ເມືອງ ຜາອຸດົມ ຮັບຮອງເອົາຄອບຄົວ ແລະ ບ້ານໃໝ່ ເປັນບ້ານແບບຢ່າງປະຕິບັດກົດໝາຍ

ພີທີປະກາດ-ຮັບຮອງເອົາຄອບຄົວ ແລະ ບ້ານໃໝ່ ເປັນບ້ານແບບຢ່າງປະຕິບັດກົດໝາຍ. ໄດ້ຈັດຂື້ນໃນຕອນເຊົ້າຂອງວັນທີ 29 ທັນວາ 2020 ທີ່ຜ່ານມາ ຢູ່ທີ່ໂຮງຮຽນມັດທະຍົມຕອນຕົ້ນ ບ້ານໃໝ່ ເມືອງ ຜາອຸດົມ ແຂວງ ບໍ່ແກ້ວ . ເປັນກຽດເຂົ້າຮ່ວມໃນພິທີ ມີທ່ານ ສົມຈິດ ງາສານກອງ ກຳມະການພັກເມືອງ ຫົວໝ້າຫ້ອງການຍຸູຕິທຳເມືອງ, ທ່ານເພັດສະໝອນ ແພງມະລົມສີ ກຳມະການພັກເມືອງ ມີ ທ່ານ ພັນແສງ ພົມປັນຍາ ເລຂາຄະນະພັກຮາກຖານກຸ່ມບ້ານໃໝ່, ຫົວໜ້າອົງການໄອຍະການປະຊາຊົນເຂດ 2, ເມືອງ ຜາອຸດົມ ແຂວງ ບໍ່ແກ້ວ ມີອຳນາດການປົກຄອງບ້ານ, ພະນັກງານກໍ່ສ້າງຮາກຖານກຸ່ມ ພ້ອມດ້ວຍຄູ-ອາຈານຕະຫຼອດຮອດພໍ່ແມ່ປະຊາຊົນພາຍໃນບ້ານເຂົ້າຮ່ວມ.

ໃນພິທີທ່ານ ຄືນຄຳ ໄຊອຸດົມ ນາຍບ້ານບ້ານໃໝ່ ໄດ້ຜ່ານບົດສະຫຼຸບປະເມີນຜົນໃນການປະບັດວຽກງານກໍ່ສ້າງເປັນບ້ານແບບຢ່າງປະຕິບັດກົດໝາຍຕາມຂໍ້ຕົກລົງ ຂອງລັດຖະມົນຕີກະຊວງຍຸຕິທຳ ສະບັບເລກທີ່ 1399/ກຍ ລົງວັນທີ່ 7 ທັນວາ 2017 ທີ່ໄດ້ກໍານົດເອົາຫຼັກການ, ລະບຽບການ, ມາດຕະການໃນການຄຸ້ມຄອງ ຕິດຕາມກວດກາການສ້າງຄອບຄົວ ແລະ ບ້ານແບບຢ່າງປະຕິບັດກົດ ໝາຍ ແມ່ນໄດ້ແນ່ໃສ່ເຮັດໃຫ້ສະມາຊິກພາຍໃນຄອບຄົວ ແລະ ປະຊາຊົນພາຍໃນບ້ານມີຄວາມຮັບຮູ້ເຂົ້າໃຈຕໍ່ລັດຖະທຳມະນູນ ແລະ ກົດໝາຍຢ່າງຖືກຕ້ອງເລິກເຊິ່ງມີສະຕິຕື່ນຕົວເຄົາລົບ ແລະ ປະຕິບັດກົດໝາຍຢ່າງເຂັ້ມງວດ.

ໃນຕອນທ້າຍ ທ່ານ ປະທານ ໄດ້ມີຄໍາເຫັນ ຊຶ່ງທ່ານ ໄດ້ຍ້ອງຍໍຊົມເຊີຍຕໍ່ຜົນງານຂອງບ້ານ ທີ່ຍາດແຍ່ງມາໄດ້ໃນໄລຍະຜ່ານມາ ແລະ ໄດ້ເນັ້ນໜັກບາງຈຸດທີ່ຕ້ອງໄດ້ປັບປຸງຄືນ ການທີ່ຈະກ້າວຂຶ້ນມາເປັນບ້ານແບບຢ່າງປະຕິບັດກົດໝາຍນີ້ ເປັນວຽກງານໜຶ່ງ ທີ່ນອນຢູ່ໃນຂະບວນການກໍ່ສ້າງຮາກຖານການເມືອງ ແລະ ນໍາເອົາຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມຍຸຕິທໍາ ແລະ ຄວາມສີວິໄລໂດຍເລີ່ມຈາກຄອບຄົວ ແລະ ບ້ານເປັນພື້ນຖານ ກ້າວໄປເຖິງການສ້າງລັດ ສປປ ລາວ ໃຫ້ກາຍເປັນລັດທີ່ປົກຄອງດ້ວຍກົດໝາຍເທື່ອລະກ້າວ.

ພາບ-ຂ່າວ: ຫ້ອງການຍຸຕິທໍາເມືອງ ຜາອຸດົມ

ປະເພດຂ່າວ: