ກົມກວດກາ ແລະ ປະເມີນຜົນນິຕິກໍາ ສ້າງຂະບວນການແຂ່ງຂັນກິລາຕ້ອນຮັບວັນສໍາຄັນຂອງຊາດ

         ໃນຕອນບ່າຍຂອງວັນທີ 31 ມີນາ 2021 ທີ່ຜ່ານມາ, ກົມກວດກາ ແລະ ປະເມີນຜົນນິຕິກໍາ ໄດ້ສ້າງຂະບວນການແຂ່ງຂັນກິລາເປຕັງພາຍໃນກົມ ຂຶ້ນ ໂດຍການນໍາພາຂອງ ທ່ານ ນະລົງລິດ ນໍລະສິງ ຫົວໜ້າກົມກວດກາ ແລະ ປະເມີນຜົນນິຕິກໍາ (ກກປ) ກະຊວງຍຸຕິທໍາ ມີຄະນະບໍລິຫານງານພັກ, ຫົວໜ້າກົມ, ຕາງໜ້າກົມກວດກາ, ສູນແກ້ໄຂຂໍ້ຂັດແຍ່ງທາງດ້ານເສດຖະກິດ, ກົມທະບຽນສານ ແລະ ພະນັກງານ-ລັດຖະກອນພາຍໃນກົມເຂົ້າຮ່ວມ.

ໃນພິທີກ່າວເປີດການແຂ່ງຂັນ, ສະຫາຍ ນະລົງລິດ ນໍລະສິງ ໄດ້ກ່າວໃຫ້ຮູ້ວ່າ: “ຈຸດປະສົງຂອງການແຂ່ງຂັນກິລາເປຕັງສາມັກຄີພາຍໃນກົມ ແມ່ນເພື່ອສ້າງຂະບວນການສະເຫຼີມສະຫຼອງວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 66 ປີ (22 ມີນາ 1955-22 ມີນາ 2021), ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ (5 ເມສາ 1961-5 ເມສາ 2021), ວັນເສຍອົງຄະ ແລະ ເສຍສະລະຊີວິດເພື່ອປະເທດຊາດ ຄົບຮອບ 66 ປີ (21 ມີນາ 1995-21 ມີນາ 2021) ທັງເປັນການສ້າງບັນຍາກາດ ແລະ ຮັດແໜ້ນຄວາມສາມັກຄີພາຍໃນ, ສ້າງຮ່າງກາຍ ແລະ ຈິດໃຈໃຫ້ແຂງແຮງ, ສ້າງເງື່ອນໄຂ ແລະ ໂອກາດໃຫ້ຄະນະກົມ ແລະ ບັນດາພະນັກງານ-ລັດຖະກອນພາຍໃນກົມ ໄດ້ໃກ້ຊິດຕິດແທດກັນຍິ່ງຂຶ້ນ ເພື່ອປະກອບສ່ວນເຂົ້າໃນການຈັດຕັ້ງຜັນຂະຫຍາຍ ແລະ ປະຕິບັດມະຕິຂອງກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງຍຸຕິທຳ, ມະຕິກອງປະຊຸມໃຫຍ່ ຄັ້ງທີ I ຂອງໜ່ວຍພັກ ກກປ, ແຜນພັດທະນາຂອງກົມ ແລະ ບັນດາຂໍ້ແຂ່ງຂັນຂອງສາມອົງການຈັດຕັ້ງມະຫາຊົນພາຍໃນກົມ.

         ການແຂ່ງຂັນໄດ້ແບ່ງເປັນ 4 ທີມ ພາຍໃນກົມ ຄື: ທີມພະແນກບໍລິຫານ, ທີມພະແນກສັນຍາ, ທີມພະແນກປະເມີນຜົນນິຕິກໍາ, ແລະ ທີມພະແນກກວດການິຕິກໍາ ຜົນຂອງການແຂ່ງຂັນທີມຊະນະເລີດ ແມ່ນທີມພະແນກສັນຍາໄດ້ຮັບຂັນລາງວັນ ແລະ ເງິນສົດຈຳນວນ 100,000 ກີບ. ບັນຍາກາດການແຂ່ງຂັນເຕັມໄປດ້ວຍບັນຍາກາດທີ່ຟົດຟື້ນ, ມ່ວນຊື່ນ, ນັກກິລາ ແລະ ຜູ້ຊົມ ມີຄວາມສະໜິດສະໜົມ ແລະ ເປັນກັນເອງ, ນໍ້າໃຈນັກກິລາ, ມີຄວາມສາມັກຄີຮັກແພງ, ຊ່ວຍເຫຼືອເຊິ່ງກັນ ແລະ ກັນ ຢ່າງແທ້ຈິງ.

                                                                                                                                                                                                                                                     ຂ່າວ ແລະ ພາບໂດຍ: ຄະນະຮັບຜິດຊອບປະຊາສຳພັນກົມ