ແຕ່ງຕັ້ງຫົວໜ້າຫ້ອງການຍຸຕິທຳເມືອງ ໄຊຈໍາພອນ ແຂວງ ບໍລິຄຳໄຊ

   ໃນວັນທີ 7 ສິງຫາ 2020 ທີຜ່ານມາ ຢູ່ທີ່ຫ້ອງວ່າການປົກຄອງເມືອງ ໄຊຈໍາພອນ ແຂວງ ບໍລິຄໍາໄຊ ໄດ້ມີພິທີປະກາດການແຕ່ງຕັ້ງຫົວໜ້າຫ້ອງການຍຸຕິທຳເມືອງ ໄຊຈໍາພອນ ຜູ້ໃໝ່ຂຶ້ນ ໂດຍການເປັນປະທານຂອງທ່ານ ໂກ່ ໄຊສົມບັດ ເລຂາພັກເມືອງ ເຈົ້າເມືອງ ໄຊຈໍາພອນ ມີບັນດາຫົວໜ້າຫ້ອງການ, ພ້ອມດ້ວຍພະນັກງານ-ລັດຖະກອນ ແລະ ແຂກຖືກເຊີນເຂົ້າຮ່ວມທັງໝົດ 14 ທ່ານ, ຍິງ 2 ທ່ານ.
   ທ່ານ ຄຳສອນ ສີຫາລາດ ຮັກສາການຫົວໜ້າຫ້ອງການຍຸຕິທຳເມືອງ ໄຊຈໍາພອນ ກໍໄດ້ຂຶ້ນຜ່ານບົດສະຫຼຸບການຊີ້ນຳ-ນຳພາໃນໄລຍະຜ່ານມາ. ຈາກນັ້ນ, ຄະນະຈັດຕັ້ງເມືອງກໍໄດ້ຜ່ານຂໍ້ຕົກລົງຂອງທ່ານເຈົ້າເມືອງ ໄຊຈໍາພອນ ສະບັບເລກທີ 196/ມຊພ, ລົງວັນທີ 30 ກໍລະກົດ 2020 ວ່າດ້ວຍການແຕ່ງຕັ້ງ ທ່ານ ສອນໄຊ ໄຊຍະທິຈັກ ເປັນຫົວໜ້າຫ້ອງການຍຸຕິທຳເມືອງ ໄຊຈໍາພອນຜູ້ໃໝ່ ແລະ ຜ່ານຂໍ້ຕົກລົງ ສະບັບເລກທີ 197 / ມຊພ , ລົງວັນທີ 30 ກໍລະກົດ 202 ວ່າດ້ວຍການຍົກຍ້າຍ ທ່ານ ຄໍາສອນ ສີຫາລາດ ໄປປະຈໍາການຢູ່ເມືອງ ຄຳເກີດ ແຂວງ ບໍລິຄໍາໄຊ.

   ຕອນທ້າຍ ທ່ານ ເຈົ້າເມືອງ ໄຊຈໍາພອນ ກໍໄດ້ໃຫ້ກຽດໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຫ້ອງການຍຸຕິທຳເມືອງຍາດມາໄດ້ໃນໄລຍະຜ່ານມາ ແລະ ໄດ້ເນັ້ນໜັກໃຫ້ຫົວໜ້າຫ້ອງການຍຸຕິທຳເມືອງຜູ້ໃໝ່ ຈົ່ງເອົາໃຈໃສ່ສືບຕໍ່ຊີ້ນຳ-ນຳພາທາງດ້ານການເມືອງ-ແນວຄິດ, ສຸມໃສ່ການເຄື່ອນໄຫວຈັດຕັ້ງປະຕິບັດວຽກງານວິຊາສະເພາະໃຫ້ໜັກແໜ້ນເຂັ້ມແຂງ, ເຕົ້າໂຮມຄວາມສາມັກຄີ, ປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຕົນ ຕາມການມອບໝາຍຂອງການຈັດຕັ້ງໃຫ້ປະສົບຜົນສໍາເລັດ.

ພາບ-ຂ່າວ: ສົມໃຈ ຫວ່າງ