ເປີດຊຸດອົບຮົມຄູຝຶກ ກ່ຽວກັບວິທີການສອນ ແລະ ຄວາມເອົາໃຈໃສ່ຕໍ່ບົດບາດຍິງ-ຊາຍ ທີ່ ເມືອງ ສັງທອງ

   ຊຸດຝຶກອົບຮົມດັ່ງກ່າວໄດ້ຈັດຂຶ້ນ ໃນຕອນເຊົ້າຂອງວັນທີ 11 ສິງຫາ 2020 ທີ່ສະໂມສອນເມືອງ ສັງທອງ ໂດຍການເປັນປະທານຂອງ ທ່ານ ພູທອນ ແກ້ວດວງມະນີ ຫົວໜ້າພະແນກຍຸຕິທຳນະຄອນຫຼວງວຽງຈັນ ແລະ ທ່ານ ນາງ ຮສ. ວົງແສງເດືອນ ປະຊາສຸກ ຫົວໜ້າພາກວິຊາ ຈິດຕະວິທະຍາ-ການສຶກສາ ມະຫາວິທະຍາໄລແຫ່ງຊາດ ມີ ຫົວໜ້າຫ້ອງການຍຸຕິທຳເມືອງ, ບັນດາຫ້ອງການອ້ອມຂ້າງເມືອງ, ຄະນະຮັບຜິດຊອບ, ຄູ-ອາຈານ ແລະ ນັກຝຶກອົບຮົມເຂົ້າຮ່ວມຢ່າງພ້ອມພຽງ.
   ຈຸດປະສົງຂອງການຝຶກອົບຮົມໃນຄັ້ງນີ້ ກໍເພື່ອເປັນການຍົກສູງຄວາມຮັບຮູ້, ເຂົ້າໃຈຂອງບັນດາອາຈານທີ່ຈະຂຶ້ນຫ້ອງສອນກົດໝາຍ 45 ວັນຂອງເມືອງ ສັງທອງ ໂດຍສະເພາະ ແມ່ນບັນດາວິທີການສອນ ແລະ ຄວາມເອົາໃຈໃສ່ຕໍ່ບົດບາດຍິງ-ຊາຍ ເພື່ອນຳໄປຖ່າຍທອດຄວາມຮູ້ໃຫ້ແກ່ຜູ້ເຂົ້າຮ່ວມຊຸດຝຶກອົບຮົມຂອງເມືອງ ສັງທອງ ຊຶ່ງເປົ້າໝາຍແມ່ນ 10 ບ້ານ ແລະ 7 ໂຮງຮຽນຂອງເມືອງ. ການຝຶກອົບຮົມດັ່ງກ່າວຈະດຳເນີນໄປເປັນເວລາ 7 ວັນຄື ແຕ່ວັນທີ 11-19 ສິງຫາ 2020 ຈຶ່ງຈະສໍາເລັດ.

   ໃນຕອນທ້າຍຂອງພິທີ ທ່ານ ພູທອນ ແກ້ວດວງມະນີ ຫົວໜ້າພະແນກຍຸຕິທຳນະຄອນຫຼວງວຽງຈັນ ກໍໄດ້ໃຫ້ກຽດໂອ້ລົມບັນດາຜູ້ເຂົ້າຮ່ວມຊຸດຝຶກອົບຮົມໃນຄັ້ງນີ້ ຈົ່ງພ້ອມກັນເອົາໃຈໃສ່ສຶກສາຄົ້ນຄວ້າຮໍ່າຮຽນ, ແລກປ່ຽນຄຳຄິດຄຳເຫັນ ແລະ ຍາດແຍ່ງເອົາຄວາມຮູ້, ຄວາມສາມາດນຳຄູອາຈານເພື່ອນຳເອົາຄວາມຮູ້, ທີ່ໄດ້ມາໄປໝູນໃຊ້ເຂົ້າໃນໜ້າທີ່ວຽກງານຂອບເຂດທີ່ຕົນເອງຮັບຜິດຊອບໃຫ້ເກີດຜົນປະໂຫຍດສູງສຸດ.

ຂຽນຂ່າວ: ອອ່ນຄຳ ໄຊຍະວົງ ພາບ: ສົມຫວັງ