ກອງປະຊຸມຄົ້ນຄວ້າປຶກສາຫາລື ແລະ ປະກອບຄໍາເຫັນໃສ່ຮ່າງປຶ້ມຄູ່ມືການໂຄສະນາເຜີຍແຜ່ນິຕິກໍາ, ແຜ່ນຂໍ້ມູນດ້ານນິຕິກໍາ ແລະ ເພສຊ່ວຍເຫຼືອທາງດ້ານກົດໝາຍ

ໃນລະຫວ່າງວັນທີ 7-9 ຕຸລາ 2020 ທີ່ຜ່ານມາກົມໂຄສະນາເຜີຍແຜ່ກົດໝາຍ, ກະຊວງຍຸຕິທໍາ ໄດ້ຈັດກອງປະຊຸມຄົ້ນຄວ້າປຶກສາຫາລື ແລະ ປະກອບຄໍາເຫັນໃສ່ຮ່າງປຶ້ມຄູ່ມືໂຄສະນາເຜີຍແຜ່ນິຕິກໍາ, ແຜ່ນຂໍ້ມູນທາງດ້ານນິຕິກຳ ແລະ ເພສຊ່ວຍເຫຼືອທາງດ້ານກົດໝາຍຂຶ້ນ ຢູ່ທີ່ ລີຊອດນາປ່າກວາງ ເມືອງ ແກ້ວອຸດົມ ແຂວງ ວຽງຈັນ. ໂດຍການເປັນປະທານຂອງທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທໍາ, ເຂົ້າຮ່ວມມີທ່ານ ນ. ໂຊຟາຢາ ຄາເຊິນ ຫົວໜ້າແຜນງານຄຸ້ມຄອງລັດດ້ວຍກົດໝາຍ ມູນນິທິເອເຊຍ ພ້ອມດ້ວຍຄະນະ, ມີບັນດາທ່ານຫົວໜ້າກົມ, ຮອງຫົວໜ້າກົມ, ຫົວໜ້າ, ຮອງຫົວໜ້າພະແນກ ແລະ ວິຊາການຂອງກົມທີ່ກ່ຽວຂ້ອງເຂົ້າຮ່ວມທັງໝົດຈໍານວນ 28 ທ່ານ, ຍິງ 11 ທ່ານ.
ຈຸດປະສົງຂອງກອງປະຊຸມ ແມ່ນເພື່ອເປັນການຄົ້ນຄວ້າ ປຶກສາຫາລືກ່ຽວກັບ ການຮ່າງປຶ້ມຄູ່ມືໂຄສະນາເຜີຍແຜ່ນິຕິກໍາ, ແຜ່ນຂໍ້ມູນທາງດ້ານນິຕິກໍາ ແລະ ເພສຊ່ວຍເຫຼືອທາງດ້ານກົດໝາຍ ແນໃສ່ເຮັດໃຫ້ພົນລະເມືອງລາວບັນດາເຜົ່າສາມາດເຂົ້າເຖິງຂະບວນການຍຸຕິທໍາ, ສາມາດຮັບຮູ້, ເຂົ້າໃຈ ກົດໝາຍ ແລະ ລະບຽບການທີ່ວາງອອກໂດຍສະເພາະບັນດາກົດໝາຍທີ່ຕິດພັນກັບການດໍາລົງຊີວິດປະຈໍາວັນ ໃຫ້ນັບມື້ນັບກວ້າງຂວາງ ແລະ ເລິກເຊິ່ງຂຶ້ນ.

ໃນຕອນທ້າຍຂອງກອງປະຊຸມ ທ່ານ ປະທານກອງປະຊຸມກໍໄດ້ມີຄໍາເຫັນໂອ້ລົມຕໍ່ຜູ້ເຂົ້າຮ່ວມໃນກອງປະຊຸມ ຊຶ່ງກ່ອນອື່ນທ່ານກໍໄດ້ສະແດງຄວາມຂອບໃຈຕໍ່ມູນນິທິເອເຊຍທີ່ໃຫ້ການສະໜັບສະໜູນໃນການເຄື່ອນໄຫວວຽກງານໃນຄັ້ງນີ້. ພ້ອມກັນນັ້ນທ່ານຍັງໄດ້ເນັ້ນໜັກໃຫ້ຜູ້ເຂົ້າຮ່ວມກອງປະຊຸມຈົ່ງພ້ອມກັນເອົາໃຈໃສ່ຄົ້ນຄວ້າ ແລະ ປະກອບຄໍາເຫັນສຸມທຸກສະຕິປັນຍາເຂົ້າໃສ່ວຽກງານດັ່ງກ່າວນີ້ດ້ວຍຄວາມຮັບຜິດຊອບສູງ ເພື່ອໃຫ້ວຽກງານດັ່ງກ່າວສໍາເລັດຕາມຄາດໝາຍທີ່ວາງໄວ້.

ຂຽນຂ່າວ-ຖ່າຍພາບ: ສີປະໄພ ເພັດປະທຸມມາ

ປະເພດຂ່າວ: