ກະຊວງຍຸຕິທໍາວາງແຜນຍຸດທະສາດ 5 ປີ ກ່ຽວກັບວຽກງານພັດທະນາຊັບພະຍາກອນມະນຸດຂອງຂະແໜງຍຸຕິທຳ

ໃນຕອນເຊົ້າວັນທີ 8 ພຶດສະພາ 2020 ທີ່ຜ່ານມາ ຢູ່ທີ່ຫ້ອງປະຊຸມຂອງກະຊວງຍຸຕິທໍາ ໄດ້ມີກອງປະຊຸມປຶກສາຫາລືສ້າງແຜນຍຸດທະສາດການພັດທະນາຊັບພະຍາກອນມະນຸດຂອງຂະແໜງຍຸຕິທຳ ແຕ່ນີ້ຮອດປີ 2025 ໂດຍພາຍໃຕ້ການເປັນປະທານຂອງ ທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ, ມີບັນດາຄະນະຮັບຜິດຊອບສ້າງແຜນຍຸດທະສາດພັດທະນາຊັບພະຍາກອນມະນຸດ ຂອງຂະແໜງຍຸຕິທຳເຂົ້າຮ່ວມທັງໝົດຈຳນວນ 13 ທ່ານ, ຍິງ 4 ທ່ານ.

ໃນກອງປະຊຸມຜູ້ຮ່ວມໄດ້ຮັບຟັງການນຳສະເໜີແຜນຍຸດທະສາດການພັດທະນາຊັບພະຍາກອນມະນຸດແຫ່ງຊາດ ຮອດປີ 2025 ແລະ ຮ່າງສາລະບານຍຸດທະສາດການພັດທະນາຊັບພະຍາກອນມະນຸດ ຂອງຂະແໜງຍຸຕິທຳ. ຫຼັງຈາກນັ້ນ, ຜູ້ເຂົ້າຮ່ວມກອງປະຊຸມກໍໄດ້ປະກອບຄໍາເຫັນໃສ່ຮ່າງສາລະບານດັ່ງກ່າວ ພ້ອມທັງໄດ້ປຶກສາຫາລື, ແລກປ່ຽນຄຳຄິດຄຳເຫັນຕໍ່ວິທີການຄົ້ນຄວ້າ ແລະ ສ້າງແຜນຍຸດທະສາດຂອງຂະແໜງຍຸຕິທຳ ໃຫ້ສອດຄ່ອງກັບສະພາບຕົວຈິງ. ຈຸດປະສົງຂອງກອງປະຊຸມດັ່ງກ່າວ ກໍເພື່ອຍົກສູງທາງດ້ານຄວາມຮູ້, ຄວາມສາມາດຂອງບຸກຄະລາກອນໃນຂົງເຂດກົດໝາຍ ແລະ ຍຸຕິທຳ ໃຫ້ມີຄວາມຮູ້ດ້ານວິຊາຊີບເລິກເຊິ່ງ, ມີຄວາມສາມາດສູງ, ມີຄຸນສົມບັດສິນທຳປະຕິວັດ ແລະ ມີຈັນຍາທຳໜັກແໜ້ນ, ເພື່ອຮັບປະກັນການກໍ່ສ້າງ ແລະ ຝຶກອົບຮົມບຸກຄະລາກອນດ້ານວິຊາຊີບຍຸຕິທຳທີ່ຊຳນານງານ, ສາມາດປະຕິບັດໜ້າທີ່ໃນຂະແໜງການຍຸຕິທໍາ ທັງສູນກາງ ແລະ ທ້ອງຖິ່ນ ໃຫ້ໄດ້ທັງປະລິມານ ແລະ ຄຸນນະພາບ.

ຂ່າວ: ອ່ອນຄໍາ, ຖ່າຍພາບ: ສົມຫວັງ