ກອງປະຊຸມ ເປີດບັ້ນດຳເນີນຊີວິດການເມືອງ ທ້າຍສະໄໝ ຂອງໜ່ວຍພັກຮາກຖານພະແນກຍຸຕິທຳແຂວງ ສະຫວັນນະເຂດ

     ໃນຕອນເຊົ້າ ວັນທີ 30 ມິຖຸນາ 2020 ຜ່ານມາ ຢູ່ທີ່ຫ້ອງປະຊຸມພະແນກຍຸຕິທຳແຂວງໄດ້ຈັດກອງປະຊຸມເປີດບັ້ນດຳເນີນຊິວິດການເມືອງຂຶ້ນໂດຍການເປັນປະທານ ຂອງ ສະຫາຍ ນາງ ບຸນເຍື້ອນ ທິດພຸດທະວົງ ຄະນະປະຈຳພັກແຂວງ ປະທານກວດກາພັກ-ລັດແຂວງ, ມີສະຫາຍ ລຳທອງ ຂອບສີລາວົງ ຄະນະປະຈຳພັກແຂວງ ຮອງປະທານກວດກາພັກ-ລັດແຂວງ, ສະຫາຍ ບົວສອນ ມະຫາວົງ ຮອງຄະນະຈັດຕັ້ງແຂວງ, ສະຫາຍ ນາງ ຫົງຄຳ ໄຊຍະຄົມ ຮອງຄະນະໂຄສະນາອົບຮົມແຂວງ ແລະ ບັນດາສະຫາຍສະມາຊິກພັກພາຍໃນໜ່ວຍພັກພະແນກຍຸຕິທຳແຂວງເຂົ້າຮ່ວມ ຈຳນວນ 32 ສະຫາຍ, ຍິງ 10 ສະຫາຍ, ສະມາຊິກພັກບຳນານ 03 ສະຫາຍ, ຍິງ 01 ສະຫາຍ.

     ຈຸດປະສົງຂອງກອງປະຊຸມ ເພື່ອເປັນການກະກຽມໃສ່ກອງປະຊຸມໃຫຍ່ຄັ້ງທີ 7 ຂອງໜ່ວຍພັກຮາກຖານພະແນກຍຸຕິທຳ, ໃນກອງປະຊຸມ ສະຫາຍ ສີສະຫວາດ ເພັງທະລັງສີ ເລຂາໜ່ວຍພັກຮາກຖານ ຫົວໜ້າພະແນກຍຸຕິທຳແຂວງ ໄດ້ຜ່ານບົດລາຍງານການຊີ້ນຳ-ນຳພາລວມໃນໄລຍະກອງປະຊຸມໃຫຍ່ຜ່ານມາໂດຍສັງເຂບ, ກອງປະຊຸມເປີດບັ້ນດຳເນີນຊີວິດການເມືອງຄັ້ງນີ້ແມ່ນໄດ້ຮຽນຮູ້-ເຊື່ອມຊຶມບັນດາເນື້ອໃນຂອງເອກະສານ 4 ບົດຄື: 1) ຍົກສູງຄວາມສາມາດນຳພາ ແລະ ຄວາມເປັນແບບຢ່າງນຳໜ້າຂອງພັກ, 2) ເສີມຂະຫຍາຍມູນເຊື້ອ ແລະ ຄວາມສາມັກຄີພາຍໃນພັກ, 3) ຕັ້ງໜ້າຝຶກຝົນຄຸນທາດການເມືອງ ແລະ ຄຸນສົມບັນສິນທຳປະຕິວັດ, 4) ບັນດາຂໍ້ຫ້າມຂອງສະມາຊິກພັກ ແລະ ມາດຖານຂອງພະນັກງານນຳພາ-ຄຸ້ມຄອງ, ໃນກອງປະຊຸມບັນດາສະຫາຍສະມາຊິກພັກ ໄດ້ຜ່ານບົດສຳຫຼວດຕົນເອງ ພ້ອມທັງມີການສຳຫຼວດກວດກາຕຳນິສົ່ງຂ່າວເຊິ່ງກັນ ແລະ ກັນຢ່າງມີລັກສະນະສ້າງສັນ, ມີການຕີລາຄາຈັດແບ່ງປະເພດຂອງຕົນເອງ ແລະ ຈັດແບ່ງປະເພດໃຫ້ແຕ່ລະສະຫາຍ, ຈາກນັ້ນກໍ່ໄດ້ດຳເນີນການທາບທາມເອົາບຸກຄະລາກອນເຂົ້າໃສ່ໃນຄະນະພັກຊຸດໃໝ່,

     ໃນຕອນທ້າຍ ຂອງກອງປະຊຸມ ສະຫາຍ ນາງ ບຸນເຍື້ອນ ທິດພຸດທະວົງ ຄະນະປະຈຳພັກແຂວງ ປະທານກວດກາພັກ-ລັດແຂວງ ກໍ່ໄດ້ໃຫ້ກຽດມີຄຳເຫັນໂອ້ລົມຕໍ່ກອງປະຊູມ ໂດຍທ່ານໄດ້ເນັ້ນໃຫ້ບັນດາສະຫາຍສະມາຊິກພັກທຸກສະຫາຍ ຕ້ອງອອກແຮງຄົ້ນຄວ້າຮຳ່ຮຽນທິດສະດີລັດທິມາກ-ເລນິນ ແນວຄິດໄກສອນພົມວິຫານ, ເພີ່ມທະວີເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ຖັນແຖວພະນັກງານ ພ້ອມສືບຕໍ່ຝຶກຝົນຫຼໍ່ຫຼອມຕົນເອງໃຫ້ເປັນຜູ້ທີ່ມີຄຸນທາດການເມືອງ-ຄຸນສົມບັດສິນທຳປະຕິວັດ, ສືບຕໍ່ຈັດຕັ້ງວຽກງານວິຊາສະເພາະຕາມພາລະບົດບາດຂອງໃຜລາວກຳໄດ້ເນື້ອໃນຂອງບັນດາກົດໝາຍ ພ້ອມທັງກະກຽມເອົາເນື້ອໃນຜົນງານເຂົ້າໃສ່ບົດລາຍງານການເມືອງເພື່ອເປີດກອງປະຊຸມໃຫຍ່ຄັ້ງທີ 7 ຂອງໜ່ວຍພັກຮາກຖານພະແນກຍຸຕິທຳແຂວງໃຫ້ໄດ້ຮັບຜົນສຳເລັດຢ່າງດີ, ກອງປະຊຸມດັ່ງກ່າວ ໄດ້ຈັດຂຶ້ນເປັນເວລາ 02 ວັນ ເຊິ່ງໄດ້ສຳເລັດລົງໃນວັນທີ 01 ກໍລະກົດ 2020.

ປະເພດຂ່າວ: