ທ່ານຮອງລັດຖະມົນຕີກະຊວງຍຸຕິທຳ ເຄື່ອນໄຫວຊຸກຍູ້ວຽກງານໂຄສະນາເຜີຍແຜ່ກົດໝາຍ ຢູ່ ແຂວງ ຈຳປາສັກ

ໃນຕອນບ່າຍວັນທີ 12 ຕຸລາ 2020 ທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ ໄດ້ລົງເຄື່ອນໄຫວ ແລະ ຊຸກຍູ້ ວຽກງານໂຄສະນາເຜີຍແຜ່ກົດໝາຍ ຢູ່ພະແນກຍຸຕິທຳແຂວງ ຈຳປາສັກ ເນື່ອງໃນໂອກາດທີ່ທ່ານໄດ້ມາເຄື່ອນໄຫວວຽກງານທາງລັດຖະການຢູ່ແຂວງ ຈຳປາສັກ ໂດຍມີ ທ່ານ ບຸນຄົງ ພັນວົງສາ ຫົວໜ້າພະແນກຍຸຕິທຳແຂວງ ຈຳປາສັກ; ທ່ານ ນາງ ສີສຸດາ ໂສພາວັນດີ ວ່າການຫົວໜ້າກົມໂຄສະນາເຜີຍແຜ່ກົດໝາຍ, ກະຊວງຍຸຕິທຳ; ມີບັນດາຮອງຫົວໜ້າພະແນກ, ຫົວໜ້າຂະແໜງ, ຮອງຂະແໜງ, ພ້ອມດ້ວຍພະນັກງານວິຊາການ ຂອງພະແນກຍຸຕິທຳແຂວງ ຈຳປາສັກ ເຂົ້າຮ່ວມ.
ໃນພິທີ ທ່ານ ບຸນຄົງ ພັນວົງສາ ຫົວໜ້າພະແນກຍຸຕິທຳແຂວງ ໄດ້ລາຍງານສະພາບຈຸດພິເສດ ແລະ ການເຄື່ອນໄຫວວຽກງານການໂຄສະນາເຜີຍແຜ່ກົດໝາຍ ຂອງພະແນກຍຸຕິທຳແຂວງ ຈຳປາສັກໃນໄລຍະຜ່ານມາ ໂດຍທ່ານໄດ້ຍົກໃຫ້ເຫັນ ຜົນງານທີ່ພົ້ນເດັ່ນ, ຈຸດດີ, ຈຸດອ່ອນ, ຂໍ້ຄົງຄ້າງ, ວິທີການແກ້ໄຂ ລວມທັງ ທິດທາງການເຄື່ອນໄຫວໃນຕໍ່ໜ້າ. ຈາກນັ້ນ, ທ່ານ ນາງ ສີສຸດາ ໂສພາວັນດີ ກໍໄດ້ລາຍງານສະພາບການຄຸ້ມຄອງມະຫາພາກກ່ຽວກັບວຽກງານໂຄສະນາເຜີຍແຜ່ກົດໝາຍ ຊຶ່ງປັດຈຸບັນ ການໂຄສະນາເຜີຍແຜ່ກົດໝາຍ ແມ່ນມີຫຼາຍຮູບແບບ, ຫຼາຍວິທີ ໂດຍສະເພາະ ການໂຄສະນາຜ່ານພາຫະນະສື່ມວນຊົນຕ່າງໆ ບໍ່ວ່າຈະເປັນ ໜັງສືພິມ, ວາລະສານ, ແຜ່ນພັບ, ໂປດສະເຕີ, ໂທລະໂຄ່ງ, ວິທະຍຸ, ໂທລະພາບ.

