ກະຊວງຍຸຕິທຳ ເຜີຍແຜ່ນິຕິກຳກ່ຽວກັບການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ນິຕິກຳກ່ຽວກັບການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ

ໃນຕອນເຊົ້າຂອງວັນທີ 25 ທັນວາ 2020 ທີ່ຜ່ານມາ ທີ່ຫ້ອງປະຊຸມໃຫຍ່ກະຊວງຍຸຕິທຳ  ໄດ້ຈັດໃຫ້ມີພິທີເຜີຍແຜ່ນິຕິກຳກ່ຽວກັບການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນ ຂັ້ນແຂວງ ຊຸດທີ II ແລະ ນິຕິກຳກ່ຽວກັບການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂຶ້ນໂດຍການເປັນປະທານຂອງສະຫາຍ ບຸນທາ ຊົງເຢີທ່າວ ຮອງເລຂາຄະນະບໍລິຫານງານພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ, ມີຄະນະປະຈຳ, ຄະນະກຳມະການ ພ້ອມສະມາຊິກພັກ ແລະ ພະນັກງານ-ລັດຖະກອນຂອງກະຊວງຍຸຕິທຳເຂົ້າຮ່ວມຢ່າງພ້ອມພຽງ.

ໃນໂອກາດນີ້ ທ່ານ ບຸນທາ ຊົງເຢີທ່າວ ໄດ້ເຜີຍແຜ່ຄຳແນະນຳ ຂອງຄະນະກຳມະການເລືອກຕັ້ງລະດັບຊາດສະບັບເລກທີ 06/ຄວຊ, ລົງວັນທີ 24 ພະຈິກ 2020 ກ່ຽວກັບໂຄງປະກອບບຸກຄະລາກອນຂອງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II. ຫຼັງຈາກນັ້ນ, ສະຫາຍ ເກດສະໜາ ພົມມະຈັນ ຄະນະປະຈຳພັກກະຊວງ, ຫົວໜ້າກົມຮ່ວມມືສາກົນ ໄດ້ຂຶ້ນເຜີຍແຜ່ຄຳສັ່ງ ຂອງກົມການເມືອງສູນກາງພັກ ວ່າດ້ວຍ ການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ແຈ້ງການ ຄະນະບໍລິຫານງານພັກກະຊວງຍຸຕິທຳ ແລະ ແຜນການດຳເນີນການຕີລາຄາຈັດແບ່ງປະເພດ ໜ່ວຍພັກ ແລະ ສະມາຊິກພັກ ປອດໃສ, ເຂັ້ມແຂງ, ໜັກແໜ້ນ ປະຈຳປີ 2020 ຊຶ່ງຈຸດປະສົງ ເພື່ອຜັນຂະຫຍາຍ ແລະ ຈັດຕັ້ງປະຕິບັດເນື້ອໃນຄຳສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ຖືກຕ້ອງສອດຄ່ອງ ແລະ ເປັນເອກະພາບກັນທົ່ວພັກ, ເພື່ອເຮັດໃຫ້ໜ່ວຍພັກ, ສະມາຊິກພັກ ທີ່ຂຶ້ນກັບອົງຄະນະພັກກະຊວງຍຸຕິທຳ ໃຫ້ສາມາດສ້າງແຜນນຳພາຈັດຕັ້ງປະຕິບັດ, ສະຫຼຸບຕີລາຄາການຈັດຕັ້ງແຜນການ, ຕີລາຄາຈັດແບ່ງໜ່ວຍພັກ ແລະ ສະມາຊິກພັກ, ເພື່ອເຫັນໄດ້ພຶດຕິກຳດ້ານຕັ້ງໜ້າ ທີ່ຄວນໄດ້ຮັບການເສີມຂະຫຍາຍ ແລະ ຂໍ້ຄົງຄ້າງທີ່ຕ້ອງໄດ້ປັບປຸງແກ້ໄຂຂອງໜ່ວຍພັກ, ແນໃສ່ເຮັດໃຫ້ໜ່ວຍພັກມີຄວາມປອດໃສ, ເຂັ້ມແຂງ, ໜັກແໜ້ນ ສາມາດເຮັດໃຫ້ບົດບາດການເປັນຜູ້ນຳພາວຽກງານການເມືອງ ໃນຂອບເຂດທີ່ໜ່ວຍພັກຕົນຮັບຜິດຊອບ ແລະ ເຮັດໃຫ້ສະມາຊິກພັກມີຄຸນທາດການເມືອງໜັກແໜ້ນ, ມີຄວາມຮູ້-ຄວາມສາມາດໃນການຕຳນິຕິຊົມຕົນເອງ ແລະ ຕິຊົມບັນດາສະມາຊິກພັກດ້ວຍກັນຢ່າງຈິງຈັງ ແລະ ກົງໄປກົງມາ.

ຂຽນຂ່າວ: ອ່ອນຄຳ; ຖ່າຍພາບ: ບຸນຖອມ ພະສະແຫວງ

ປະເພດຂ່າວ: