ພະແນກຍຸຕິທຳແຂວງ ວຽງຈັນໄດ້ຈັດພິທີປູກຕົ້ນໄມ້

ໃນຕອນເຊົ້າຂອງວັນທີ 3 ມິຖຸນາ 2020 ທີ່ຜ່ານມາ ພະແນກຍຸຕິທຳແຂວງ ວຽງຈັນໄດ້ຈັດພິທີປູກຕົ້ນໄມ້ຂຶ້ນ ໂດຍໃຫ້ກຽດເຂົ້າຮ່ວມນຳພາໃນຄັ້ງນີ້ໂດຍ ທ່ານ ສີສະຫວາດ ແສງພະຈັນ ຮັກສາ​ການເລຂາຫນ່ວຍພັກ ວ່າການຫົວຫນ້າພະແນກຍຸຕິທຳແຂວງ ວຽງຈັນ, ມີຮອງຫົວຫນ້າພະແນກ,ຫົວຫນ້າຂະແຫນງ, ຮອງຂະແຫນງ,ພ້ອມດ້ວຍພະນັກງານ-ລັດຖະກອນຂອງພະແນກຍຸຕິທຳແຂວງ ວຽງຈັນເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ສີສະຫວາດ ແສງພະຈັນ ວ່າການຫົວຫນ້າພະແນກຍຸຕິທຳແຂວງ ວຽງຈັນ​ໄດ້​ມີ​ຄຳ​ເຫັນ​ຕໍ່ພິທີວ່າ: ຈຸດປະສົງໃນການຈັດພິທີໃນຄັ້ງນີ້ ເພື່ອເປັນການສະເຫລີມສະຫລອງວັນປູກຕົ້ນໄມ້ແຫ່ງຊາດ ແລະ ວັນ​ເດັກນ້ອຍ​ສາກົນ ເພື່ອເປັນການສ້າງຂະບວນການ ຕ້ອນຮັບກອງປະຊຸມໃຫ່ຍຄັ້ງທີ VIII ຂອງຫນ່ວຍພັກພະແນກຍຸຕິທຳແຂວງ ວຽງຈັນ ໃຫ້ເປັນຂະບວນການຟົດຟື້ນ ຕົ້ນໄມ້ທີ່ນຳມາປູກໃນຄັ້ງນີ້ ມີໄມ້ດູ່ ຈຳນວນ 05 ຕົ້ນ ນອກຈາກນັ້ນຍັງມີຕົ້ນໄມ້ໃຫ້ຫມາກອີກຈຳນວນຫນຶ່ງ ທັງຫມົດນີ້ກໍ່ເພື່ອໃຫ້ພະແນກຍຸຕິທໍາ ເປັນພະແນກ ທີ່ມີພື້ນທີສີຂຽວ ສ້າງຄວາມຮົ່ມເຢັນຫລັງຈາກນັ້ນກໍ່ໄດ້ມີການອອກແຮງລວມ ສ້ອມແປງກຳແພງ ຂອງພະແນກຍຸຕິທຳທີ່ເປ່ເພ່ຕື່ມອີກ.