ພິທີມອບ-ຮັບ ນັກສຶກສາ ປີ 3 ລະບົບຊັ້ນສູງຈາກສະຖາບັນຍຸຕິທຳແຫ່ງຊາດ ທີ່ລົງຝຶກງານຢູ່ແຂວງ ວຽງຈັນ ໃນປີ 2020.

   ໃນຕອນເຊົ້າຂອງວັນທີ 5 ມັງກອນ 2020 ທີ່ຜ່ານມານີ້ຢູ່ທີ່ຫ້ອງປະຊຸມຂອງພະແນກຍຸຕິທຳແຂວງ ວຽງຈັນ ໄດ້ຈັດ​ຕັ້ງ​ພິທີ​ມອບ​ຮັບ​ນັກ​ສຶກສາ​ຈາກ​ສະ​ຖາ​ບັນ​ຍຸຕິ​ທຳ​ແຫ່ງ​ຊາດ​ທີ່​ລົງ​ຝຶກ​ງານ​ຢູ່​ແຂວງ​ວຽງ​ຈັນ ໃຫ້ກຽດເປັນປະທານຮ່ວມໂດຍ ທ່ານ ສີສະ​ຫວາດ ​ແສງ​ພະຈັນ ຫົວໜ້າພະແນກຍຸຕິ​ທຳ​ແຂວງ ​ວຽງ​ຈັນ ​ໂດຍ​ການ​ເປັນ​ປະທານ​ຮ່ວມ​ຂອງ​ ທ່ານ ​ໄກ​ທິບ​ພະຈັນ​ ພວງ​ພະຈັນ ຮອງ​ຫົວໜ້າສະ​ຖາ​ບັນ​ຍຸຕິ​ທຳ​ແຫ່ງ​ຊາດ ​ໂດຍ​ມີພະນັກງານ, ຄູ-​ອາຈານ​ຈາກ​ສະ​ຖາ​ບັນ​ຍຸຕິ​ທຳແຫ່ງຊາດ, ຫົວໜ້າ​ຂະ​ແໜງ, ຮອງ​ຂະແໜງ​ທີ່​ກ່ຽວຂ້ອງ​ພາຍ​ໃນພະແນກຍຸຕິທຳແຂວງ, ພ້ອມດ້ວຍພະນັກງານວິຊາ​ການ ​ແລະ ນັກສຶກສາ​ເຂົ້າ​ຮ່ວມ​ຢ່າງ​ພ້ອມພຽງ.

   ​ໃນ​ພິທີ​ດັ່ງກ່າວ​ ທ່ານ ​ໄກ​ທິບ​ພະຈັນ​ ພວງ​ພະຈັນ​ ຮອງ​ຫົວໜ້າສະ​ຖາ​ບັນ​ຍຸຕິ​ທຳ​ແຫ່ງ​ຊາດໄດ້ຕ່າງໜ້າສະຖາບັນຍຸຕິທຳ​ແຫ່ງ​ຊາດ ​ໄດ້​ໃຫ້​ກຽດ​ຂື້ນ​ກ່າວ​ມອບ​ນັກ​ສຶກສາຈຳນວນ 59 ຄົນ, ຍິງ 20 ຄົນ ທີ່ໄດ້ລົງມາຝຶກງານຢູ່ແຂວງ ວຽງຈັນ​ ໃນ​ປີ 2020 ຫຼັງຈາກນັ້ນ ທ່ານ ສີສະ​ຫວາດ ​ແສງ​ພະຈັນ ຫົວໜ້າພະແນກຍຸຕິ​ທຳແຂວງ ກໍ່ໄດ້ຂຶ້ນກ່າວຮັບເອົາແລ້ວ,​ ຫຼັງຈາກ​ນັ້ນ ​ທ່ານ​ ໄກ​ທິບ​ພະຈັນ​ ພວງ​ພະຈັນ​ ກໍ່​ໄດ້​ໂອ້​ລົມ​ກັບ​ນັກ​ສຶກສາ​ຝຶກ​ງານ​ຊຸດ​ນີ້​ວ່າ​ຕ້ອງ​ມີແບບແຜນວິທີໃນການລົງໂຄສະນາເຜີຍແຜ່ກົດໝາຍຕ່າງໆຕໍ່ກັບປະຊາຊົນ, ຄວນເປັນແບບຢ່າງ,​ ທັດສະນະ​ຫຼັກໝັ້ນສິນ​ທຳ​, ມີ​ຄວາມ​ອົດທົນ​ຮັກ​ແພງ​ສາມັກຄີ​ເຊິ່ງກັນ​ ແລະ ​ກັນ. 

