ພິທີວາງສີລາລຶກ ໂຄງການກໍ່ສ້າງອາຄານຮຽນ ສະຖາບັນຍຸຕິທຳພາກໃຕ້

ໃນຕອນເຊົ້າຂອງວັນທີ 18 ມິຖຸນາ 2020 ທີ່ບ້ານ ຄອນໄຫຼ, ນະຄອນ ປາກເຊ, ແຂວງ ຈຳປາສັກ ໄດ້ຈັດພິທີວາງສີລາລຶກ ໂຄງການກໍ່ສ້າງອາຄານຮຽນ 2 ຊັ້ນ ຂອງສະຖາບັນຍຸຕິທຳພາກໃຕ້ຂຶ້ນ; ເປັນກຽດວາງສີລາລຶກໂດຍ ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ, ທ່ານ ເມກສະຫວັນ ພົມພິທັກ ປະທານສະພາປະຊາຊົນແຂວງ ຈຳປາສັກ ພ້ອມດ້ວຍບັນດາຫົວໜ້າກົມ, ຮອງກົມ, ຫົວໜ້າສະຖາບັນຍຸຕິທຳແຫ່ງຊາດ, ສະຖາບັນຍຸຕິທຳພາກໃຕ້ ເຂົ້າຮ່ວມ.

ໂຄງການດັ່ງກ່າວ ເປັນໂຄງການລົງທຶນຂອງລັດ 100% ໂດຍແມ່ນ ກະຊວງຍຸຕິທຳ ເປັນເຈົ້າຂອງໂຄງການ ແລະ ບໍລິສັດ ລັດວິສາຫະກິດກໍ່ສ້າງຂົວທາງ ແລະ ຕິດຕັ້ງໄຟຟ້າ ຄົບວົງຈອນ ເປັນຜູ້ຮັບເໝົາກໍ່ສ້າງ. ໂຄງການດັ່ງກ່າວ ມີສັນຍາກໍ່ສ້າງ 12 ເດືອນ ໂດຍເລີມກໍ່ສ້າງແຕ່ ເດືອນ ພຶດສະພາ 2020 ເຖິງ ເດືອນ ເມສາ 2021; ມູນຄ່າການກໍ່ສ້າງທັງໝົດ 4.898.921.500 ກີບ (ສີ່ຕື້ແປດຮ້ອຍເກົ້າສິບແປດລ້ານເກົ້າແສນຊາວເອັດພັນຫ້າຮ້ອຍກີບ).

ພາຍຫຼັງໂຄງການກໍ່ສ້າງສຳເລັດ ແມ່ນຈະໄດ້ອຳນວຍຄວາມສະດວກໃນການກໍ່ສ້າງ, ບຳລຸງ ພະນັກງານກົດໝາຍ ໃນ 4 ແຂວງພາກໃຕ້ ຄື: ແຂວງ ຈຳປາສັກ, ເຊກອງ, ສາລະວັນ ແລະ ອັດຕະປື.

ຂ່າວ: ຊາຍພິມພອນ