ກອງປະຊຸມວຽກງານສະພາທະນາຍຄວາມລາວ ປະຈຳປີ 2019

ກອງປະຊຸມປະຈຳປີ 2019 ຂອງ ສະພາທະນາຍຄວາມລາວ ໄດ້ຈັດຂຶ້ນໃນລະຫວ່າງວັນທີ 11-12 ມິຖຸນາ 2020 ຢູ່ທີ່ຫ້ອງປະຊຸມໃຫຍ່ຂອງກະຊວງຍຸຕິທຳ ພາຍໃຕ້ການເປັນປະທານຂອງ ທ່ານ ຄຳໃສ ສຸລິນທອນ ປະທານສະພາທະນາຍຄວາມລາວ; ໂດຍການເປັນກຽດເຂົ້າຮ່ວມຂອງ ທ່ານ ບຸນສະຫວາດ ບຸບຜາ ຮອງລັດຖະມົນຕີກະຊວງຍຸຕິທຳ. ມີບັນດາຄະນະບໍລິຫານງານສະພາທະນາຍຄວາມ, ບັນດາຫົວໜ້າ, ຮອງຫົວໜ້າຫ້ອງການສະພາທະນາຍຄວາມປະຈຳແຂວງ; ໜ່ວຍສະພາທະນາຍຄວາມປະຈຳເມືອງໃນນະຄອນຫຼວງວຽງຈັນ ພ້ອມດ້ວຍແຂກຖືກເຊີນເຂົ້າຮ່ວມ ຈຳນວນ 43 ທ່ານ, ຍິງ 11 ທ່ານ.

ກອງປະຊຸມຄັ້ງນີ້ ໄດ້ສະຫຼຸບຕີລາຄາຄືນກ່ຽວກັບຜົນຂອງການຈັດຕັ້ງ ແລະ ການເຄື່ອນໄຫວວຽກງານ ໃນໄລຍະຜ່ານມາ ຂອງຄະນະບໍລິຫານງານ, ຄະນະປະຈຳ, ຄະນະກວດກາ ແລະ ຄະນະຫ້ອງການ ປະຈຳແຂວງ, ພ້ອມທັງຕີລາຄາສູງໃນຄວາມພະຍາຍາມອັນຕັ້ງໜ້າ ແລະ ຄວາມເປັນເຈົ້າການ ໃນການຈັດຕັ້ງປະຕິບັດໜ້າທີ່ຂອງຕົນໄດ້ຮັບຜົນສຳເລັດຫຼາຍດ້ານ. ໃນນັ້ນ, ໄດ້ຕີລາຄາດ້ານດີທີ່ຕ້ອງໄດ້ສືບຕໍ່ເສີມຂະຫຍາຍ ແລະ ດ້ານອ່ອນ, ຂໍ້ຄົງຄ້າງທີ່ຈະຕ້ອງສືບຕໍ່ປັບປຸງແກ້ໄຂໃນຕໍ່ໜ້າ ຊຶ່ງໃນປີ 2019 ຜ່ານມາ ສະພາທະນາຍຄວາມລາວ ໄດ້ຮັບຄະດີຄວາມ ທັງໝົດ 731 ເລື່ອງ ໃນນັ້ນ ຄະດີອາຍາ 251 ເລື່ອງ, ຄະດີແພ່ງ 480 ເລື່ອງ; ສາມາດແກ້ໄຂສຳເລັດ 502 ເລື່ອງ ຄະດີອາຍາ 172 ເລື່ອງ, ຄະດີແພ່ງ 330 ເລື່ອງ; ໃຫ້ຄຳປຶກສາທາງດ້ານກົດໝາຍ 434 ເລື່ອງ ໃນນັ້ນ ຄະດີອາຍາ 222 ເລື່ອງ, ຄະດີແພ່ງ 212 ເລື່ອງ. ພ້ອມດຽວກັນນັ້ນ ຍັງໄດ້ປຶກສາຫາລື ກ່ຽວກັບການກະກຽມຄວາມພ້ອມທາງດ້ານເນື້ອໃນ ແລະ ບຸກຄະລາກອນໃຫ້ແກ່ ກອງປະຊຸມໃຫຍ່ສະພາທະນາຍຄວາມທົ່ວປະເທດ ຄັ້ງທີ VIII ທີ່ຈະຈັດຂຶ້ນໃນມໍ່ໆນີ້.
ກອງປະຊຸມ ຍັງໄດ້ຮັບຟັງການໂອ້ລົມຂອງ ທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການປະຕິບັດໜ້າທີ່ວຽກງານຂອງຕົນໄດ້ຮັບຜົນສຳເລັດເປັນຢ່າງດີ ພ້ອມນັ້ນ ທ່ານ ຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ ແລະ ຂໍ້ຄົງຄ້າງ. ຊຶ່ງເພິ່ນໄດ້ຮຽກຮ້ອງໃຫ້ຄະນະບໍລິຫານງານສະພາທະນາຍຄວາມລາວ ຕ້ອງໄດ້ສືບຕໍ່ປັບປຸງ, ແກ້ໄຂ ແລະ ໄດ້ໃຫ້ທິດຊີ້ນໍາບາງວຽກງານທີ່ສໍາຄັນ ຊຶ່ງຈະຕ້ອງສຸມໃສ່ໃນຕໍ່ໜ້າ ໂດຍສະເພາະ ຕ້ອງໄດ້ສືບຕໍ່ຕັ້ງໜ້າກະກຽມການດຳເນີນກອງປະຊຸມໃຫຍ່ ຄັ້ງທີ VIII ຂອງສະພາທະນາຍຄວາມລາວ ໃຫ້ມີຄວາມສົມບູນທາງດ້ານເນື້ອໃນ ແລະ ບຸກຄະລາກອນ ຮັບປະກັນໃຫ້ໄດ້ຮັບຜົນສຳເລັດສູງສຸດ; ສືບຕໍ່ປັບປຸງແບບແຜນວິທີເຮັດວຽກ, ກົນໄກການຕິດຕໍ່ພົວພັນພາຍໃນອົງກອນ ໃຫ້ແທດເໝາະກັບສະພາບຄວາມເປັນຈິງ; ສືບຕໍ່ພົວພັນປະສານສົບທົບ ຍາດແຍ່ງການຊີ້ນຳ-ການສະໜັບສະໜູນຂອງອົງການ ພັກ-ລັດ ແຕ່ລະຂັ້ນ ໃຫ້ເຫັນໄດ້ເຖິງຄວາມສຳຄັນຂອງວຽກງານສະພາທະນາຍຄວາມລາວ.

ຂ່າວ-ພາບ: ຊາຍພິມພອນ