ພິທີເຊັນບົດບັນທຶກການຮ່ວມມືລະຫວ່າງ ກະຊວງຍຸຕິທຳ ກັບ ມູນນິທິເອເຊຍປະຈຳ ສປປ ລາວ

ພິທີເຊັນບົດບັນທຶກການຮ່ວມມືລະຫວ່າງ ກະຊວງຍຸຕິທຳ ກັບ ມູນນິທິເອເຊຍ ປະຈຳ ສປປ ລາວ ກ່ຽວກັບການສົ່ງເສີມການເຂົ້າເຖິງກົດໝາຍ ແລະ ຄວາມຍຸຕິທຳ ຂອງປະຊາຊົນ ໃນ ສປປ ລາວ ໄດ້ຈັດຂຶ້ນໃນຕອນບ່າຍຂອງວັນທີ 24 ມັງກອນ 2020 ທີ່ໂຮງແຮມຄຣາວພຣາຊາ, ນະຄອນຫຼວງວຽງຈັນ ໂດຍການເປັນປະທານຮ່ວມຂອງທ່ານ ໄຊສີ ສັນຕິວົງ ກຳມະການສູນກາງພັກ, ລັດຖະມົນຕີກະຊວງຍຸຕິທຳ, ທ່ານ ນາງ ຣີນ່າ ບັດເຕີ ເອກອັກຄະລັດຖະທູດສະຫະລັດອາເມລິກາ ປະຈຳ ສປປ ລາວ ແລະ ທ່ານ ທອດ ວາດເຊວ ຜູ້ຕາງໜ້າມູນນິທິເອເຊຍ ປະຈຳ ສປປ ລາວ. ເຂົ້າຮ່ວມມີຫົວໜ້າຫ້ອງການ, ບັນດາຫົວໜ້າກົມ-ຮອງຫົວໜ້າກົມ, ຫົວໜ້າພະແນກຍຸຕິທຳແຂວງ 10 ແຂວງທີ່ເປັນກຸ່ມເປົ້າໝາຍຂອງໂຄງການ ຕະຫຼອດຮອດຜູ້ຕາງໜ້າຈາກບັນດາກະຊວງ, ອົງການລັດທຽບເທົ່າກະຊວງ ແລະ ອົງການຈັດຕັ້ງສາກົນເຂົ້າຮ່ວມຢ່າງພ້ອມພຽງ.
ໃນພິທີທ່ານ ວິກອນ ບຸນວິໄລ ຮອງຫົວໜ້າກົມສົ່ງເສີມລະບົົບຍຸຕິທຳ, ຕາງໜ້າໃຫ້ຄະນະຮັບຜິດຊອບໂຄງການ ນຳສະເໜີຈຸດປະສົງ ແລະ ລາຍງານກ່ຽວກັບບັນດາໜ້າວຽກຂອງໂຄງການທີ່ຈະຈັດຕັ້ງປະຕິບັດໃນປີ 2020-2023 ຊຶ່ງປະກອບດ້ວຍວຽກງານການໄກ່ເກ່ຍຂໍ້ຂັດແຍ່ງຂັ້ນບ້ານ, ວຽກງານຊ່ວຍເຫຼືອທາງດ້ານກົດໝາຍ ແລະ ວຽກງານໂຄສະນາເຜີຍແຜ່ກົດໝາຍ ທີ່ມີເປົ້າໝາຍຈັດຕັ້ງປະຕິບັດຢູ່ ນະຄອນຫຼວງວຽງຈັນ, ແຂວງ ຜົ້ງສາລີ, ແຂວງ ຫຼວງນຳ້ທາ, ແຂວງ ອຸດົມໄຊ, ແຂວງ ຫຼວງພະບາງ, ແຂວງ ໄຊຍະບູລີ, ແຂວງ ວຽງຈັນ, ແຂວງ ສາລະວັນ ແລະ ແຂວງ ຈຳປາສັກ ເພື່ອສ້າງສະຕິເຄົາລົບ ແລະ ປະຕິບັດກົດໝາຍ ໃຫ້ແກ່ປະຊາຊົນລາວບັນດາເຜົ່າ ພ້ອມດຽວກັນນັ້ນ ກໍຍັງເປັນການປະກອບສ່ວນໃນການສ້າງລັດທີ່ປົກຄອງດ້ວຍກົດໝາຍເທື່ອລະກ້າວ.
ຫຼັງຈາກນັ້ນ ກໍໄດ້ມີການເຊັນບົດບັນທຶກການຮ່ວມມືລະຫວ່າງທ່ານ ເກດສະໜາ ພົມມະຈັນ ຫົວໜ້າກົມຮ່ວມມືສາກົນ ຕາງໜ້າໃຫ້ແກ່ກະຊວງຍຸຕິທຳ ແລະ ທ່ານ ທອດ ວາດເຊວ ຕາງໜ້າມູນນິທິເອເຊຍ ປະຈຳ ສປປ ລາວ ໂດຍຊ້ອງໜ້າຄະນະປະທານ ແລະ ບັນດາທ່ານຜູ້ເຂົ້າຮ່ວມໃນພິທີເປັນສັກຂີພະຍານ ໃນການລົງນາມຮ່ວມມືຂອງທັງສອງຝ່າຍ

ຂ່າວ: ອ່ອນຄຳ ໄຊຍະວົງ, ພາບ: ຊາຍພິມພອນ