ຫົວໜ້າພະແນກຍຸຕິທໍາແຂວງ ບໍ່ແກ້ວລົງຊຸກຍູ້ວຽກງານຍຸຕິທໍາຮາກຖານ

ໃນວັນທີ 28 ພຶດສະພາ 2020 ທີ່ຜ່ານມາ ທ່ານ ຄຳຫຼ້າ ອຸດທະຍອດ ຫົວໜ້າພະແນກຍຸຕິທຳແຂວງ ບໍ່ແກ້ວ ພ້ອມດ້ວຍຄະນະ ໄດ້ລົງເຄື່ອນໄຫວ ແລະ ຊຸກຍູ້ວຽກງານຍຸຕິທຳຮາກຖານຢູ່ ເມືອງ ປາກທາ ໃຫ້ກຽດຕ້ອນຮັບໂດຍ ທ່ານ ສົມສິດ ລາດສະວົງ ຫົວໜ້າຫ້ອງການຍຸຕິທຳເມືອງ ປາກທາ ພ້ອມດ້ວຍຄະນະ ແລະ ພະນັກງານ-ລັດຖະກອນ ພາຍໃນຫ້ອງການຍຸຕິທຳເມືອງເຂົ້າຮ່ວມ.

ຈຸດປະສົງ ເພື່ອຕິດຕາມ, ກວດກາ ແລະ ຊຸກຍູ້ວຽກງານຍຸຕິທຳຮາກຖານກໍຄືວຽກງານການຮຽນ-ການສອນກົດໝາຍໄລຍະສັ້ນ 45 ວັນ, ໃຫ້ການນຳຫຼັກແຫຼ່ງ ແລະ ພະນັກງານສືບທອດຂອງເມືອງ ປາກທາ. ທ່ານຫົວໜ້າຫ້ອງການຍຸຕິທໍາເມືອງ ປາກທາ ກໍໄດ້ລາຍງານສະພາບການຈັດຕັ້ງປະຕິບັດວຽກງານໂດຍຫຍໍ້ໃນໄລຍະຜ່ານມາ ໃຫ້ ທ່ານຫົວໜ້າພະແນກຍຸຕິທໍາ ພ້ອມດ້ວຍຄະນະໄດ້ຮັບຊາບ ຊຶ່ງມີທັງດ້ານດີ, ດ້ານອ່ອນ, ຂໍ້ຫຍຸ້ງຍາກ ແລະ ທິດທາງແຜນການໃນຕໍ່ໜ້າ ທ່ານ ຄຳຫຼ້າ ອຸດທະຍອດ ຫົວໜ້າພະແນກຍຸຕິທຳແຂວງ ບໍ່ແກ້ວ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຫ້ອງການຍຸຕິທໍາເມືອງ ປາກທາ ທີ່ຍາດມາໄດ້ໃນໄລຍະຜ່ານມາ ແລະ ໄດ້ໃຫ້ທິດຊີ້ນໍາບາງດ້ານ ເພື່ອໃຫ້ຫ້ອງການຍຸຕິທໍາເມືອງ ໄດ້ສືບຕໍ່ປັບປຸງແກ້ໄຂໃຫ້ດີຂຶ້ນໃນຕໍ່ໜ້າ. ໃນໂອກາດທີ່ລົງເຄື່ອນໄຫວໃນຄັ້ງນີ້ ທ່ານ ຫົວໜ້າພະແນກຍຸຕິທຳແຂວງ ກໍໄດ້ມອບຄອມພີວເຕີຕັ້ງໂຕະ ຈໍານວນ 1 ຊຸດ ແລະ ປຶ້ມປະມວນກົດໝາຍອາຍາຈຳນວນ 34 ຫົວ, ໃຫ້ຫ້ອງການຍຸຕິທໍາເມືອງ ປາກທາ ເພື່ອນໍາໃຊ້ເຂົ້າໃນການປະຕິບັດໜ້າທີ່ວຽກງານ ແລະ ປະກອບເຂົ້າໃນຕູ້ປຶ້ມກົດໝາຍປະຈຳບ້ານ ເຮັດໃຫ້ປະຊາຊົນພາຍໃນບ້ານສາມາດເຂົ້າເຖິງກົດໝາຍໄດ້ງ່າຍຂຶ້ນ.

ພາບ: ນ. ສີພອນ ແອ່ນວິໄລ ຂ່າວ: ພຸດທະຈັກ ວິໄລພອນ