ສະຫະພັນກຳມະບານ ກະຊວງຍຸຕິທຳ ທາບທາມບຸກຄະລາກອນ ຊຸດໃໝ່ ຮອບທີ II

ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 8 ມິຖຸນາ 2020 ທີ່ຫ້ອງປະຊຸມໃຫຍ່ຂອງກະຊວງຍຸຕິທຳ ໂດຍການເປັນປະທານຂອງ ສະຫາຍ ປອ. ເສີມສຸກ ສິມພະວົງ ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງຍຸຕິທຳ ຜູ້ຊີ້ນຳວຽກງານອົງການຈັດຕັ້ງມະຫາຊົນ, ມີຄະນະສະຫະພັນກຳມະບານກະຊວງ, ຄະນະຮາກຖານກຳມະບານອ້ອມຂ້າງ ພ້ອມດ້ວຍສະມາຊິກກຳມະບານ ຂອງກະຊວງຍຸຕິທຳ ເຂົ້າຮ່ວມ.

ໃນກອງປະຊຸມ ສະຫາຍ ສຸພີ ນໍລິນທາ ປະທານສະຫະພັນກຳມະບານ ກະຊວງຍຸຕິທຳ ໄດ້ຜ່ານມາດຕະຖານເງື່ອນໄຂ ແລະ ວິທີການໃນການຄັດເລືອກເອົາບຸກຄະລາກອນ ຜູ້ທີ່ຈະສະໝັກເປັນຄະນະສະຫະພັນກຳມະບານ ກະຊວງຍຸຕິທໍາຊຸດໃໝ່. ຫຼັງຈາກນັ້ນ, ສະຫາຍ ປອ. ເສີມສຸກ ສິມພະວົງ ຮອງເລຂາຄະນະພັກ, ຮອງລັດຖະມົນຕີກະຊວງຍຸຕິທຳ ກໍໄດ້ໃຫ້ກຽດໂອ້ລົມ ຊຶ່ງສະຫາຍໄດ້ເນັ້ນໜັກໃຫ້ສະມາຊິກກຳມະບານທຸກສະຫາຍ ເອົາໃຈໃສ່ໃນການຄັດເລືອກຜູ້ທີ່ມີຜົນງານພົ້ນເດັ່ນ, ເປັນແບບຢ່າງນຳໜ້າ ແລະ ຄົບຕາມມາດຕະຖານເງື່ອນໄຂ ທີ່ທາງສູນກາງກຳມະບານວາງອອກ ເພື່ອປະກອບເຂົ້າໃນຄະນະສະຫະພັນກຳມະບານກະຊວງຍຸຕິທຳຊຸດໃໝ່ ໃຫ້ມີຄວາມໜັກແໜ້ນທາງດ້ານການເມືອງ, ເຂັ້ມແຂງທາງດ້ານການຈັດຕັ້ງ ພ້ອມທັງເຄື່ອນໄຫວສ້າງຂະບວນການຂອງກຳມະບານ ໃຫ້ມີຄວາມຟົດຟື້ນ.

ຂຽນຂ່າວ-ຖ່າຍພາບ: ຊາຍພິມພອນ ສີຣິວົງໄຊ