ພິທີປິດຊຸດຝຶກອົບຮົມ ວຽກງານການສື່ສານ ແລະ ຜະລິດສື່ໂຄສະນາເຜີຍແຜ່ກົດໝາຍ

ພິທີດັ່ງກ່າວຈັດຂຶ້ນໃນວັນທີ 19 ມິຖຸນາ 2020 ທີ່ ໂຮງແຮມທະວີສຸກ, ເມືອງ ວັງວຽງ, ແຂວງ ວຽງຈັນ ໂດຍການເປັນປະທານຂອງ ທ່ານ ພູທອນ ແກ້ວດວງມະນີ ຫົວໜ້າກົມໂຄສະນາເຜີຍແຜ່ກົດໝາຍ, ມີທ່ານຮອງຫົວໜ້າກົມໂຄສະນາເຜີນແຜ່ກົດໝາຍ, ຫົວໜ້າພະແນກ, ຮອງພະແນກ, ບັນດານັກຝຶກອົບຮົມທີ່ມາຈາກ ກົມໂຄສະນາເຜີຍແຜ່ກົດໝາຍ, ພະແນກຍຸຕິທຳນະຄອນຫຼວງວຽງຈັນ, ແຂວງ ວຽງຈັນ, ບໍລິຄຳໄຊ, ໄຊສົມບູນ, ທະນາຄານແຫ່ງ ສປປ ລາວ, ຫ້ອງການຍຸຕິທຳເມືອງ ວັງວຽງ ແລະ ຄະນະຮັບຜິດຊອບຊຸດຝຶກອົບຮົມ ເຂົ້າຮ່ວມ 30 ທ່ານ ຍິງ 9 ທ່ານ.

ຈຸດປະສົງ ເພື່ອຍົກລະດັບຄວາມຮູ້, ຄວາມສາມາດ ທາງດ້ານການສື່ສານທີ່ມີປະສິດທິພາບ ຮັບປະກັນໃຫ້ແກ່ການໂຄສະນາເຜີຍແຜ່ກົດໝາຍໃຫ້ຖືກຕ້ອງຕາມສະພາບການຕົວຈິງ; ເສີມສ້າງຄວາມຮູ້ທາງດ້ານເຕັກນິກວິຊາການ ກ່ຽວກັບການອອກແບບສື່ໂຄສະນາ, ສື່ສິ່ງພິມ ແລະ ເຄື່ອງມືສື່ສານຕ່າງໆ ໃຫ້ແກ່ພະນັກງານໃນຂົງເຂດໂຄສະນາເຜີຍແຜ່ກົດໝາຍໃຫ້ສູງຂຶ້ນ. ໂດຍສະເພາະ ການໂຄສະນາຜ່ານສື່ຕ່າງໆ ເພື່ອໃຫ້ແທດເໝາະກັບເປົ້າໝາຍຂອງການໂຄສະນາ. ຫຼັງຈາກຝຶກພາກທິດສະດີແລ້ວ ນັກຝຶກອົບຮົມ ໄດ້ລົງພາກປະຕິບັດຕົວຈິງ ຢູ່ ບ້ານໂພນຄຳ, ເມືອງ ວັງວຽງ ແຂວງ ວຽງຈັນ.

ໃນຕອນທ້າຍ ທ່ານປະທານ ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະຮັບຜິດຊອບ, ຄູ-ອາຈານ ທີ່ໄດ້ເອົາໃຈໃສ່ ແລະ ມີຄວາມຮັບຜິດຊອບສູງ ພ້ອມທັງຍ້ອງຍໍຊົມເຊີຍນັກຝຶກອົບຮົມທຸກທ່ານທີ່ມີຄວາມມານະອົດທົນ, ຕັ້ງໃຈຮັບຟັງການບັນຍາຍ ແລະ ແລກປ່ຽນ, ຖອດຖອນບົດຮຽນກັບ ຄູ-ອາຈານ ທາງດ້ານທິດສະດີ ແລະ ພຶດຕິກຳຕົວຈິງ; ພ້ອມນັ້ນ ທ່ານປະທານຍັງຮຽກຮ້ອງມາຍັງນັກຝຶກອົບຮົມທຸກທ່ານ ຈົ່ງພ້ອມກັນນໍາເອົາຄວາມຮູ້ທີ່ໄດ້ຮ່ຳຮຽນມາໄປຈັດຕັ້ງຜັນຂະຫຍາຍ, ໝູນໃຊ້ເຂົ້າໃນການຈັດຕັ້ງປະຕິບັດວຽກງານຕົວຈິງໃຫ້ມີປະສິດທິພາບ ແລະ ປະສິດທິຜົນສູງຂຶ້ນເລື້ອຍໆ

ຊຸດຝຶກອົບຮົມຄັ້ງນີ້ ແມ່ນໄດ້ຮັບການສະໜັບສະໜູນຈາກ ແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ໂຄງການ CEGGA).

ຂ່າວ-ພາບ: ຊາຍພິມພອນ ສີຣິວົງໄຊ

ປະເພດຂ່າວ: