ຄະນະບໍລິຫານງານຊາວໜຸ່ມກະຊວງຍຸຕິທຳ ໄດ້ສ້າງຂະບວນການແຂ່ງຂັນກິລາ ເພື່ອສະເຫຼີມສະຫຼອງວັນລັດຖະທຳມະນູນ ຄົບຮອບ 29 ປີ

   ເພື່ອເປັນການສະເຫຼີມສະຫຼອງວັນລັດຖະທຳມະນູນ ຄົບຮອບ 29 ປີ ໃຫ້ເປັນຂະບວນການຟົດຟື້ນ ແລະ ເຕັມໄປດ້ວຍຄວາມໝາຍຄວາມສຳຄັນ ດັ່ງນັ້ນ ໃນລະຫວ່າງວັນທີ 6-7 ສິງຫາ 2020 ທີ່ເດີ່ນກິລາ ຂອງກະຊວງຍຸຕິທຳ ຄະນະບໍລິຫານງານຊາວໜຸ່ມ ກະຊວງຍຸຕິທຳ ໄດ້ສ້າງຂະບວນການແຂ່ງຂັນກິລາມິດຕະພາບເພື່ອສະເຫຼີມສະຫຼອງວັນລັດຖະທຳມະນູນ ຄົບຮອບ 29 ປີຂຶ້ນ, ເປັນກຽດເຂົ້າຮ່ວມໃນພິທີມີທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທໍາ ບັນດາທ່ານຮອງລັດຖະມົນຕີ, ຫົວໜ້າຫ້ອງການ, ບັນດາຫົວໜ້າກົມ-ຮອງຫົວໜ້າກົມ, ຄະນະນຳຈາກພະແນກຍຸຕິທຳນະຄອນຫຼວງວຽງຈັນ, ພະແນກຍຸຕິທຳແຂວງ ສະຫັວນນະເຂດ, ພະແນກຍຸຕິທຳແຂວງ ຈຳປາສັກ, ສະຖາບັນຍຸຕິທຳພາກກາງ ແລະ ພາກໃຕ້ ຕະຫຼອດພະນັກງານ-ລັດຖະກອນ, ສະມາຊິກຊາວໜຸ່ມທົ່ວກະຊວງຍຸຕິທຳເຂົ້າຮ່ວມຢ່າງຟົດຟື້ນ.

   ການແຂ່ງຂັນກິລາຄັ້ງນີ້ປະກອບມີ ກິລາບານເຕະຊາຍ ແລະ ບານເຕະຍິງ ພິເສດໃນປີນີ້ກິລາບານເຕະຊາຍ ແລະ ບານເຕະຍິງ ແມ່ນມີທີມເຂົ້າຮ່ວມທັງໝົດເຖິງ 9 ທີມຄື: ທີມປະສົມຊາວໜຸ່ມຊາຍ ຈາກບັນດາໜ່ວຍຊາວໜຸ່ມຮາກຖານ ອ້ອມຂ້າງກະຊວງຍຸຕິທຳ ຈຳນວນ 3 ທີມ, ທີມຊາຍ 2 , ທີມຍິງ 1, ທີມປະສົມລະຫວ່າງສະຖາບັນຍຸຕິທຳພາກກາງກັບພະແນກຍຸຕິທຳແຂວງ ສະຫັວນນະເຂດ, ທີມປະສົມລະຫວ່າງສະຖາບັນຍຸຕິທຳພາກໃຕ້ກັບພະແນກຍຸຕິທຳແຂວງ ຈຳປາສັກ, ທີມສະຖາບັນຍຸຕິທຳແຫ່ງຊາດ 2 ທີມ ຊາຍ 1 ແລະ ຍິງ 1 , ທີມສະພາທະນາຍຄວາມລາວ ແລະ ທີມພະແນກຍຸຕິທຳນະຄອນຫຼວງວຽງຈັນ.

   ຜົນຂອງການແຂ່ງຂັນມີດັ່ງນີ້: ຊະນະເລີດບານເຕະຊາຍໄດ້ແກ່ທີມຈາກສະພາທະນາຍຄວາມລາວ, ຮອງຊະນະເລີດ ໄດ້ແກ່ທີມຈາກກະຊວງຍຸຕິທຳຊຶ່ງໃນພິທີກໍໄດ້ມີການມອບຂັນລາງວັນໂດຍທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ ແລະ ຊະນະເລີດທີມບານເຕະຍິງໄດ້ແກ່ສະຖາບັນຍຸຕິທຳແຫ່ງຊາດ, ຮອງຊະນະເລີດໄດ້ແກ່ທີມຈາກກະຊວງຍຸຕິທຳ ໃຫ້ກຽດມອບລາງວັນໂດຍ ທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ.
ຊຶ່ງຕະຫຼອດໄລຍະຂອງການແຂ່ງຂັນກິລາແມ່ນເຕັມໄປດ້ວຍຄວາມສາມັກຄີ ໄມຕີຈິດມິດຕະພາບ ແລະ ຄວາມເບີກບານມ່ວນຊື່ນລະຫວ່າງໜ່ວຍຊາວໜຸ່ມຮາກຖານ ແລະ ສະມາຊິກຊາວໜຸ່ມທົ່ວຂະແໜງຍຸຕິທຳທັງສູນກາງ ແລະ ທ້ອງຖິ່ນ.

ຂຽນໂດຍ: ອ່ອນຄຳ ໄຊຍະວົງ