ລັດຖະມົນຕີກະຊວງຍຸຕິທໍາ ລົງເຄື່ອນໄຫວວຽກງານຢູ່ແຂວງ ຫຼວງພະບາງ

          ໃນວັນທີ 18 ກຸມພາ 2021 ທີ່ຜ່ານມາ ທ່ານ ໄຊສີ ສັນຕິວົງ ລັດຖະມົນຕີກະຊວງຍຸິທໍາ ພ້ອມດ້ວຍຄະນະໄດ້ເຂົ້າພົບ ທ່ານ ຄໍາຂັນ ຈັນທະວີສຸກ ເຈົ້າແຂວງ ຫຼວງພະບາງ ຢູ່ທີ່ຫ້ອງວ່າການປົກຄອງແຂວງ ເນື່ອງໃນໂອກາດທີ່ໄດ້ເດີນທາງມາເຄື່ອນໄຫວວຽກງານຢູ່ແຂວງ ຫຼວງພະບາງ.
ຈາກນັ້ນ, ທ່ານລັດຖະມົນຕີພ້ອມດ້ວຍຄະນະ ກໍໄດ້ລົງຊຸກຍູ້ ວຽກງານ ຢູ່ພະແນກຍຸຕິທໍາແຂວງ, ໂດຍໄດ້ຮັບການຕ້ອນຮັບຂອງຫົວໜ້າພະແນກຍຸຕິທໍາ ແລະ ຫົວໜ້າຫ້ອງການຍຸຕິທໍາ 12 ເມືອງ ພ້ອມດ້ວຍ ພະນັກງານວິຊາການຂອງພະແນກ. ເພື່ອຮັບຟັງການລາຍງານການເຄື່ອນໄຫວຈັດຕັ້ງປະຕິບັດວຽກງານຂອງພະແນກຍຸຕິທໍາແຂວງໃນໄລຍະຜ່ານມາ ເປັນຕົ້ນ ວຽກງານການເມືອງ-ແນວຄິດ, ວຽກງານວິຊາສະເພາະ, ການຕີລາຄາ ດ້ານດີ, ດ້ານອ່ອນ, ຂໍ້ຄົງຄ້າງ ແລະ ການກໍານົດທິດທາງແຜນການ ປີ 2021 ເພື່ອເຮັດໃຫ້ການເຄື່ອນໄຫວຈັດຕັ້ງປະຕິບັດວຽກງານບັນລຸຕາມແຜນການທີ່ວາງໄວ້.
          ຕອນທ້າຍຂອງກອງປະຊຸມ ທ່ານ ລັດຖະມົນຕີ ກໍໄດ້ມີຄໍາເຫັນໂອ້ລົມຕໍ່ຜູ້ເຂົ້າຮ່ວມ ແລະ ຍ້ອງຍໍຊົມເຊີຍຕໍ່ການຊີ້ນໍາ-ນໍາພາ ຂອງຄະນະພັກ, ຄະນະນໍາທີ່ມີຜົນສໍາເລັດຫຼາຍດ້ານ ແລະ ໄດ້ເນັ້ນໜັກໃຫ້ຫົວໜ້າພະແນກຍຸຕິທໍາແຂວງ, ບັນດາຫົວໜ້າຫ້ອງການຍຸຕິທໍາເມືອງ, ນະຄອນ ຈົ່ງພ້ອມກັນເອົາໃຈໃສ່ສືບຕໍ່ຜັນຂະຫຍາຍດ້ານດີ, ປັບປຸງດ້ານອ່ອນ ແລະ ແກ້ໄຂຂໍ້ຄົງຄ້າງ ໃນການຈັດຕັ້ງປະຕິບັດວຽກງານວິຊາສະເພາະຂອງຕົນ. ຫຼັງຈາກນັ້ນທ່ານລັດຖະມົນຕີ ຍັງໄດ້ມອບເງິນ ຈໍານວນ 10 ລ້ານກີບ ໃຫ້ແກ່ພະແນກຍຸຕິທໍາແຂວງ ຫຼວງພະບາງ, ບັນດາຫ້ອງການຍຸຕິທໍາ 11 ເມືອງ ແລະ 1 ນະຄອນ ລວມເປັນມູນຄ່າເງິນທັງໝົດຈຳນວນ 130,000,000 ກີບ (ໜຶ່ງຮ້ອຍສາມສິບລ້ານກີບ) ເພື່ອຊຸກຍູ້ການເຄື່ອນໄຫວວຽກງານຍຸຕິທໍາຮາກຖານ ໃຫ້ເປັນຂະບວນການພົ້ນເດັ່ນ, ແຂງແຮງ ແລະ ກວ້າງຂວາງອີກດ້ວຍ.
ຂຽນຂ່າວ: ສີປະໄພ ເພັດປະທຸມມາ, ຖ່າຍພາບ: ສຸກສາຄອນ ຈັນທະວຸດ