບຕໍ່ປັບປູງ ແລະ ແກ້ໄຂ ຄະນະພັກຕ້ອງໄດ້ເອົາໃຈໃສ່ຊີ້ນຳວຽກງານວິຊາສະເພາະໃນແຕ່ລະດ້ານຢ່າງລະອຽດ ໂດຍສະເພາະວຽກງານຍຸຕິທຳຮາກຖານ, ການສ້າງບ້ານແບບຢ່າງປະຕິບັດກົດໝາຍ ແລະ ວຽກງານໂຄສະນາເຜີຍແຜ່ກົດໝາຍຕ້ອງເຮັດໃຫ້ໄດ້ຢ່າງທົ່ວເຖິງ ແລະ ພ້ອມກັນຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VII ຂອງໜ່ວຍພັກໃຫ້ມີຜົນສຳເລັດ, ກໍ່ສ້າງໜ່ວຍພັກໃຫ້ກາຍເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ.

 

 

                                                                                                                                                                                                                                                                                                   ພາບ: ວຽງສະຫວັນ, ຂ່າວ ພູເພັດ

ປະເພດຂ່າວ: