ພະແນກຍຸຕິທໍາແຂວງ ບໍ່ແກ້ວ ຫວນຄືນມູນເຊື້ອວັນສໍາຄັນຂອງຊາດ

ວັນທີ 27 ພຶດສະພາ 2020 ທີ່ຜ່ານມາ ພະແນກຍຸຕິທຳແຂວງ ບໍ່ແກ້ວ ໄດ້ຈັດພິທີປາຖະກະຖາ ຫວນຄືນມູນເຊື້ອ 2 ວັນປະຫວັດສາດທີ່ສຳຄັນຄື: ວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນ ແຂວງ ຊຽງຂວາງ ຄົບຮອບ 61 ປີ (18/5/1959 - 18/5/2020) ແລະ ວັນວິລະກໍາໂຕນຄຸກຢ່າງມະຫັດສະຈັນ ຂອງບັນດາທ່ານຜູ້ນໍາ ແນວລາວຮັກຊາດ ຄົບຮອບ 60 ປີ (24/5/1960 - 24/5/2020) ໃຫ້ກຽດເຂົ້າຮ່ວມເປັນປະທານ ແລະ ປາຖະກະຖາໂດຍ ທ່ານ ສຸລິເດດ ບັນດາກອນ ຮອງຫົວໜ້າພະແນກຍຸຕິທໍາແຂວງ ບໍ່ແກ້ວ, ມີບັນດາຫົວໜ້າຂະແໜງ, ຮອງຫົວໜ້າຂະແໜງ ແລະ ພະນັກງານ-ລັດຖະກອນ ວິຊາການ ພາຍໃນພະແນກເຂົ້າຮ່ວມທັງໝົດ 22 ທ່ານ, ຍິງ 9 ທ່ານ.

ຈຸດປະສົງ ເພື່ອຫວນຄືນມູນເຊື້ອ 2 ວັນປະຫວັດສາດ ເຮັດໃຫ້ສະມາຊິກພັກ, ພະນັກງານຮຸ່ນໜຸ່ມ ມີຄວາມຮັບຮູ້, ເຂົ້າໃຈຕໍ່ທາດແທ້, ມູນເຊື້ອອັນພິລະອາດຫານ, ຜົນງານອັນໃຫຍ່ຫຼວງຂອງກອງທັບ ແລະ ປະຊາຊົນລາວ ບັນດາເຜົ່າໃນສະໄໝຕໍ່ສູ້ປົດປ່ອຍຊາດ. ແນໃສ່ສຶກສາອົບຮົມພະນັກງານ-ລັດຖະກອນ, ສະມາຊິກພັກໃຫ້ມີນ້ຳໃຈຮັກຊາດ, ຮັກລະບອບໃໝ່, ຮັກລະບອບປະຊາທິປະໄຕ ປະຊາຊົນລາວ ແລະ ຮໍ່າຮຽນເອົາຄຸນສົມບັດສິນທຳປະຕິວັດ, ຄຸນງາມຄວາມດີຂອງບັນດາຜູ້ນຳຮຸ່ນກ່ອນ ກໍຄື ພະນັກງານນັກຮົບປະຕິວັດ, ຜູ້ທີ່ເສຍສະລະຊີວິດ, ເລືອດເນື້ອ ເຂົ້າໃນພາລະກິດປະຕິວັດຕໍ່ສູ້ປົດປ່ອຍຊາດ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດ. ທ່ານ ສຸລິເດດ ບັນດາກອນ ຍັງໄດ້ເນັ້ນໜັກໃຫ້ສະມາຊິກພັກ, ພະນັກງານ-ລັດຖະກອນ ຈົ່ງກຳແໜ້ນ, ເຊື່ອມຊຶມ, ຮັບຮູ້ ແລະ ເຂົ້າໃຈຕໍ່ວັນສຳຄັນດັ່ງກ່າວ ພ້ອມກັນເປັນເຈົ້າການໃນການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງສີວິໄລຂຶ້ນໄປເລື້ອຍໆ.

ພາບ: ນ ສີພອນ ແອ່ນວິໄລ ຂ່າວ: ພຸດທະຈັກ ວິໄລພອນ