ກອງປະຊຸມໃຫຍ່ຄັ້ງທີ IV ຄະນະພັກຮາກຖານພະແນກຍຸຕິທຳແຂວງ ບໍລິຄຳໄຊ

   ກອງປະຊຸມໃຫຍ່ຄັ້ງທີ IV ຂອງຄະນະພັກຮາກຖານ ພະແນກຍຸຕິທໍາແຂວງ ບໍລິຄໍາໄຊ ໄດ້ຈັດຂຶ້ນໃນວັນທີ 29 ມັງກອນ 2020 ທີ່ຜ່ານມາ ໂດຍພາຍໃຕ້ການເປັນ ປະທານຂອງ ສະຫາຍ ຄໍາຜັນ ສິດໄຊຍະສານ ເລຂາໜ່ວຍພັກຮາກຖານພະແນກຍຸຕິທຳແຂວງ ບໍລິຄໍາໄຊ ແລະ ເປັນກຽດເຂົ້າຮ່ວມ ຂອງສະຫາຍ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ບໍລິຄຳໄຊ ມີຜູ້ແທນສົມບູນ 24 ສະຫາຍ, ຍິງ 9 ສະຫາຍ ພ້ອມດ້ວຍແຂກຖືກເຊີນຈາກ ຄະນະພັກຮາກຖານອ້ອມຂ້າງແຂວງເຂົ້າຮ່ວມ.
   ກອງປະຊຸມໄດ້ຮັບຟັງການລາຍງານ ການເມືອງທັງສອງພາກ ສະເໜີໂດຍ ສະຫາຍ ຄຳຜັນ ສິດໄຊຍະສານ ເລຂາຄະນະພັກຮາກຖານພະແນກຍຸຕິທຳ ແຂວງ ບໍລິຄຳໄຊ ຊຶ່ງໄດ້ຕີລາຄາຜົນງານ ແລະ ໄຊຊະນະຂອງການຈັດຕັ້ງປະຕິບັດແນວທາງແຜນນະໂຍບາຍຂອງອົງຄະນະພັກແຂວງ ຕະຫຼອດໄລຍະ 5 ປີຜ່ານມາ ຄະນະພັກຮາກຖານພະແນກຍຸຕິທໍາແຂວງ ບໍລິຄໍາໄຊ ໄດ້ຖືເອົາວຽກງານສຶກສາອົບຮົມການເມືອງ-ແນວຄິດ ໃຫ້ພະນັກງານສະມາຊິກພັກພາຍໃນພະແນກເປັນສຳຄັນ ເຊັ່ນ ໄດ້ເຂົ້າຮ່ວມເຊື່ອມຊຶມຈັດຕັ້ງເຜີຍແຜ່ບັນດາມະຕິ, ຄຳສັ່ງ, ແລະ ກົດໜາຍຕ່າງໆ ພ້ອມກັນນັ້ນກໍໄດ້ກວດກາບັນດາການຮ່າງນິຕິກຳຕ່າງໆພາຍໃນແຂວງ ແລະ ພະແນກການອື່ນ, ຖືສຳຄັນການດຳເນີນຊີວິດການເມືອງ ແລະ ຢຶດໝັ້ນຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະ, ແບ່ງຄວາມຮັບຜິດຊອບໃຫ້ຂະແໜງການຊີ້ນຳ-ນຳພາ, ເສີມຂະຫຍາຍສິດເປັນເຈົ້າ ແລະ ຫົວຄິດປະດິດສ້າງຂອງສະມາຊິກພັກຢ່າງຕັ້ງໜ້າ, ເຮັດວຽກຢ່າງມີ ແຜນການ, ແຜນງານ, ມີແຜນຈຸດສຸມ ແລະ ຕິດແທດກັບຕົວຈິງ, ພ້ອມທັງຊຸກຍູ້, ຕິດຕາມກວດກາ ປະເມີນຜົນເປັນແຕ່ລະໜ້າວຽກ ແລະ ລາຍງານໃຫ້ຄະນະພັກຂັ້ນເທິງຮັບຊາບຢ່າງເປັນປົກກະຕິ. ກອງປະຊຸມໄດ້ປ່ອນບັດເລືອກຕັ້ງເອົາຄະນະພັກຮາກຖານ ພະແນກຍຸຕິທຳຊຸດໃໝ່ ຊຶ່ງມີຜູ້ສະໝັກ 5 ສະຫາຍເລືອກໄດ້ 3 ສະຫາຍ ຄື: ສະຫາຍ ສົມໃຈ ຄຸນພະໄຊ ເປັນເລຂາ, ສະຫາຍ ສະພັງທອງ ພົມມະຈັກ ເປັນຮອງເລຂາ ແລະ ສະຫາຍ ບົວພັນ ຈັນທະວິລຸນ ເປັນຜູ້ກວດກາ.

   ໃນໂອກາດດັ່ງກ່າວ ສະຫາຍ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ, ສະມາຊິກພັກທຸກສະຫາຍ ທີ່ຍາດໄດ້ຜົນງານອັນພົ້ນເດັ່ນຕະຫຼອດໄລຍະ 5 ປີ ຜ່ານມາ ເພື່ອເປັນການຮັກສານມູນເຊື້ອດັ່ງກ່າວ ຈົ່ງພ້ອມກັນເອົາໃຈໃສ່ຕື່ມບາງບັນຫາ ດັ່ງນີ້: ເປັນຕົ້ນ ໃຫ້ກໍາແໜ້ນ ລັດຖະທຳມະນູນ, ກົດໝາຍ ແລະ ຫັນເອົາບັນດາກົດໝາຍຕ່າງໆລົງສູ່ທ້ອງຖິ່ນ ພະຍາຍາມແກ້ໄຂປາກົດການຫຍໍ້ທໍ້ໃນບ້ານ ເພື່ອເຮັດແນວໃດບໍ່ໃຫ້ມີຄະດີເກີດຂຶ້ນຫຼາຍ ແລະ ບໍ່ໃຫ້ຂຶ້ນມາຮອດສານ. ສະນັ້ນ, ຄະນະພັກຮາກຖານ ພະແນກຍຸຕິທຳ ຊຸດໃໝ່ຈົ່ງພ້ອມກັນ ນຳເອົາວຽກງານແນວຄິດ-ການເມືອງ ແລະ ແນວທາງ, ມະຕິ, ຄຳສັ່ງຂອງພັກ, ກົດໝາຍ ແລະ ລະບຽບການຂອງລັດເຜີຍແຜ່ເຊື່ອມຊຶມໃຫ້ແກ່ຖັນແຖວພະນັກງານ, ສະມາຊິກພັກ ແລະ ພະນັກງານ ຢ່າງທົ່ວເຖິງ ຂະຫຍາຍຄວາມສາມັກຄີຢ່າງເປັນປຶກແຜ່ນຂອງພະນັກງານ ກໍຄືສະມາຊິກພັກ ເສີມຂະຫຍາຍຄວາມເປັນເຈົ້າຕົນເອງ ເພິ່ງຕົນເອງຕັ້ງໜ້າແກ້ໄຂປາກົດການຫຍໍ້ທໍ້ທີ່ເກີດຂຶ້ນໃນຖັນແຖວພະນັກງານ, ສະມາຊິກພັກ ພ້ອມກັນນຳເອົາເນື້ອໃນຈິດໃຈຂອງກອງປະຊຸມໄປຈັດຕັ້ງຜັນຂະຫຍາຍໃຫ້ສອດຄ່ອງກັບສະພາບຄວາມເປັນຈິງ.

ຂ່າວ, ພາບ: ໂດຍ ບຸນເລີດ ລັດທະພອນ