ຝຶກອົບຮົມ ວຽກງານການສື່ສານ ແລະ ຜະລິດສື່ໂຄສະນາເຜີຍແຜ່ກົດໝາຍ

ໃນຕອນເຊົ້າຂອງວັນທີ 15 ມິຖຸນາ 2020 ກົມໂຄສະນາເຜີຍແຜ່ກົດໝາຍ ກະຊວງຍຸຕິທໍາ ໄດ້ເປີດຊຸດຝຶກອົບຮົມ ວຽກງານການສື່ສານ ແລະ ຜະລິດສື່ໂຄສະນາເຜີຍແຜ່ກົດໝາຍ ຂຶ້ນທີ່ ໂຮງແຮມທະວີສຸກ, ເມືອງ ວັງວຽງ, ແຂວງ ວຽງຈັນ ໂດຍການເປັນປະທານຂອງ ທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທໍາ, ເຂົ້າຮ່ວມມີ ທ່ານ ພູທອນ ແກ້ວດວງມະນີ ຫົວໜ້າກົມໂຄສະນາເຜີຍແຜ່ກົດໝາຍ, ທ່ານຮອງຫົວໜ້າກົມໂຄສະນາເຜີນແຜ່ກົດໝາຍ, ຫົວໜ້າພະແນກ, ຮອງພະແນກ, ບັນດາພະນັກງານວິຊາການພາຍໃນກົມ, ພະນັກງານທີ່ເຮັດວຽກໂຄສະນາເຜີຍແຜ່ກົດໝາຍ ທີ່ມາຈາກພະແນກຍຸຕິທຳນະຄອນຫຼວງວຽງຈັນ, ແຂວງ ວຽງຈັນ, ບໍລິຄຳໄຊ, ໄຊສົມບູນ, ທະນາຄານແຫ່ງ ສປປ ລາວ, ຫ້ອງການຍຸຕິທຳເມືອງວັງວຽງ ແລະ ຄະນະຮັບຜິດຊອບຊຸດຝຶກອົບຮົມ ເຂົ້າຮ່ວມ 30 ທ່ານ ຍິງ 9 ທ່ານ.

ຈຸດປະສົງ ເພື່ອຍົກລະດັບຄວາມຮູ້, ຄວາມສາມາດ ທາງດ້ານການສື່ສານທີ່ມີປະສິດທິພາບ ຮັບປະກັນໃຫ້ແກ່ການໂຄສະນາເຜີຍແຜ່ກົດໝາຍໃຫ້ຖືກຕ້ອງຕາມສະພາບການຕົວຈິງ; ເສີມສ້າງຄວາມຮູ້ທາງດ້ານເຕັກນິກວິຊາການ ກ່ຽວກັບການອອກແບບສື່ໂຄສະນາ, ສື່ສິ່ງພິມ ແລະ ເຄື່ອງມືສື່ສານຕ່າງໆ ໃຫ້ແກ່ພະນັກງານໃນຂົງເຂດໂຄສະນາເຜີຍແຜ່ກົດໝາຍໃຫ້ສູງຂຶ້ນ. ໂດຍສະເພາະ ການໂຄສະນາຜ່ານສື່ຕ່າງໆ ເພື່ອໃຫ້ແທດເໝາະກັບເປົ້າໝາຍຂອງການໂຄສະນາ. ຫຼັງຈາກຝຶກພາກທິດສະດີແລ້ວ ນັກຝຶກອົບຮົມ ຈະໄດ້ລົງພາກປະຕິບັດຕົວຈິງ ຢູ່ ບ້ານ ໂພນຄຳ ແລະ ບ້ານ ນາທອງ, ເມືອງ ວັງວຽງ ແຂວງ ວຽງຈັນ.
ໃນຕອນທ້າຍ ທ່ານປະທານກອງປະຊຸມ ກໍໄດ້ສະແດງຄວາມຍ້ອງຍໍຊົມເຊີຍ ແລະ ຮຽກຮ້ອງມາຍັງ ຄະນະຮັບຜິດຊອບຊຸດຝຶກອົບຮົມ, ຜູ້ເຂົ້າຮ່ວມຝຶກອົບຮົມ ພ້ອມດ້ວຍວິທະຍາກອນ ຈົ່ງພ້ອມກັນເຊີດຊູຄວາມຮັບຜິດຊອບໃນການເຂົ້າຮ່ວມ ແລະ ປະຕິບັດຕາມໂມງເວລາຢ່າງເຂັ້ມງວດ, ຍົກສູງຄວາມເປັນເຈົ້າການໃນການຄົ້ນຄວ້າ ແລະ ແລກປ່ຽນບົດຮຽນກັບຄູຝຶກຢ່າງກວ້າງຂວາງ ແລະ ເລິກເຊິ່ງ ເພື່ອໃຫ້ຊຸດຝຶກອົບຮົມຄັ້ງນີ້ໄດ້ຮັບຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້.
ຊຸດຝຶກອົບຮົມຄັ້ງນີ້ ແມ່ນຈະດຳເນີນໄປຈົນເຖິງ ວັນທີ 19 ມິຖຸນາ 2020 ຈຶ່ງຈະສຳເລັດ ຊຶ່ງໄດ້ຮັບການສະໜັບສະໜູນຈາກ ແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ໂຄງການ CEGGA).

ຂ່າວ-ພາບ: ຊາຍພິມພອນ ສີຣິວົງໄຊ

ປະເພດຂ່າວ: