ກອງປະຊູມ ປັບປຸງຮ່າງດຳລັດ ວ່າດ້ວຍ ການໂຄສະນາເຜີຍແຜ່ກົດໝາຍ

ກອງປະຊຸມໄດ້ຈັດຂຶ້ນ ໃນລະຫວ່າງວັນທີ 5-7 ກຸມພາ 2020 ຢູ່ທີ່ ເມືອງ ວັງວຽງ ແຂວງ ວຽງຈັນ ໂດຍການເປັນປະທານ ຂອງ ທ່ານ ປ.ອ ເສີມສຸກ ສິມພະວົງ ຮອງລັດຖະມົນຕີ ກະຊວງຍຸຕິທຳ ມີ ທ່ານ ຫົວໜ້າ, ຮອງຫົວໜ້າກົມ ໂຄສະນາເຜີຍແຜ່ກົດໝາຍ ກະຊວງ ຍຸຕິທຳ, ຕາງໜ້າ ຈາກຫ້ອງວ່າການສຳນັກງານນາຍົກລັດຖະມົນຕີ, ທ່ານ ສົມພູ ແກ້ວມູນມະນີ ທີ່ປຶກສາແຜນງານເຊກາ, ຕາງໜ້າຄະນະໂຄສະນາອົບຮົມສູນກາງພັກ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ແລະ ຄະນະຮັບຜິດຊອບສ້າງຮ່າງດຳລັດເຂົ້າຮ່ວມທັງໝົດ 27 ທ່ານ, ຍິງ 8 ທ່ານ.

ທ່ານ ພູທອນ ແກ້ວດວງມະນີ ຫົວໜ້າກົມ ໂຄສະນາເຜີຍແຜ່ກົດໝາຍ ກະຊວງຍຸຕິທຳ ໄດ້ຜ່ານຈຸດປະສົງ, ເຫດຜົນ ແລະ ຄວາມຈຳເປັນໃນການປັບປຸງຮ່າງດຳລັດວ່າດ້ວຍການໂຄສະນາເຜີຍແຜ່ກົດໝາຍໃນຄັ້ງນີ້ ແມ່ນເພື່ອຄົ້ນຄວ້າ, ຮຽບຮຽງ, ພິຈາລະນາ ຄໍາຄິດເຫັນ ຂອງບັນດາສະມາຊິກລັດຖະບານ ທີ່ໄດ້ປະກອບ ຄໍາເຫັນໃສ່ຮ່າງດໍາລັດສະບັບດັ່ງກ່າວ ໃຫ້ມີຄວາມລະອຽດ, ເລິກເຊິ່ງ, ແທດເໝາະກັບສະພາບຄວາມຄວາມເປັນຈິງ ແລະ ສອດຄ່ອງກັບກົດໝາຍ ເປັນຕົ້ນ ແມ່ນ ຊື່, ເນື້ອໃນ, ບາງມາດຕາ ແລະ ຄໍາສັບຈໍານວນໜຶ່ງ ໃຫ້ມີຄວາມສອດຄ່ອງ ແລະ ແທດເໝາະກັບສະພາບຄວາມເປັນຈິງ.
ໂອກາດດັ່ງກ່າວນີ້ ທ່ານ ປ.ອ ເສີມສຸກ ສິມພະວົງ ຮອງລັດຖະມົນຕີ ກະຊວງຍຸຕິທຳ ກໍໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມ ຈົ່ງພ້ອມກັນເອົາໃຈໃສ່ ຄົ້ນຄວ້າ, ປະກອບຄໍາເຫັນໃສ່ຮ່າງດໍາລັດສະບັບດັ່ງກ່າວນີ້ ດ້ວຍຄວາມຮັບຜິດຊອບສູງ ແລະ ມີຄວາມເປັນເອກະພາບກັນ ເພື່ອນໍາສະເໜີຕໍ່ຂັ້ນເທິງພິຈາລະນາ.

ຂຽນຂ່າວ, ຖ່າຍພາບ: ສົມຫວັງ ບົວລະພັນ

ປະເພດຂ່າວ: