ກອງປະຊຸມໃຫຍ່ ຜູ້ແທນ ອົງຄະນະພັກກະຊວງຍຸຕິທຳ ຄັ້ງທີ V ໄດ້ໄຂຂຶ້ນຢ່າງສະຫງ່າຜ່າເຜີຍ

ກອງປະຊຸມໃຫຍ່ ຜູ້ແທນ ອົງຄະນະພັກກະຊວງຍຸຕິທຳ ຄັ້ງທີ V ໄດ້ໄຂຂຶ້ນຢ່າງສະຫງ່າຜ່າເຜີຍ ໃນວັນທີ 18 ພະຈິກ 2020 ທີ່ຫ້ອງປະຊຸມໃຫຍ່ຂອງ ກະຊວງຍຸຕິທຳ ໂດຍການເປັນປະທານຂອງ ສະຫາຍ ໄຊສີ ສັນຕິວົງ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງຍຸຕິທຳ, ເປັນກຽດເຂົ້າຮ່ວມຂອງສະຫາຍ ພົນໂທ ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ, ຄະນະຈັດຕັ້ງສູນກາງພັກ, ມີສະຫາຍຮອງເລຂາ, ຄະນະປະຈຳ-ຄະນະບໍລິຫານງານພັກກະຊວງ, ແຂກຖືກເຊີນຈາກສະພາແຫ່ງຊາດ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ພະແນກຍຸຕິທຳນະຄອນຫຼວງວຽງຈັນ, ຈຳປາສັກ, ອົງການຈັດຕັ້ງພັກ, ສະມາຊິກພັກອາວຸໂສ, ບຳນານ ພ້ອມດ້ວຍຜູ້ແທນສົມບູນ ເຂົ້າຮ່ວມທັງໝົດຈຳນວນ 145 ສະຫາຍ, ຍິງ 36 ສະຫາຍ.

ໃນກອງປະຊຸມໃຫຍ່ຜູ້ແທນໃນຄັ້ງນີ້ ໄດ້ຮັບຮອງເອົາບົດລາຍງານການເມືອງ, ບົດສຳຫຼວດການນຳພາລວມ ຂອງຄະນະບໍລິຫານງານພັກກະຊວງຍຸຕິທຳ ສະໄໝທີ IV ແລະ ແຜນພັດທະນາວຽກງານ ຂອງຂະແໜງການຍຸຕິທຳ ໄລຍະ 2021-2025 ໂດຍຂະແໜງຍຸຕິທຳໄດ້ກຳນົດ 4 ຈຸດໝາຍ ແລະ 7 ທິດທາງຕົ້ນຕໍ ຄື: ໄດ້ກຳນົດເອົາການພັດທະນາກົດໝາຍໃຫ້ເປັນລະບົບຄົບຊຸດ, ເອກະພາບ, ກົມກຽວ, ຈະແຈ້ງ, ເຊື່ອຖືໄດ້, ຄາດຄະເນໄດ້, ໂປ່ງໃສ, ຍຸຕິທໍາ ແລະ ທຸກຄົນສາມາດເຂົ້າເຖິງໄດ້ ການສ້າງ ແລະ ບູລະນະກົດໝາຍ ຕ້ອງຮັບປະກັນການຂະຫຍາຍພຶ້ນຖານເສດຖະກິດ ຕາມທິດສັງຄົມນິຍົມ ແລະ ຮັບປະກັນການປະຕິບັດສິດທິບຸກຄົນ, ສິດເສລີພາບປະຊາທິປະໄຕຂອງພົນລະເມືອງ, ປະກອບສ່ວນນຳເອົາປະເທດຊາດກ້າວຂຶ້ນ ຕາມທິດທີ່ພັກວາງໄວ້, ເປັນເຈົ້າການໂຄສະນາເຜີຍແຜ່ກົດໝາຍ ແລະ ປະສານສົມທົບກັບບັນດາກະຊວງ, ອົງການຈັດຕັ້ງການໂຄສະນາສະນາເຜີຍແຜ່ກົດໝາຍ, ສ້າງສະຕິເຄົາລົບ ແລະ ປະຕິບັດລັດຖະທຳມະນູນ, ກົດໝາຍ ໃຫ້ແກ່ພົນລະເມືອງລາວ ແລະ ສ້າງເງື່ອນໄຂສະດວກໃຫ້ປະຊາຊົນໄດ້ເຂົ້າເຖິງກົດໝາຍ ແລະ ຍຸຕິທຳ ແນໃສ່ເຮັດໃຫ້ກົດໝາຍທີ່ປະກາດໃຊ້ ໄດ້ຮັບການຈັດຕັ້ງປະຕິບັດ ແລະ ມີຜົນສັກສິດ, ສ້າງຖັນແຖວບຸກຄະລາກອນ, ສົ່ງເສີມບົດບາດຍິງ-ຊາຍ ໃນຂົງເຂດກົດໝາຍ ແລະ ຍຸຕິທຳ ໃຫ້ມີຄວາມຮູ້, ຄວາມສາມາດ ແລະ ມີຈັນຍາທຳທີ່ໜັກແໜ້ນ, ເປັນພະນັກງານຍຸຕິທຳ ປົກປ້ອງຜົນປະໂຫຍດຂອງລັດ, ຂອງປະຊາຊົນ, ບໍລິການທາງດ້ານກົດໝາຍ ໃຫ້ປະຊາຊົນດ້ວຍຄວາມຊື່ສັດບໍລິສຸດ, ໂປ່ງໃສ, ຍຸຕິທຳ ແລະ ວ່ອງໄວ ພ້ອມນັ້ນ ກໍພັດທະນາພື້ນຖານໂຄງລ່າງ ເພື່ອເປັນພື້ນຖານ ແລະ ຮັບປະກັນສະຖານທີ່ເຮັດວຽກຂອງຂະແໜງຍຸຕິທຳໃຫ້ເປັນລະບົບ ແລະ ມີຄວາມປອດໄພ.

