ຊາວໜຸ່ມສະຖາບັນຍຸຕິທຳແຫ່ງຊາດ ຮັບຟັງການເຜີຍແຜ່ ກ່ຽວກັບ ການຕ້ານການສໍ້ລາດບັງຫຼວງ

ໃນວັນທີ 5 ກຸມພາ 2020 ສະຖາບັນຍຸຕິທຳແຫ່ງຊາດ ໄດ້ຈັດການເຜີຍແຜ່ເອກະສານ ການຕ້ານການສໍ້ລາດບັງຫຼວງ ໃຫ້ແກ່ຊາວໜຸ່ມນັກສຶກສາຂອງສະຖາບັນຍຸຕິທຳແຫ່ງຊາດຂຶ້ນ ພາຍໃຕ້ການເປັນປະທານຮ່ວມຂອງ ສະຫາຍ ບຸນຕາ ສ.ຜາບມີໄຊ ຄະນະພັກກະຊວງ, ຫົວໜ້າສະຖາບັນຍຸຕິທຳແຫ່ງຊາດ, ກະຊວງຍຸຕິທຳ ແລະ ສະຫາຍ ທອງແດງ ສານປະເສີດ ຮອງຫົວໜ້າກົມກວດກາ, ສູນກາງຊາວໜຸ່ມປະຊາຊົນປະຕິວັດລາວ; ເຂົ້າຮ່ວມມີ ສະຫາຍ ບຸບມີ ບຸບຜາລີວັນ ຄະນະປະຈຳ, ຮອງເລຂາຄະນະບໍລິຫານງານຊາວໜຸ່ມກະຊວງຍຸຕິທຳ, ຫົວໜ້າຫ້ອງການ, ຜູ້ຕາງໜ້າບັນດາກົມອ້ອມຂ້າງສູນກາງຊາວໜຸ່ມ, ຄະນະຊາວໜຸ່ມຮາກຖານສະຖາບັນຍຸຕິທຳແຫ່ງຊາດ, ສະມາຊິກຊາວໜຸ່ມພະນັກງານ, ບັນດາຄູ-ອາຈານ ແລະ ນັກສຶກສາ ພາຍໃນສະຖາບັນຍຸຕິທຳແຫ່ງຊາດ ເຂົ້າຮ່ວມ 300 ກວ່າຄົນ. ຈຸດປະສົງ ເພື່ອສະໜອງຂໍ້ມູນກ່ຽວກັບການຕ້ານການສໍ້ລາດບັງຫຼວງ ໃຫ້ແກ່ສະມາຊິກຊາວໜຸ່ມ-ນັກສຶກສາ, ເພື່ອຕ້ານ ແລະ ສະກັດກັ້ນກຸ່ມຊາວໜຸ່ມ-ໄວໜຸ່ມ, ນັກຮຽນ-ນັກສຶກສາ ບໍ່ໃຫ້ມີແນວຄິດຫຼົງປະພຶດຜິດຕໍ່ກົດໝາຍ ກໍຄືລະບຽບຕ່າງໆ ທີ່ລັດວາງອອກ, ເປັນການສຶກສາອົບຮົມ ແລະ ປູກຈິດສໍານຶກໃຫ້ກັບຊາວໜຸ່ມນັກຮຽນ-ນັກສຶກສາ ໃຫ້ເຂົ້າໃຈຖືກຕ້ອງຕໍ່ກັບໄພອັນຕະລາຍ ຂອງການສໍ້ລາດບັງຫຼວງ ແລະ ບັນຫາດັ່ງກ່າວທີ່ເກີດຂຶ້ນຢູ່ພາຍໃນ ແລະ ຕ່າງປະເທດ.
ໃນພິທີດັ່ງກ່າວ ຜູ້ເຂົ້າຮ່ວມໄດ້ຮັບຟັງການບັນຍາຍເອກະສານກ່ຽວກັບ ບົດບາດໜ້າທີ່, ສິດ ແລະ ພັນທະ ຂອງຊາວໜຸ່ມ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນໄລຍະຜ່ານມາ ໃຫ້ກຽດບັນຍາຍໂດຍ ສະຫາຍ ທອງແດງ ສານປະເສີດ ຮອງຫົວໜ້າກົມກວດກາ, ສູນກາງຊາວໜຸ່ມປະຊາຊົນປະຕິວັດລາວ. ຈາກນັ້ນ, ສະຫາຍ ເທບພະໄທ ພັນກ້າ ຮອງຫົວໜ້າກົມຕ້ານການສໍ້ລາດບັງຫຼວງ, ອົງການກວດກາລັດຖະບານ, ຄະນະກວດກາສູນກາງພັກ ກໍໄດ້ໃຫ້ໃຫ້ກຽດເຜີຍແຜ່ກົດໜາຍວ່າດ້ວຍ ການຕ້ານການສໍ້ລາດບັງຫຼວງ ແລະ ເຜີຍແຜ່ຍຸດທະສາດຕ້ານການສໍ້ລາດບັງຫຼວງ ແຕ່ນີ້ຮອດປີ 2020. ພ້ອມທັງສ້າງກິດຈະກໍາ ຖາມ-ຕອບ ເພື່ອຮັບເອົາຂອງລາງວັນນໍາຄະນະຮັບຜິດອີກດ້ວຍ.

ຂຽນຂ່າວ-ຖ່າຍພາບ: ຊາຍພິມພອນ

ປະເພດຂ່າວ: