ໃນຕອນເຊົ້າຂອງວັນທີ່ 26 ມີນາ 2021 ຜ່ານມາ ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທໍາ ພ້ອມດ້ວຍຄະນະ ໄດ້ລົງເຄື່ອນໄຫວວຽກງານຢູ່ແຂວງ ອຸດົມໄຊ ໃນໂອກາດທີ່ໄດ້ມາເຮັດວຽກງານໃນຄັ້ງນີ້ ທ່ານ ລັດຖະມົນຕີ ກໍ່ໄດ້ເຂົ້າພົບ ທ່ານ ບຸນຄົງ ຫຼ້າຈຽມພອນ ເລຂາພັກແຂວງ ເຈົ້າແຂວງ ອຸດົມໄຊ ເພື່ອລາຍງານຈຸດປະສົງຂອງການມາເຄື່ອນໄຫວໃນຄັ້ງນີ້ ຊຶ່ງ ທ່ານເຈົ້າແຂວງ ກໍສະແດງຄວາມຍ້ອງຍໍຊົມເຊີຍ ທີ່ຄະນະຂອງກະຊວງຍຸຕິທຳໄດ້ເອົາໃຈໃສ່ໃນການເຄື່ອນໄຫວວຽກງານຂອງຂະແໜງການຍຸຕິທຳ ໂດຍສະເພາະວຽກງານຍຸຕິທຳຮາກຖານ ແລະ ທ່ານກໍໄດ້ອວຍພອນໃຫ້ທ່ານລັດຖະມົນຕີພ້ອມດ້ວຍຄະນະຈົ່ງປະສົບຜົນສຳເລັດໃນການລົງມາເຮັດວຽກໃນຄັ້ງນີ້.

          ຈາກນັ້ນ, ທ່ານລັດຖະມົນຕີ ພ້ອມດ້ວຍຄະນະ ກໍໄດ້ລົງຊຸກຍູ້ວຽກງານຍຸຕິທໍາຢູ່ພະແນກຍຸຕິທໍາແຂວງ ໂດຍໄດ້ຮັບການຕ້ອນຮັບໂດຍ ທ່ານ ສອນສຸວັນ ປັນຍາວົງ ກຳມະການພັກແຂວງ ຫົວໜ້າພະແນກຍຸຕິທໍາແຂວງ ອຸດົມໄຊ ພ້ອມດ້ວຍຄະນະ ແລະ ຫົວໜ້າຫ້ອງການຍຸຕິທໍາ 7 ເມືອງ ພ້ອມດ້ວຍ ພະນັກງານ-ລັດຖະກອນຂອງພະແນກ ໂດຍໄດ້ຮັບຟັງການລາຍງານກ່ຽວກັບການເຄື່ອນໄຫວ ການຈັດຕັ້ງປະຕິບັດວຽກງານໃນໄລຍະຜ່ານມາ ເປັນຕົ້ນແມ່ນ ວຽກງານດ້ານການເມືອງ-ແນວຄິດ, ວຽກງານດ້ານວິຊາສະເພາະ, ການຕີລະຄາດ້ານດີ, ດ້ານອ່ອນ, ຂໍ້ຄົງຄ້າງ ແລະ ການກໍານົດທິດທາງແຜນການ ປະຈໍາປີ 2021 ຂອງພະແນກຍຸຕິທຳແຂວງ ອຸດົມໄຊ ເພື່ອເຮັດໃຫ້ການເຄື່ອນໄຫວການຈັດຕັ້ງປະຕິບັດວຽກງານ ບັນລຸຕາມແຜນທີ່ວາງໄວ້. ນອກຈາກນີ້, ທ່ານລັດຖະມົນຕີກໍ່ໄດ້ມີຄໍາເຫັນໂອ້ລົມຕໍ່ຜູ້ເຂົ້າຮ່ວມ ແລະ ຍ້ອງຍໍຊົມເຊີຍ ຕໍ່ການຊີ້ນໍາ-ນໍາພາ ຂອງຄະນະພະແນກທີ່ມີຜົນສໍາເລັດ ແລະ ໄດ້ເນັ້ນໜັກໃຫ້ຫົວໜ້າພະແນກຍຸຕິທໍາແຂວງ, ບັນດາຫົວໜ້າຫ້ອງການຍຸຕິທໍາເມືອງ ຈົ່ງພ້ອມກັນເອົາໃຈໃສ່ສືບຕໍ່ຜັນຂະຫຍາຍດ້ານດີ, ປັບປຸງດ້ານອ່ອນ ແລະ ເອົາໃຈໃສ່ແກ້ໄຂຂໍ້ຄົງຄ້າງ ໃນການຈັດຕັ້ງປະຕິບັດວຽກງານວິຊາສະເພາະຂອງຕົນ.

          ຕອນທ້າຍ ທ່ານລັດຖະມົນຕີ ກໍ່ໄດ້ມອບເງີນ ຈໍານວນ 10,000,000 ກີບ (ສິບລ້ານກີບ) ໃຫ້ພະແນກຍຸຕິທໍາແຂວງ ແລະ ບັນດາຫ້ອງການຍຸຕິທໍາ 7 ເມືອງ ຈໍານວນ 70,000,000 ກີບ (ເຈັດສິບລ້ານກີບ) ເພື່ອຊຸກຍູ້ການເຄື່ອນໄຫວວຽກງານຍຸຕິທໍາຮາກຖານ ໃຫ້ມີປະສິດທິພາບ ແລະ ກວ້າງຂວາງອີກດ້ວຍ.