ຜັນຂະຫຍາຍຜົນສຳເລັດກອງປະຊຸມວຽກງານຍຸຕິທຳທົ່ວປະເທດ ຕິດພັນກັບການລົງຊຸກຍູ້ວຽກງານວິຊາສະເພາະຢູ່ຂັ້ນເມືອງ

ໃນຕອນບ່າຍຂອງວັນທີ 22 ກໍລະກົດ 2020 ທີ່ຜ່ານມາ ທ່ານ ຄຳຫຼ້າ ອຸດທະຍອດ ກໍາມະການພັກແຂວງຫົວໜ້າພະແນກຍຸຕິທໍາແຂວງ ບໍ່ແກ້ວ ພ້ອມດ້ວຍຄະນະ ໄດ້ລົງຈັດຕັ້ງຜັນຂະຫຍາຍຜົນສຳເລັດຂອງກອງປະຊຸມວຽກງານຍຸຕິທຳທົ່ວປະເທດປະຈຳປີ 2019 ຢູ່ເມືອງ ຕົ້ນເຜິ້ງ, ມີ ທ່ານຫົວໜ້າຫ້ອງການຍຸຕິທໍາເມືອງ ຕົ້ນເຜິ້ງ ພ້ອມດ້ວຍຄະນະ ແລະ ພະນັກງານ-ລັດຖະກອນເຂົ້າຮ່ວມທັງໝົດຈໍານວນ 16 ທ່ານ ຍິງ 4 ທ່ານ.

ທ່ານ ສາຍຄຳ ຄຳປະເສີດ ຫົວໜ້າຫ້ອງການຍຸຕິທໍາເມືອງ ຕົ້ນເຜິ້ງ ກໍໄດ້ລາຍງານການຈັດຕັ້ງປະຕິບັດວຽກງານໃນໄລຍະ 6 ເດືອນຜ່ານມາ ເປັນຕົ້ນ ແມ່ນວຽກງານຈັດຕັ້ງປະຕິບັດຄໍາຕັດສີນຂອງສານ, ວຽກງານໂຄສະນາເຜີຍແຜ່ກົດໝາຍ, ວຽກງານສົ່ງເສີມລະບົບຍຸຕິທໍາ, ວຽກງານທະບຽນສານ ແລະ ວຽກງານ ອື່ນໆ ຜ່ານການລາຍງານເຫັນວ່າມີທັງດ້ານດີ, ດ້ານອ່ອນ ແລະ ຂໍ້ຄົງຄ້າງ ທີ່ຈະຕ້ອງສືບຕໍ່ປັບປຸງແກ້ໄຂໃນຕໍ່ໜ້າ. ຈາກນັ້ນ, ທ່ານ ຄໍາຫຼ້າ ອຸດທະຍອດ ຫົວໜ້າພະແນກຍຸຕິທໍາແຂວງ ກໍໄດ້ຜ່ານບົດສະຫຼຸບວຽກງານຍຸຕິທໍາປະຈຳປີ 2019 ແລະ ທິດທາງແຜນການປີ 2020. ການລົງເຄື່ອນໄຫວວຽກງານຢູ່ເມືອງ ຕົ້ນເຜິ້ງ ຄັ້ງນີ້ ນອກຈາກການຜັນຂະຫຍາຍຜົນສໍາເລັດຂອງກອງປະຊຸມວຽກງານຍຸຕິທຳທົ່ວປະເທດແລ້ວ ຍັງເປັນການລົງຕິດຕາມ, ກວດກາ ແລະ ຊຸກຍູ້ ການເຄື່ອນໄຫວວຽກງານຮອບດ້ານຂອງຂະແໜງຍຸຕິທໍາຕື່ມອີກ.

ຕອນທ້າຍພິທີ ທ່ານ ຫົວໜ້າພະແນກຍຸຕິທໍາແຂວງ ບໍ່ແກ້ວ ກໍໄດ້ມີຄໍາເຫັນໂອ້ລົມ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນງານ ແລະ ຜົນສໍາເລັດທີ່ຫ້ອງການຍຸຕິທໍາເມືອງ ຕົ້ນເຜິ້ງຍາດມາໄດ້ຕະຫຼອດໃນໄລຍະ 6 ເດືອນຜ່ານມາ, ພ້ອມທັງເນັ້ນໜັກໃຫ້ເມືອງຕົ້ນເຜິ້ງ ຈົ່ງສືບຕໍ່ເສີມຂະຫຍາຍຈຸດດີ, ແກ້ໄຂດ້ານອ່ອນ ແລະ ດ້ານຄົງຄ້າງຂອງຕົນ ເພື່ອເຮັດໃຫ້ການປະຕິບັດໜ້າທີ່ວຽກງານໃນຕໍ່ໜ້າມີປະສິດທິຜົນສູງຂຶ້ນກວ່າເກົ່າ.

ພາບ-ຂ່າວ: ພຸດທະຈັກ ວິໄລພອນ