ຫຼັງຈາກນັ້ນ ທ່ານ ສີສະຫວາດ ແສງພະຈັນ ກໍ່ໄດ້ໃຫ້ກຽດໂອ້​ລົມຕໍ່ກັບ​ນັກ​ສຶກສາທີ່​ໄດ້​ລົງ​ຝຶກ​ງານ​ໃນ​ຄັ້ງ​ນີ້ວ່າ: ຊຶ່ງ​ທ່ານ​ໄດ້​ເນັ້ນໃຫ້​ນັກ​ສຶກສາ​ທີ່​ຈະ​ລົງ​ຝຶກ​ງານ​ຕ້ອງມີ​ຄວາ​ມ​ເສຍສະຫຼະອົດທົນ​, ຜ່ານ​ຜ່າ​ຂໍ້​ຫຍຸ້ງຍາກ​, ທັງ​ເປັນ​ການ​ຝຶກ​ຝົນ​ທາງ​ດ້ານ​ຄວາມ​ຮູ້​, ປະສົບ​ການ ແລະ ແບບແຜນວິທີເຮັດວຽກ ພ້ອມດຽວກັນນີ້ທ່ານຍັງໄດ້​ຮຽກຮ້ອງ​ໃຫ້​ບັນດານັກສຶກສາ​ໄດ້​ພ້ອມ​ກັນ​ເອົາ​ໃຈ​ໃສ່​ຮັກ​ແພງ​ສາມັກຄີ​ຊ່ວຍ​ເຫຼືອ​ເຊິ່ງກັນ​ ແລະ​ ກັນ,​ ຄວນ​ເປັນ​ແບບຢ່າງໃຫ້ແກ່ນັກສຶກສາລຸ້ນນ້ອງທີ່ຍັງສຶກສາຢູ່ສະຖາບັນຍຸຕິທຳແຫ່ງຊາດ.

   ສຳລັບການ​ລົງ​ຝຶກ​ງານ​ຂອງ​ນັກ​ສຶກສາ​ຈາກ​ສະ​ຖາ​ບັນ​ຍຸຕິ​ທຳ​ແຫ່ງ​ຊາດ ໃນຄັ້ງນີ້ແມ່ນໄດ້ຈັດແບ່ງໃຫ້​ລົງເຄື່ອນໄຫວຢູ່ບັນດາ 8 ​ເມືອງ​ ຂອງແຂວງ​ ວຽງ​ຈັນ​ ກຳນົດ​ເວລາ 02 ​ເດືອນ ນັບ​ແຕ່ ວັນ​ທີ 03 ກຸມພາ 2020 ຫາ ວັນ​ທີ 10 ​ເມສາ 2020. ສຳລັບ​ການ​ກິນ​ຢູ່​, ພັກ​ເຊົາ​ຂອງ​ນັກ​ສຶກສາ​ຕະຫຼອດ​ໄລຍະ 02 ​ເດືອນ​ຂອງ​ການ​ຝຶກ​ງານໃນຄັ້ງນີ້ແມ່ນໃຫ້ກຸ້ມຕົນເອງ.

                                                              ຂຽນໂດຍ: ທ່ານ ເຂັມທອງ ບຸບຜາລິວັນ