ສອງໜ່ວຍພັກ ຂະແໜງຍຸຕິທຳແຂວງ ບໍ່ແກ້ວ ມອບບັດໃຫ້ ສະມາຊິກພັກສົມບູນ

ໃນວັນທີ 13 ມີນາ 2020 ໜ່ວຍພັກພະແນກຍຸຕິທໍາ ແລະ ໜ່ວຍພັກສານປະຊາຊົນແຂວງ ບໍ່ແກ້ວ ໄດ້ຈັດພິທີມອບບັດໃຫ້ສະມາຊິກສົມບູນຂຶ້ນ ຢູ່ທີ່ຫ້ອງປະຊຸມພະແນກຍຸຕິທໍາແຂວງບໍ່ແກ້ວ ພາຍໃຕ້ການເປັນປະທານຮ່ວມຂອງ ສະຫາຍ ຄຳຫຼ້າ ອຸດທະຍອດ ກໍາມະການພັກແຂວງ ເລຂາໜ່ວຍພັກພະແນກຍຸຕິທຳແຂວງ ແລະ ສະຫາຍ ສົມພອນ ອິນຕະວົງ ເລຂາໜ່ວຍພັກສານປະຊາຊົນແຂວງບໍ່ແກ້ວ ເຂົ້າຮ່ວມມີຕາງໜ້າໜ່ວຍພັກສານປະຊາຊົນ, ພ້ອມດ້ວຍສະມາຊິກພັກສົມບູນ ແລະ ສໍາຮອງ ພາຍໃນໜ່ວຍພັກພະແນກຕິທໍາ ແລະ ສານປະຊາຊົນ ເຂົ້າຮ່ວມທັງໝົດ 20 ສະຫາຍ, ຍິງ 10 ສະຫາຍ.

ໃນພິທີ ສະຫາຍ ນາງ ຈັນດອນ ແກ້ວວິໄລ ຮອງຫົວໜ້າຂະແໜງຈັດຕັ້ງ-ພະນັກງານ ແລະ ກວດກາ ໄດ້ຜ່ານມະຕິຕົກລົງ ວ່າດ້ວຍການຮັບຮອງອອກບັດໃຫ້ສະມາຊິກພັກສົມບູນທີ່ໄດ້ມາດຖານ ຈໍານວນ 4 ສະຫາຍຍິງ 3 ສະຫາຍ, ຊຸດທີ IV ໃຫ້ກຽດມອບໂດຍ ສະຫາຍ ຄຳຫຼ້າ ອຸດທະຍອດ ເລຂາໜ່ວຍພັກ ຫົວໜ້າພະແນກຍຸຕິທໍາແຂວງບໍ່ແກ້ວ.
ຕອນທ້າຍ ປະທານກອງປະຊຸມ ກໍໄດ້ມີຄໍາເຫັນໂອ້ລົມ ສະຫາຍໄດ້ເນັ້ນໜັກໃຫ້ສະມາຊິກພັກຕ້ອງກໍາໃຫ້ໄດ້ 3 ທິດນໍາ, 5 ຫຼັກການ, 9 ຂໍ້ຫ້າມ ຂອງກົດລະບຽບພັກເປັນບ່ອນອີງໃນການເຄື່ອນໄຫວວຽກງານພັກ ແລະ ໄດ້ເນັ້ນໜັກໃຫ້ແຕ່ລະສະຫາຍຕ້ອງເອົາໃຈໃສ່ບາງບັນຫາ ດັ່ງນີ້:
- ສະມາຊິກພັກແຕ່ລະສະຫາຍທີ່ມີບັດແລ້ວຕ້ອງນຳໃຊ້ບັດໃຫ້ຖືກຕ້ອງ ແລະ ສອດຄ່ອງກັບກົດລະບຽບຂອງພັກ, ນຳໃຊ້ບັດລົງມະຕິຮັບຮອງວຽກງານຂອງພັກ ໃນກອງປະຊຸມໃຫຍ່ຂອງພັກຂັ້ນຕ່າງໆ.
- ສືບຕໍ່ສ້າງໜ່ວຍພັກໃຫ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ, ເພື່ອຢັ້ງຢືນຜົນສໍາເລັດ, ຄວາມຮູ້ຄວາມສາມາດ ຂອງສະມາຊິກພັກ ແລະ ການຈັດຕັ້ງ.
- ປະຕິບັດໜ້າທີ່ການເມືອງວຽກງານວິຊາສະເພາະ, ໃຫ້ມີປະສິດທິພາບ, ປະສິດຕິຜົນສູງ.

ຖ່າຍພາບ: ນ. ສີພອນ ແອ່ນວິໄລ
ຂຽນຂ່າວ: ພຸດທະຈັກ ວິໄລພອນ