ພິທີມອບ-ຮັບໜ້າທີ່ ຫົວໜ້າກົມໂຄສະນາເຜີຍແຜ່ກົດໝາຍ ທີ ກະຊວງຍຸຕິທຳ

ໂດຍອີງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ ໃນຕອນບ່າຍຂອງວັນທີ 05 ສິງຫາ 2020 ຢູ່ທີ່ຫ້ອງປະຊຸມໃຫຍ່ຂອງກະຊວງຍຸຕິທຳ ໄດ້ມີພິທີມອບ-ຮັບໜ້າທີ່ຫົວໜ້າກົມໂຄສະນາເຜີຍແຜ່ກົດໝາຍ ລະຫວ່າງ ຜູ້ເກົ່າ ແລະ ຜູ້ໃໝ່ຂຶ້ນ ໂດຍການເປັນປະທານຂອງ ທ່ານ ໄຊສີ ສັນຕິວົງ ກຳມະການສູນກາງພັກ, ລັດຖະມົນຕີກະຊວງຍຸຕິທຳ ເຂົ້າຮ່ວມມີບັນດາທ່ານຮອງລັດຖະມົນຕີ, ຫົວໜ້າຫ້ອງການ, ຫົວໜ້າກົມ-ຮອງຫົວໜ້າກົມ ຕະຫຼອດຮອດພະນັກງານຂອງກົມໂຄສະນາເຜີຍແຜ່ກົດໝາຍ ເຂົ້າຮ່ວມຢ່າງພ້ອມພຽງ.

ໃນພິທີທ່ານ ບຸນທາ ຊົ່ງເຢີທ່າວ ກຳມະການພັກກະຊວງ ຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານມະຕິຄຳສັ່ງຂອງຄະນະເລຂາທິການສູນກາງພັກ ແລະ ຄຳສັ່ງຂອງນາຍົກລັດຖະມົນຕີ ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ ແລະ ເອກະສານອຶ່ນໆທີ່ກ່ຽວຂ້ອງ ຫຼັງຈາກນັ້ນ ທ່ານ ພູທອນ ແກ້ວດວງມະນີ ກໍໄດ້ຂຶ້ນຜ່ານບົດລາຍງານການຊີ້ນຳ-ນຳ ພາ ໃນໄລຍະຜ່ານມາ ພ້ອມດຽວກັນນັ້ນໃນພິທີກໍໄດ້ມີການເຊັນບົດບັນທຶກ ມອບ-ຮັບໜ້າທີ່ ລະຫວ່າງ ທ່ານ ພູທອນ ແກ້ວດວງມະນີ ຫົວໜ້າກົມໂຄສະນາເຜີຍແຜ່ກົດໝາຍ ຜູ້ເກົ່າ ກັບ ທ່ານ ນາງ ສີສຸດາ ໂສພາວັນດີ ວ່າການຫົວໜ້າກົມໂຄສະນາເຜີຍແຜ່ກົດໝາຍ ຜູ້ໃໝ່ ໂດຍການເຂົ້າຮ່ວມເປັນສັກຂີພະຍານຂອງຄະນະພັກ-ຄະນະນຳຂອງກະຊວງຍຸຕິທຳ.

ໃນຕອນທ້າຍຂອງພິທີທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ ກໍໄດ້ໃຫ້ກຽດໂອ້ລົມກ່ອນອື່ນທ່ານກໍໄດ້ກ່າວຍ້ອງຍໍຊົມເຊີຍຕໍ່ຜົນສຳເລັດທີ່ກົມໂຄສະນາເຜີຍແຜ່ກົດໝາຍ ຍາດມາໄດ້ໃນໄລຍະຜ່ານມາ ພ້ອມນັ້ນ ຍັງໄດ້ຮຽກຮ້ອງໃຫ້ຜູ້ທີ່ໄດ້ຮັບໜ້າທີ່ໃໝ່ ຈົ່ງເອົາໃຈໃສ່ຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ແລະ ຕັ້ງໜ້າເສີມຂະຫຍາຍມູນເຊື້ອອັນດີງາມຂອງກົມໂຄສະນາເຜີຍແຜ່ກົດໝາຍ ແລະ ເຮັດສຳເລັດໜ້າທີ່ ທີ່ການຈັດຕັ້ງມອບໝາຍໃຫ້ໄດ້ຮັບຜົນສຳເລັດ.

ຂຽນຂ່າວ: ອອ່ນຄຳ ໄຊຍະວົງ ພາບ: ຊາຍພິມພອນ

ປະເພດຂ່າວ: