ພະແນກຍຸຕິທຳ ແລະ ກອງບັນຊາການ ປກສ ແຂວງ ຈຳປາສັກ ສ້າງຂະບວນການຕ້ອນຮັບວັນສໍາຄັນຂອງຊາດ

ໃນວັນທີ 5 ກຸມພາ 2020 ພະແນກຍຸຕິທຳ ແລະ ຄ້າຍຄຸມຄັງ-ດັດສ້າງ ກອງບັນຊາການ ປກສ ແຂວງ ຈຳປາສັກ ໄດ້ສ້າງຂະບວນການແຂ່ງຂັນກິລາບານເຕະມິດຕະພາບຮ່ວມກັນ ຊຶ່ງຈັດຂຶ້ນທີ່ເດີ່ນບານເຕະ ຄັນແຍງອາລີນາ. ເຂົ້າຮ່ວມ ມີ ທ່ານ ບຸນຄົງ ພັນວົງສາ ຫົວໜ້າພະແນກຍຸຕິທຳແຂວງ ຈຳປາສັກ ແລະ ທ່ານ ພັນໂທ ສີລາວົງ ອິນທະປາສິດ ຮອງຫົວໜ້າ ຄ້າຍຄຸມຂັງ-ດັດສ້າງ ກອງບັນຊາການປ້ອງກັນຄວາມສະຫງົບ ແຂວງ ຈຳປາສັກ ພ້ອມດ້ວຍພະນັກງານ-ລັດຖະກອນຂອງສອງພາກສ່ວນເຂົ້າຮ່ວມ.
ຈຸດປະສົງ ແມ່ນເພື່ອເປັນການຂຳ່ນັບຮັບຕ້ອນວັນສຳຄັນຕ່າງໆ ຂອງພັກ ຂອງຊາດ, ເພື່ອເປັນການຮັດແໜ້ນຄວາມສາມັກຄີລະຫວ່າງ ພະແນກຍຸຕິທໍາ ແລະ ຄ້າຍຄຸມຂັງດັດສ້າງ ກອງບັນຊາການ ປກສ ແຂວງ ຈໍາປາສັກ ແລະ ເພື່ອເປັນການແລກປ່ຽນ, ຖອດຖອນບົດຮຽນທາງດ້ານວິຊາການ ກໍຄືວຽກງານວິຊາສະເພາະຂອງສອງຂະແໜງການ ໃຫ້ມີຄວາມແໜ້ນແຟ້ນຂຶ້ນກວ່າເກົ່າ. ໃນໂອກາດດັ່ງກ່າວ ທ່ານ ບຸນຄົງ ພັນວົງສາ ຫົວໜ້າພະແນກຍຸຕິທຳແຂວງ ຈຳປາສັກ ກໍໄດ້ມອບຊຸດກິລາຈຳນວນ 30 ຊຸດ ໃຫ້ແກ່ຄ້າຍຄຸມຂັງ-ດັດສ້າງ ກອງບັນຊາການ ປກສ ແຂວງ ຈຳປາສັກ ຕາງໜ້າຮັບໂດຍແມ່ນ ທ່ານ ພັນໂທ ສີລາວົງ ອິນທະປາສິດ ຮອງຫົວໜ້າຄ້າຍຄຸມຂັງ-ດັດສ້າງ ກອງບັນຊາການ ປກສ ແຂວງ ຈຳປາສັກ.
ຕະຫຼອດເວລາຂອງການແຂ່ງຂັນກິລາ ແມ່ນເຕັມໄປດ້ວຍບັນຍາກາດ ໄມຕີຈິດ ມິດຕະພາບຄວາມເບີກບານມ່ວນຊື່ນ ຮັກສາໄດ້ຄວາມສາມັກຄີ ຮັກແພງ. ຜົນຂອງການແຂ່ງຂັນ ຄ້າຍຄຸມຂັງ-ດັດສ້າງ ກອງບັນຊາການ ປກສ ແຂວງ ສາມາດເອົາຊະນະ ພະແນກຍຸຕິທໍາ 5 – 4 ປະຕູ.

ຂຽນຂ່າວ,ຖ່າຍພາບ: ລັດສະໝີ ພົມມະຈັນ