ໃນກອງປະຊຸມຄັ້ງນີ້ ຜູ້ແທນໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິຫານງານພັກກະຊວງຍຸຕິທຳ ຊຸດທີ V ຈຳນວນ 11 ສະຫາຍ, ຍິງ 01 ສະຫາຍ, ຄະນະປະຈຳພັກ 3 ສະຫາຍ, ໃນນັ້ນໄດ້ເລືອກເອົາສະຫາຍ ໄພວີ ສີບົວລິພາ ເປັນເລຂາຄະນະບໍລິຫານງານພັກກະຊວງຍຸຕິທຳ, ສະຫາຍ ບຸນທາ ຊົງເຢີທ່າວ ເປັນຮອງເລຂາ, ສະຫາຍ ເກດສະໜາ ພົມມະຈັນ ເປັນປະທານກວດກາພັກ, ພ້ອມດຽວກັນນັ້ນ ໃນກອງປະຊຸມໄດ້ປ່ອນບັດຄັດເລືອກເອົາຜູ້ແທນສົມບູນ ຈຳນວນ 6 ສະຫາຍ ໄປຮ່ວມກອງປະຊຸມໃຫຍ່ ຄັ້ງທີ XI ຂອງພັກ.

ໃນຕອນທ້າຍຂອງກອງປະຊຸມ ສະຫາຍ ພົນໂທ ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ ກໍໄດ້ໃຫ້ກຽດໂອ້ລົມຕໍ່ຄະນະບໍລິຫານງານພັກກະຊວງຍຸຕິທຳຊຸດໃໝ່ ຊຶ່ງສະຫາຍກໍໄດ້ກ່າວຍ້ອງຍໍຊົມເຊີຍ ແລະ ຕີລາຄາສູງຕໍ່ໝາກຜົນແຫ່ງຄວາມສຳເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງຍຸຕິທຳ, ໂດຍຜັນຂະຫຍາຍມາເປັນ 6 ແຜນງານ, 23 ໂຄງການ, ພ້ອມກັນນັ້ນ ສະຫາຍຍັງໄດ້ເນັ້ນໜັກໃຫ້ຄະນະບໍລິຫານງານພັກກະຊວງຍຸຕິທຳຊຸດໃໝ່ເອົາໃຈໃສ່ນຳພາທາງດ້ານການເມືອງ-ແນວຄິດ ຕິດພັນກັບການນຳພາວຽກງານວິຊາສະເພາະ ແລະ ການກໍ່ສ້າງບຳລຸງຍົກລະດັບທາງດ້ານວິຊາການໃຫ້ຖັນແຖວນັກກົດໝາຍ, ຍົກສູງປະສິດທິພາບໃນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ, ເອົາໃຈໃສ່ກໍ່ສ້າງພັກ, ປັບປຸງແບບແຜນການນຳພາ ແລະ ວິທີການເຮັດວຽກຂອງຄະນະພັກ-ຄະນະນຳແຕ່ລະຂັ້ນ, ສ້າງຮາກຖານພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ.

ຂຽນຂ່າວ : ອ່ອນຄຳ ໄຊຍະວົງ, ຖ່າຍພາບ ຊາຍພິມພອນ ສີຣິວົງໄຊ

ປະເພດຂ່າວ: