ຝຶກອົບຮົມວຽກງານສື່ສານ ແລະ ເຕັກນິກການໂຄສະນາເຜີຍແຜ່ກົດໝາຍ

ໃນຕອນເຊົ້າຂອງວັນທີ 12 ຕຸລາ 2020 ກົມໂຄສະນາເຜີຍແຜ່ກົດໝາຍ ກະຊວງຍຸຕິທໍາ ໄດ້ເປີດຊຸດຝຶກອົບຮົມວຽກງານການສື່ສານ ແລະ ເຕັກນິກໂຄສະນາເຜີຍແຜ່ກົດໝາຍ ຂຶ້ນ ທີ່ໂຮງແຮມຈຳປາສັກແກຣນ, ນະຄອນ ປາກເຊ, ແຂວງ ຈຳປາສັກ ໂດຍການເປັນປະທານຂອງ ທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທໍາ, ເຂົ້າຮ່ວມມີ ທ່ານ ນາງ ສີສຸດາ ໂສພາວັນດີ ວ່າການຫົວໜ້າກົມໂຄສະນາເຜີຍແຜ່ກົດໝາຍ, ກະຊວງຍຸຕິທຳ; ຫົວໜ້າພະແນກ, ຮອງພະແນກ, ບັນດາພະນັກງານວິຊາການພາຍໃນກົມ, ພະນັກງານທີ່ເຮັດວຽກໂຄສະນາເຜີຍແຜ່ກົດໝາຍ ທີ່ມາຈາກພະແນກຍຸຕິທຳ ແຂວງ ຄຳມ່ວນ, ສະຫວັນນະເຂດ, ເຊກອງ, ສາລະວັນ, ອັດຕະປື, ຈຳປາສັກ ແລະ ຄະນະຮັບຜິດຊອບຊຸດຝຶກອົບຮົມ ເຂົ້າຮ່ວມ 44 ທ່ານ ຍິງ 15 ທ່ານ.
ຈຸດປະສົງ ເພື່ອຍົກລະດັບຄວາມຮູ້, ຄວາມສາມາດ ທາງດ້ານການສື່ສານທີ່ມີປະສິດທິພາບ ຮັບປະກັນໃຫ້ແກ່ການໂຄສະນາເຜີຍແຜ່ກົດໝາຍໃຫ້ຖືກຕ້ອງຕາມສະພາບການຕົວຈິງ; ເສີມສ້າງຄວາມຮູ້ທາງດ້ານເຕັກນິກວິຊາການ ກ່ຽວກັບການອອກແບບສື່ໂຄສະນາ, ສື່ສິ່ງພິມ, ການຂຽນຂ່າວ ແລະ ເຄື່ອງມືສື່ສານຕ່າງໆ ໃຫ້ແກ່ພະນັກງານໃນຂົງເຂດໂຄສະນາເຜີຍແຜ່ກົດໝາຍໃຫ້ສູງຂຶ້ນ. ໂດຍສະເພາະ ການໂຄສະນາຜ່ານສື່ຕ່າງໆ ເພື່ອໃຫ້ແທດເໝາະກັບເປົ້າໝາຍຂອງການໂຄສະນາ. ຊຸດຝຶກອົບຮົມໃນຄັ້ງນີ້ ຜູ້ເຂົ້າຮ່ວມ ຈະໄດ້ຮຽນຮູ້ເຖິງ ທິດສະດີກ່ຽວກັບວຽກງານສື່ສານ, ຄວາມຮັບຮູ້ທົ່ວໄປກ່ຽວກັບການໂຄສະນາເຜີຍແຜ່ກົດໝາຍ, ເຕັກນິກການໂຄສະນາທາງປາກເປົ່າ, ຄວາມຮັບຮູ້ທົ່ວໄປກ່ຽວກັບຂ່າວ ແລະ ເຕັກນິກການຂຽນຂ່າວ, ເຕັກນິກການຈັດລາຍການວິທະຍຸ ແລະ ທັກສະການຖ່າຍຮູບພາບນິ້ງ. ຫຼັງຈາກຝຶກພາກທິດສະດີແລ້ວ ນັກຝຶກອົບຮົມ ຈະໄດ້ລົງພາກປະຕິບັດຕົວຈິງ ຢູ່ ບ້ານເປົ້າໝາຍ ຂອງແຂວງ ຈຳປາສັກນຳອີກ.
ໃນຕອນທ້າຍ ທ່ານປະທານກອງປະຊຸມ ກໍໄດ້ສະແດງຄວາມຍ້ອງຍໍຊົມເຊີຍ ແລະ ຮຽກຮ້ອງມາຍັງ ຄະນະຮັບຜິດຊອບຊຸດຝຶກອົບຮົມ, ຜູ້ເຂົ້າຮ່ວມຝຶກອົບຮົມ ພ້ອມດ້ວຍຄູຝຶກ ຈົ່ງພ້ອມກັນເຊີດຊູຄວາມຮັບຜິດຊອບໃນການເຂົ້າຮ່ວມ ແລະ ປະຕິບັດຕາມໂມງເວລາຢ່າງເຂັ້ມງວດ, ຍົກສູງຄວາມເປັນເຈົ້າການໃນການຄົ້ນຄວ້າ ແລະ ແລກປ່ຽນບົດຮຽນກັບຄູຝຶກຢ່າງກວ້າງຂວາງ ແລະ ເລິກເຊິ່ງ ເພື່ອໃຫ້ຊຸດຝຶກອົບຮົມຄັ້ງນີ້ໄດ້ຮັບຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້.

ຊຸດຝຶກອົບຮົມ ແມ່ນຈະດຳເນີນໄປຈົນເຖິງ ວັນທີ 16 ຕຸລາ 2020 ຈຶ່ງຈະສຳເລັດ ຊຶ່ງໄດ້ຮັບການສະໜັບສະໜູນຈາກ ແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ໂຄງການ CEGGA).

ຂ່າວ-ພາບ: ຊາຍພິມພອນ ສີຣິວົງໄຊ

ປະເພດຂ່າວ: