ພິທີມອບ-ຮັບໜ້າທີ່ ແລະ ແຕ່ງຕັ້ງ-ຍົກຍ້າຍ ພະນັກງານຂັ້ນນຳ ຂອງພະແນກຍຸຕິທຳນະຄອນຫຼວງວຽງຈັນ

ໃນຕອນເຊົ້າຂອງວັນທີ 4 ສິງຫາ 2020 ຢູ່ທີ່ພະແນກຍຸຕິທຳນະຄອນຫຼວງວຽງຈັນ ໄດ້ມີພິທີມອບ-ຮັບໜ້າທີ່ຫົວໜ້າພະແນກຍຸຕິທຳນະຄອນຫຼວງວຽງຈັນ ລະຫວ່າງ ທ່ານ ບຸນເພັງ ສີນະວົງພອນ ຫົວໜ້າພະແນກຍຸຕິທຳນະຄອນຫຼວງວຽງຈັນ ຜູ້ເກົ່າ ແລະ ທ່ານ ພູທອນ ແກ້ວດວງມະນີ ຫົວໜ້າພະແນກຍຸຕິທຳນະຄອນຫຼວງວຽງຈັນ ຜູ້ໃໝ່ ໂດຍພາຍໃຕ້ການເປັນປະທານຂອງ ທ່ານ ລາດຊະນີວົງ ອະມາຣະທິທາດາ ຄະນະປະຈຳພັກ, ປະທານອົງການກວດກາພັກ, ຫົວໜ້າພະແນກກວດກາລັດ ນະຄອນຫຼວງວຽງຈັນ. ມີທ່ານຮອງຫົວໜ້າກົມຈັດຕັ້ງ ແລະ ພະນັກງານ ກະຊວງຍຸຕິທຳ, ຮອງຫົວໜ້າຄະນະຈັດຕັ້ງນະຄອນຫຼວງວຽງຈັນ, ຮອງຫົວໜ້າພະແນກການອ້ອມຂ້າງພາຍໃນນະຄອນຫຼວງວຽງຈັນ, ຕາງໜ້າສານປະຊາຊົນນະຄອນຫຼວງວຽງຈັນ, ອົງການໄອຍະການປະຊາຊົນນະຄອນຫຼວງວຽງຈັນ, ສະພາທະນາຍຄວາມ, ຄະນະພະແນກນະຄອນຫຼວງວຽງຈັນ, ຫົວໜ້າຫ້ອງການຍຸຕິທຳ 9 ຕົວເມືອງ, ຫົວໜ້າຂະແໜງ, ຮອງຫົວໜ້າຂະແໜງ ຕະຫຼອດຮອດພະນັກງານ-ລັດຖະກອນທັງໝົດພາຍໃນພະແນກຍຸຕິທຳນະຄອນຫຼວງວຽງຈັນ ເຂົ້າຮ່ວມຈຳນວນ 70 ທ່ານ, ຍິງ 29 ທ່ານ.

ທ່ານ ບຸນເພັງ ສີນະວົງພອນ ຫົວໜ້າພະແນກຍຸຕິທຳ ຜູ້ເກົ່າ ໄດ້ຜ່ານບົດລາຍງານ ການຊີ້ນຳ-ນຳພາ ໃນໄລຍະຜ່ານມາ ໂດຍທ່ານໄດ້ຍົກໃຫ້ເຫັນຜົນສຳເລັດຫຼາຍດ້ານ ແລະ ຕີລາຄາດ້ານດີທີ່ຕ້ອງໄດ້ສືບຕໍ່ເສີມຂະຫຍາຍ ແລະ ດ້ານອ່ອນ, ຂໍ້ຄົງຄ້າງທີ່ຈະຕ້ອງໄດ້ເອົາໃຈໃສ່ປັບປຸງແກ້ໄຂໃນຕໍ່ໜ້າ. ຫຼັງຈາກນັ້ນ, ທ່ານ ນາງ ດຳດວນ ຈັນທະວົງ ຮອງຄະນະຈັດຕັ້ງ ນະຄອນຫຼວງວຽງຈັນ ໄດ້ຂຶ້ນຜ່ານ ຄຳສັ່ງ ຂອງທ່ານເຈົ້າຄອງນະຄອນຫຼວງວຽງຈັນ ສະບັບເລກທີ 488/ຈນວ, ລົງວັນທີ 30.7.2020 ວ່າດ້ວຍການຍົກຍ້າຍພະນັກງານ ຍົກຍ້າຍ ທ່ານ ບຸນເພັງ ສີນະວົງພອນ ຫົວໜ້າພະແນກຍຸຕິທຳນະຄອນຫຼວງວຽງຈັນ ໄປປະຈຳການຢູ່ເມືອງ ຫາດຊາຍຟອງ ເພື່ອຮັບການແຕ່ງຕັ້ງເປັນເຈົ້າເມືອງ ຫາດຊາຍຟອງ; ຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ສະບັບເລກທີ 472/ຈນວ, ລົງວັນທີ 27.7.2020 ວ່າດ້ວຍການແຕ່ງຕັ້ງຫົວໜ້າພະແນກຍຸຕິທຳນະຄອນຫຼວງວຽງຈັນ ແຕ່ງຕັ້ງ ທ່ານ ພູທອນ ແກ້ວດວງມະນີ ຫົວໜ້າກົມໂຄສະນາເຜີຍແຜ່ກົດໝາຍ, ກະຊວງຍຸຕິທຳ ເປັນຫົວໜ້າພະແນກຍຸຕິທຳນະຄອນຫຼວງວຽງຈັນ; ມະຕິຕົກລົງຂອງຄະນະປະຈຳພັກນະຄອນຫຼວງວຽງຈັນ ສະບັບເລກທີ 631, ລົງວັນທີ 31.7.2020 ວ່າດ້ວຍການບົ່ງຕົວແຕ່ງຕັ້ງ ຜູ້ວ່າການເລຂາຄະນະພັກຮາກຖານພະແນກຍຸຕິທຳນະຄອນຫຼວງວຽງຈັນ ບົ່ງຕົວແຕ່ງຕັ້ງ ສະຫາຍ ພູທອນ ແກ້ວດວງມະນີ ຫົວໜ້າພະແນກຍຸຕິທຳນະຄອນຫຼວງວຽງຈັນ ເປັນຜູ້ວ່າການເລຂາຄະນະພັກຮາກຖານພະແນກຍຸຕິທຳນະຄອນຫຼວງວຽງຈັນ ແລະ ຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ສະບັບເລກທີ 417/ຈນວ, ລົງວັນທີ 1.7.2020 ວ່າດ້ວຍການແຕ່ງຕັ້ງພະນັກງານ ແຕ່ງຕັ້ງ ທ່ານ ສີວຽງທອງ ສໍຜາບມີໄຊ ຫົວໜ້າຂະແໜງຈັດຕັ້ງ-ພະນັກງານ ແລະ ກວດກາ ເປັນຮອງຫົວໜ້າພະແນກຍຸຕິທຳ ນະຄອນຫຼວງວຽງຈັນ; ທ່ານ ສັກດາ ອາດວາລີ ຫົວໜ້າຂະແໜງສົ່ງເສີມວຽກງານຍຸຕິທຳ ເປັນຮອງຫົວໜ້າພະແນກຍຸຕິທຳນະຄອນຫຼວງວຽງຈັນ; ຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ສະບັບເລກທີ 415/ຈນວ, ລົງວັນທີ 1.7.2020 ວ່າດ້ວຍການຍົກຍ້າຍພະນັກງານ ຍົກຍ້າຍ ທ່ານ ບົວເກດ ພົມມະຈັນ ຮອງຫົວໜ້າພະແນກຍຸຕິທຳ ນະຄອນຫຼວງວຽງຈັນ ໄປປະຈຳການຢູ່ສະພາປະຊາຊົນນະຄອນຫຼວງວຽງຈັນ ເພື່ອສືບຕໍ່ປະຕິບັດໜ້າທີ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນນະຄອນຫຼວງວຽງຈັນ. ຈາກນັ້ນ ໄດ້ມີພິທີເຊັນມອບ-ຮັບໜ້າທີ່ ຫົວໜ້າພະແນກຍຸຕິທຳ ນະຄອນຫຼວງວຽງຈັນ ລະຫວ່າງ ທ່ານ ບຸນເພັງ ສີນະວົງພອນ ຫົວໜ້າພະແນກຍຸຕິທຳນະຄອນຫຼວງວຽງຈັນ ຜູ້ເກົ່າ ແລະ ທ່ານ ພູທອນ ແກ້ວດວງມະນີ ຫົວໜ້າພະແນກຍຸຕິທຳນະຄອນຫຼວງວຽງຈັນ ຜູ້ໃໝ່ ຂຶ້ນ.

ໃນພິທີ ຍັງໄດ້ຮັບຟັງການໂອ້ລົມຂອງ ທ່ານ ລາດຊະນີວົງ ອະມາຣະທິທາດາ ຄະນະປະຈຳພັກ, ປະທານອົງການກວດກາພັກ, ຫົວໜ້າພະແນກກວດກາລັດ ນະຄອນຫຼວງວຽງຈັນ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ຫົວໜ້າພະແນກຍຸຕິທຳ ນະຄອນຫຼວງວຽງຈັນ ຜູ້ເກົ່າ ຊີ້ນຳ-ນຳພາ ແລະ ສາມາດຍາດມາໄດ້ ໃນໄລຍະຜ່ານມາ; ພ້ອມນັ້ນ, ທ່ານຍັງໄດ້ຮຽກຮ້ອງໃຫ້ຫົວໜ້າພະແນກຍຸຕິທຳ ນະຄອນຫຼວງວຽງຈັນ ຜູ້ໃໝ່ ຈົ່ງສືບຕໍ່ຊີ້ນຳ-ນຳພາດ້ານແນວຄິດການເມືອງຂອງພະນັກງານຢູ່ໃນຄວາມຮັບຜິດຊອບຂອງຕົນ ໃຫ້ຍາດໄດ້ຜົນງານ ແລະ ຜົນສຳເລັດຍິ່ງໃຫຍ່ກວ່າເກົ່າ.

ຂຽນຂ່າວ-ຖ່າຍພາບ: ຊາຍພິມພອນ ສີຣິວົງໄຊ