ຈາກນັ້ນ, ທ່ານຮອງລັດຖະມົນຕີກະຊວງຍຸຕິທຳ ກໍໄດ້ມີຄຳເຫັນໂອລົມ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດທີ່ພະແນກຍຸຕິທຳແຂວງ ຈຳປາສັກ ຍາດມາໄດ້ໃນໄລຍະຜ່ານມາ ແລະ ທ່ານໄດ້ສະແດງຄວາມເປັນຫ່ວງເປັນໄຍຕໍ່ກັບສະພາບທີ່ມີຜົນກະທົບຕໍ່ກັບວຽກງານຂະແໜງການຍຸຕິທຳ ໂດຍສະເພາະ ສະພາບເສດຖະກິດຂອງໂລກ, ການແຜ່ລະບາດຂອງພະຍາດອັກເສບປອດສາຍພັນໃໝ່ (COVID-19); ເຖິງຢ່າງໃດກໍຕາມ ພັກ ແລະ ລັດຖະບານ ກໍໄດ້ຍຶດໝັ້ນ ແລະ ຍູ້ແຮງວຽກງານຂະແໜງການຍຸຕິທຳ ໂດຍຜ່ານພຶດຕິກຳຕົວຈິງຫຼາຍຂຶ້ນ ສະແດງອອກບ່ອນວ່າ ສູນກາງພັກໄດ້ມີນິຕິກຳສະເພາະຂອງພັກ ທີ່ກຳນົດວຽກງານຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ເພື່ອເປັນບ່ອນອີງໃນການເຄື່ອນໄຫວວຽກງານຂະແໜງການຍຸຕິທຳ; ຂະແໜງການຍຸຕິທຳທົ່ວປະເທດນັບມື້ນັບກາຍເປັນເສນາທິການໃຫ້ອົງການປົກຄອງແຕ່ລະຂັ້ນໃນການກວດກາຄວາມຖືກຕ້ອງ ແລະ ສອດຄ່ອງຂອງກົດໝາຍຫຼາຍຂຶ້ນ; ຄະນະພັກ-ຄະນະນຳຂອງກະຊວງຍຸຕິທຳ ໄດ້ຖືກແຕ່ງຕັ້ງເປັນຄະນະກຳມະການທີ່ສຳຄັນຕ່າງໆຂອງຊາດ ທັງສູນກາງ ແລະ ທ້ອງຖິ່ນຫຼາຍຂຶ້ນ; ການກະກຽມ ແລະ ດຳເນີນກອງປະຊຸມໃຫຍ່ແຕ່ລະຂັ້ນ, ຖືຄວາມສຳຄັນຂອງຂະແໜງການຍຸຕິທຳຫຼາຍຂຶ້ນກວ່າເກົ່າຢ່າງຈະແຈ້ງ. ຕໍ່ກັບພະແນກຍຸຕິທຳແຂວງ ຈຳປາສັກ ທ່ານຍັງໄດ້ເນັ້ນໜັກບາງບັນຫາທີ່ຕ້ອງເອົາໃຈໃສ່ປັບປຸງແກ້ໄຂໃນຕໍ່ໜ້າ ໂດຍສະເພາະ ການຊີ້ນຳ-ນຳພາ ພະນັກງານ-ລັດຖະກອນ ໃນການສຸມໃສ່ການຈັດຕັ້ງປະຕິບັດໜ້າທີ່ວິຊາສະເພາະຂອງຕົນ ດ້ວຍຄວາມຮັບຜິດຊອບສູງ ແລະ ຕ້ອງຖືກຕ້ອງ, ສອດຄ່ອງກັບກົດໝາຍ; ສືບຕໍ່ປັບປຸງພາຍໃນ ໃຫ້ປອດໃສ, ເຂັ້ມແຂງ ແລະ ໜັກແໜ້ນ; ພົວພັນປະສານສົບທົບກັບພາກສ່ວນອື່ນທີ່ກ່ຽວພັນກັບຂະແໜງການຕົນ ທັງຂັ້ນສູນກາງ ແລະ ທ້ອງຖິ່ນ ຢ່າງເປັນປົກກະຕິ; ເອົາໃຈໃສ່ຍາດແຍ່ງເອົາການຊີ້ນຳ-ນຳພາ ທັງສາຍຕັ້ງ ແລະ ສາຍຂວາງ ໃຫ້ມີປະສິດທິຜົນດີທີ່ສຸດ.

ຂ່າວ-ພາບ: ຊາຍພິມພອນ ສີຣິວົງໄຊ

ປະເພດຂ່າວ: