ກອງປະຊຸມເຜີຍແຜ່ເຊື່ອມຊຶມ ມະຕິຂອງກົມການເມືອງສູນກາງພັກ

ໃນຕອນເຊົ້າຂອງວັນທີ 24 ມັງກອນ 2020 ທີ່ຜ່ານມາ ກະຊວງຍຸຕິທຳ ໄດ້ຈັດກອງປະຊຸມເຜີຍແຜ່ເຊື່ອມຊຶມ ມະຕິຂອງກົມການເມືອງສູນກາງພັກ, ຂໍ້ກຳນົດຂອງຄະນະເລຂາທິການສູນກາງພັກ ແລະ ຄຳແນະນຳຂອງຄະນະຈັດຕັ້ງສູນກາງພັກ ຂຶ້ນ ຢູ່ທີ່ຫ້ອງປະຊຸມໃຫຍ່ຂອງກະຊວງຍຸຕິທຳ. ພາຍໃຕ້ການເປັນປະທານ ແລະ ເຜີຍແຜ່ ຂອງສະຫາຍ ໄຊສີ ສັນຕິວົງ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງຍຸຕິທຳ; ມີຄະນະພັກ-ຄະນະນຳ, ຄະນະເລຂາໜ່ວຍພັກ ຕະຫຼອດຮອດສະມາຊິກພັກ ແລະ ພະນັກງານ-ລັດຖະກອນຂອງກະຊວງຍຸຕິທຳ ເຂົ້າຮ່ວມຢ່າງພ້ອມພຽງ.

ໃນກອງປະຊຸມສະຫາຍ ໄຊສີ ສັນຕິວົງ ກໍໄດ້ໃຫ້ກຽດເຜີຍແຜ່ ບັນດາເອກະສານທີ່ສຳຄັນຕ່າງໆຂອງພັກ ເປັນຕົ້ນແມ່ນ ມະຕິຂອງກົມການເມືອງສູນກາງພັກ ສະບັບເລກທີ 072/ກມສພ, ລົງວັນທີ 14 ພຶດສະພາ 2019 ວ່າດ້ວຍລະບອບການຮໍ່າຮຽນທິດສະດີການເມືອງ ແລະ ສະບັບເລກທີ 073/ກມສພ, ລົງວັນທີ 14 ພຶດສະພາ 2019 ວ່າດ້ວຍການສ້າງແຜນກໍ່ສ້າງ-ບຳລຸງພະນັກງານນຳພາ-ຄຸ້ມຄອງ; ຂໍ້ກໍານົດຂອງຄະນະເລຂາທິການສູນກາງພັກ ສະບັບເລກທີ 01/ຄລສພ, ລົງວັນທີ 15 ພຶດສະພາ 2019 ວ່າດ້ວຍການຢັ້ງຢືນລະດັບທິດສະດີການເມືອງ; ຄໍາແນະນໍາ ຂອງຄະນະຈັດຕັ້ງສູນກາງພັກ ສະບັບເລກທີ 204/ຄຈສພ, ລົງວັນທີ 5 ພະຈິກ 2019 ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກ ວ່າດ້ວຍລະບອບການຮ່ຳຮຽນທິດສະດີການເມືອງ, ການສ້າງແຜນກໍ່ສ້າງ-ບໍາລຸງພະນັກງານນຳພາ-ຄຸ້ມຄອງ ແລະ ຂໍ້ກຳນົດຂອງຄະນະເລຂາທິການສູນກາງພັກ ວ່າດ້ວຍການຢັ້ງຢືນລະດັບທິດສະດີການເມືອງ.
ຈຸດປະສົງ ເພື່ອສ້າງຄວາມຮັບຮູ້ ແລະ ເຂົ້າໃຈເປັນເອກະພາບ ກ່ຽວກັບລະບອບການຮໍ່າຮຽນທິດສະດີການເມືອງ, ການຂຶ້ນແຜນກໍ່ສ້າງ-ບຳລຸງ ພະນັກງານນຳພາ-ຄຸ້ມຄອງ ແລະ ການຢັ້ງຢືນລະດັບທິດສະດີການເມືອງ, ສ້າງຄວາມເຊື່ອໝັ້ນຕໍ່ອຸດົມການຂອງພັກ, ສ້າງທັດສະນະຫຼັກໝັ້ນການເມືອງທີ່ຖືກຕ້ອງ ເພື່ອເຮັດໃຫ້ທິດສະດີການເມືອງກາຍເປັນພື້ນຖານແນວຄິດ ແລະ ການກະທຳຂອງທົ່ວພັກ, ທົ່ວລັດ ແລະ ທົ່ວສັງຄົມ ເວົ້າລວມ, ເວົ້າສະເພາະ ກໍຄືສະມາຊິກພັກ, ພະນັກງານນຳພາ-ຄຸ້ມຄອງ, ພະນັກງານ-ລັດຖະກອນ ຂອງກະຊວງຍຸຕິທຳ ໃຫ້ນັບມື້ໜັກແໜ້ນເຂັ້ມແຂງຂຶ້ນ.

ຂຽນຂ່າວ: ສີປະໄພ, ຖ່າຍພາບ ຊາຍພິມພອນ