ວັນທີ 12 ມັງກອນ 2023 ຫ້ອງການຍຸຕິທໍາເມືອງຍອດອູ ແຂວງຜົ້ງສາລີ ໄດ້ລົງເຄື່ອນໄຫວຈັດຕັ້ງປະຕີບັດວຽກງານ ໃຫ້ການຊ່ວຍເຫຼືອທາງດ້ານກົດໝາຍຢູ່ກຸ່ມບ້ານຍອດອູໄດ້ 2 ບ້ານຄື: ບ້ານສົມເຮື່ອງ ແລະ ບ້ານສວຍງາມ ນໍາໂດຍທ່ານ ຈອມແປງ ພົມສົມບັດ ຫົວໜ້າຫ້ອງການຍຸຕີທຳ ພ້ອມດ້ວຍຄະນະທີມງານຈໍານວນ 3 ທ່ານ. ໃນສອງບ້ານລວມມີພົນລະເມືອງທັງໝົດ 824 ຄົນ, ຍີງ 564 ຄົນ, ມີ 167 ຫຼັງຄາເຮືອນ ແລະ ມີ 229 ຄອບຄົວ, ການລົງໂຄສະນາໃນຄັ້ງນີ້ມີຄະນະພັກບ້ານ, ຄະນະໄກ່ເກ່ຍຂໍ້ຂັດແຍ່ງຂັ້ນບ້ານ ແລະ ປະຊາຊົນບັນດາເຜົ່າພາຍໃນບ້ານເຂົ້າຮ່ວມຮັບຟັງທັງ ໝົດ 160 ຄົນ, ຍິງ 45 ຄົນ.

          ຈຸດປະສົງແມ່ນລົງຊຸກຍູ້ໃຫ້ຄະນະພັກຮາກຖານ, ສ້າງຄວາມເຂັ້ມແຂງໃຫ້ປະຊາຊົນຢູ່ພາຍໃນບ້ານ ໄດ້ຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ, ລັດຖະທໍາມະນູນ, ກົດໝາຍ, ລະບຽບການຂອງລັດທີ່ວາງອອກແຕ່ລະໄລຍະສ້າງສະຕິເຄົາລົບກົດໝາຍໃຫ້ແກ່ປະຊາຊົນໃຫ້ນັບມື້ນັບຫຼາຍຂຶ້ນ. ການລົງໂຄສະນາເຜີຍແຜ່ກົດໝາຍໃນຄັ້ງນີ້ ໄດ້ນໍາສະເໜີມີ ລັດຖະທໍາມະນູນແຫ່ງ ສປປ ລາວ, ປະມວນກົດໝາຍອາຍາ, ປະມວນກົດໝາຍແພ່ງ, ກົດໝາຍວ່າດ້ວຍທະບຽນຄອບຄົວ, ກົດໝາຍວ່າດ້ວຍທະບຽນສານ, ເຜີຍແຜ່ດໍາລັດຂອງລັດຖະບານ ແຫ່ງ ສປປ ລາວ ກ່ຽວກັບວຽກງານຊ່ວຍເຫຼືອທາງດ້ານກົດໝາຍ ສະບັບເລກທີ 77/ລບ, ລົງວັນທີ 28 ກຸມພາ 2018 ແລະ ເຜີຍແຜ່ນິຕິກໍາຜ່ານການໄກ່ເກ່ຍຂໍ້ຂັດແຍ່ງຂັ້ນບ້ານ ສະບັບເລກທີ 626/ລບ, ລົງວັນທີ 22 ຕຸລາ 2021 ໃນໂອກາດດຽວກັນນີ້ທ່ານ ຈອມແປງ ພົມສົມບັດ ຫົວໜ້າຫ້ອງການຍຸຕິທໍາເມືອງ ໄດ້ກ່າວມີຄໍາເຫັນ ແລະ ມອບໂພສເຕີ, ປື້ມຄູ່ມືໃຫ້ 2 ບ້ານຕື່ມອີກ.