ກອງປະຊຸມປຶກສາຫາລື ແລະ ປະກອບຄໍາເຫັນໃສ່ຮ່າງດໍາລັດວ່າດ້ວຍການແຕ່ງດອງ

ໃນວັນທີ 12 ພຶດສະພາ 2020 ທີ່ຜ່ານມາ ຢູ່ທີ່ຫ້ອງປະຊຸມຂອງກະຊວງຍຸຕິທໍາ ໄດ້ມີການເປີດກອງປະຊຸມປຶກສາຫາລືປະກອບຄຳເຫັນໃສ່ ຮ່າງດຳລັດວ່າດ້ວຍການແຕ່ງດອງລະຫວ່າງພົນລະເມືອງລາວ ກັບຄົນຕ່າງປະເທດ, ຄົນຕ່າງດ້າວ ແລະ ຄົນບໍ່ມີສັນຊາດ ໂດຍພາຍໃຕ້ການເປັນປະທານຂອງ ທ່ານ ອິນທະປັນຍາ ຂຽວວົງພະຈັນ ຫົວໜ້າກົມກົດໝາຍ ກະຊວງຍຸຕິທຳ, ເຂົ້າຮ່ວມມີຜູ້ຕາງໜ້າຈາກຫ້ອງວ່າການສຳນັກງານນາຍົກລັດຖະມົນຕີ, ກະຊວງພາຍໃນ, ກະຊວງການຕ່າງປະເທດ, ກະຊວງປ້ອງກັນຄວາມສະຫງົບ ແລະ ຄະນະຮັບຜິດຊອບທີ່ກ່ຽວຂ້ອງເຂົ້າຮ່ວມທັງໝົດຈໍານວນ 20 ທ່ານ, ຍິງ 5 ທ່ານ.

ໃນກອງປະຊຸມຜູ້ເຂົ້າຮ່ວມກໍໄດ້ພ້ອມກັນປຶກສາຫາລື ແລະ ປະກອບຄຳເຫັນໃສ່ຮ່າງດຳລັດດັ່ງກ່າວດ້ວຍຄວາມຮັບຜິດຊອບສູງ ແນ່ໃສ່ເຮັດໃຫ້ຮ່າງດຳລັດສະບັບນີ້ມີເນື້ອໃນທີ່ຄົບຖ້ວນສົມບູນຂຶ້ນ ແລະ ແທດເໝາະກັບສະພາບຕົວຈິງຂອງປະເທດເຮົາ ບົນພື້ນຖານຂອງກົດໝາຍທີ່ກ່ຽວຂ້ອງ ຮ່າງດຳລັດສະບັບນີ້ ປະກອບມີທັງໝົດ 9 ໝວດ, 28 ມາດຕາ. ຊຶ່ງໃນນັ້ນກໍໄດ້ກໍານົດບັນດາຫຼັກການທີ່ເປັນພື້ນຖານ, ລະບຽບການ ແລະ ມາດຕະການທີ່ສຳຄັນ ແລະ ຈຳເປັນຈຳນວນໜຶ່ງກ່ຽວກັບການຄຸ້ມຄອງ, ຕິດຕາມ, ກວດກາ ວຽກງານແຕ່ງດອງລະຫວ່າງພົນລະເມືອງລາວ ກັບຄົນຕ່າງປະເທດ ເພື່ອເຮັດໃຫ້ວຽກງານດັ່ງກ່າວມີປະສິດທິພາບ ແລະ ປະສິດທິຜົນ ແນໃສ່ປົກປ້ອງສິດ ແລະ ຜົນປະໂຫຍດອັນຊອບທຳຂອງພົນລະເມືອງ ທັງເປັນການປະກອບສ່ວນເຂົ້າໃນການປົກປັກຮັກສາຮີດຄອງປະເພນີ ແລະ ວັດທະນະທຳອັນດີງາມຂອງຊາດລາວເຮົາ.

ຂ່າວ: ອ່ອນຄໍາ, ພາບ: ສົມຫວັງ