ພິທີສອບເສັງຄັດເລືອກເອົາພະນັກງານ-ລັດຖະກອນໃໝ່ ປະຈຳປີ 2020

ວັນທີ 2 ມິຖຸນາ 2020 ທີ່ຜ່ານມາ ຢູ່ທີ່ຫ້ອງປະຊຸມພະແນກຍຸຕິທຳແຂວງ ບໍ່ແກ້ວ ໄດ້ຈັດພິທີສອບເສັງຄັດເລືອກເອົາພະນັກງານ-ລັດຖະກອນໃໝ່ ປະຈຳປີ 2020 ຂຶ້ນ ໂດຍພາຍໃຕ້ການເປັນປະທານຂອງ ທ່ານ ຄຳຫຼ້າ ອຸດທະຍອດ ກໍາມະການພັກແຂວງ, ຫົວໜ້າພະແນກຍຸຕິທຳແຂວງ ບໍ່ແກ້ວ, ມີບັນດາຄະນະຮັບຜິດຊອບ, ອະນຸກໍາມະການສອບເສັງ, ຕະຫຼອດຮອດນັກສອບເສັງເຂົ້າຮ່ວມ.

ການສອບເສັງຄັ້ງນີ້ມີນັກສອບເສັງເຂົ້າຮ່ວມທັງໝົດ 14 ຄົນ, ຍິງ 6 ຄົນ ແລະ ຄັດເລືອກເອົາ 1 ຄົນ. ຜູ້ທີ່ເຂົ້າຮ່ວມສອບເສັງໃນຄັ້ງນີ້ ເເມ່ນພະນັກງານອາສາສະໝັກ ຢູ່ພະແນກຍຸຕິທຳແຂວງ ແລະ ມາຈາກບັນດາຫ້ອງການຍຸຕິທໍາເມືອງ ທັງ 5 ເມືອງຂອງແຂວງ ບໍ່ແກ້ວ, ເພື່ອມາສອບເສັງຄັດເລືອກເອົາຕົວເລກລັດຖະກອນຕາມໂກຕ໋າຂອງກະຊວງຍຸຕິທຳແບ່ງປັນໃຫ້, ບົດຮຽນທີ່ນໍາມາສອບເສັງໃນຄັ້ງນີ້ ແມ່ນປະກອບມີ ຄວາມຮູ້ທົ່ວໄປ ແລະ ຄວາມຮູ້ກ່ຽວກັບກົດໝາຍ, ຊຶ່ງໄດ້ແບ່ງອອກເປັນ 2 ພາກຄື: ປາລາໄນ ແລະ ອັດຕາໄນ.
ໃນໂອກາດນີ້ ທ່ານ ຄຳຫຼ້າ ອຸດທະຍອດ ກໍໄດ້ເນັ້ນໜັກໃຫ້ອະນຸກຳມະການສອບເສັງ ແລະ ນັກສອບເສັງທຸກຄົນ ຈົ່ງພ້ອມກັນເອົາໃຈໃສ່ປະຕິບັດກົດລະບຽບຂອງການສອບເສັງຢ່າງເຄັງຄັດ, ໃຫ້ນໍາໃຊ້ຄວາມຮູ້ ແລະ ຄວາມສາມາດຂອງຕົນເຂົ້າໃນການສອບເສັງ ເພື່ອເຮັດໃຫ້ການສອບເສັງໃນຄັ້ງນີ້ມີປະສິດທິພາບ ແລະ ປະສິດທິຜົນຕາມລະດັບຄາດໝາຍທີ່ວາງໄວ້ ແລະ ເຊື່ອໝັ້ນວ່າບັນດານັກສອບເສັງທຸກຄົນຈະປະຕິບັດຕາມກົດໝາຍ ແລະ ລະບຽບການສອບເສັງຢ່າງເຂັ້ມງວດ.

ພາບ-ຂ່າວ: ພະແນກຍຸຕິທໍາແຂວງ ບໍ່ແກ້ວ